Last updated on January 27th, 2025 at 02:51 pm
ತುಳುನಾಡ್‌ದ ಪಾಕ ಜನ ವಿದ್ಯಾಭ್ಯಾಸ, ಬೇಲೆದ ಮಿತ್ತ್ ಬೆಂಗಳೂರ್‌ಡ್ ನಿಲೆ ಆತೆರ್. ಏರಾಂಡಲ ಒರ ತುಳು ಪಾತೆರುನಕುಲು ತಿಕ್ಯೆರ್ಂಡ ಆಪಿನ ಕುಸಿಯೇ ಬೇತೆ, ನಾಲ್ ಜನ ಸೇರಿನಲ್ಪ ಏರ್ಲಾ ತುಳು ಪಾತೆರೊಂದುಲ್ಲೆರಾ ಪನ್ದ್ ಕೆಬಿ ಕೇನೊಂದೆ ಇಪ್ಪುಂಡು. ಅಪ್ಪೆ ಬಾಸೆ ಪನ್ಡನೇ ಅಂಚ, ದೂರದೂರುಡ್ ಒರ ಕೇನ್ನಗ ಬಾರೀ ಕುಸಿ. ಬೆಂಗಳೂರು‌ದ ತುಳುವೆರೆನ್ ಮಾತ ಒಟ್ಟುಮನ್ಪೆರೆ ಇನ್ಸ್ಟಾಗ್ರಾಮ್‌ಡ್ ‘ಬೆಂಗಳೂರು ತುಳುವಾಸ್’ ಪನ್ಪಿನ ಪೇಜ್ ಸುರು ಆದಿತ್ತ್‌ದ್, ಮೊಕುಲು ಬೆಂಗಳೂರುಡುಪ್ಪುನ ತುಳುವೆರೆನ್ ಒಟ್ಟು ಮನ್ಪೆರೆ ದಾದಾಂಡಲಾ ಒಂಜಿ ಕಾರ್ಯಕ್ರಮ ಮಲ್ತೊಂದುಪ್ಪುವೆರ್.
ಬೆಂಗಳೂರು ತುಳುವಾಸ್ ಪೇಜ್ ಬೆಂಗಳೂರುಡು ತುಳುವೆರೆ ಕಮ್ಯೂನಿಟಿನ್ ಉಂಡು ಮಲ್ತೊಂದು, ತುಳು ಬಾಸೆದ ಬಗೆಟ್ ಕಾರ್ಯಕ್ರಮೊಲೆನ್ ಮಲ್ತೊಂದು ಬೈದ್ಂಡ್. ಅಂಚೆನೇ ಐತಿಹಾಸಿಕ ಲಾಲ್‌ ಬಾಗ್‌ ಉದ್ಯಾನವನೊಡು ಕೋಡೆ(ಜ.26) ʻಬೆಂಗಳೂರು ತುಳುವಾಸ್ʼ ಮೀಟ್‌ ಅಪ್‌ ನಡತ್ಂಡ್. ಬೆಂಗಳೂರುಡುಪ್ಪುನ ತುಳುವೆರ್ ಒಟ್ಟು ಸೇರ್ದ್ ಕೋಡೆದ ರಜೆನ್ ಕುಸಿಟ್ ಕರಿತೆರ್.
ಈ ಕಾರ್ಯಕ್ರಮೊಡು ಸುರುಕು ತುಳುಭಾಷೆನ್ ಎಚ್ಚ ಗಲಸುನೆತ ಬಗೆಟ್ ಒಂತೆ ಚಟುವಟಿಕೆ ನಡತ್ಂಡ್. ಬೇತೆ ಬಾಸೆಲೆಗ್ ಪಗತ್ ಪೋತಿನ ತುಳುನಾಡ್‌ದ ಪ್ರಮುಖ ಜಾಗೆಲೆನ ಮೂಲ ತುಳು ಪುದರ್‌ಲೆನ ಬಗೆಟ್ ಕ್ವಿಜ್‌ದ ಲೆಕ ಮಲ್ತ್‌ದ್ ತೆರಿಪಾವುನ ಪುನೆಪು ನಡತ್ಂಡ್. ಕಮ್ಯೂನಿಟಿನ್ ಗಟ್ಟಿ ಮಲ್ತ್‌ದ್, ಉದ್ಯೋಗ ಕ್ಷೇತ್ರೊಡು ಇಪ್ಪುನಕ್ಲೆನ್ ಒಟ್ಟುಮನ್ಪೆರೆ ಐಟಿ- ಬಿಟಿ ಸಂಸ್ಥೆಲೆನ ಬೇಲೆಲೆನ ಒಲವುಲೆನ್ ಪಟ್ಟೊಂದು ಚರ್ಚೆ ನಡತ್ಂಡ್.
ತುಳುವೆರೆಗ್ ಬೆಂಗಳೂರ್‌ಡ್ ದಾಲ ಸಮಸ್ಯೆಲು ಆಂಡ, ಪಿಜಿ ಅತ್ತ್ಂಡ ಹಾಸ್ಟೆಲ್‌ಲೆನ ಕುಂದೆಲ್ ಆಂಡ ಅತ್ತ್ಂಡ ಬೇತೆ ಅವ್ವೇ ಸಮಸ್ಯೆ ಇತ್ತ್ಂಡಲಾ, ಅವೆಕ್ ನಮನೇ ಒಟ್ಟು ಸೇರ್ದ್ ಪಿರಿಕಟ್ಟ್ ಮನ್ಪುಗ ಪನ್ಪಿನ ಚರ್ಚೆಲಾ ನಡತ್ಂಡ್. ಸುಮಾರು ಪತ್ತ್ ಸಾರರ್ದ್‌ಲಾ ಎಚ್ಚ ಫಾಲೋವರ್ಸ್ ಇಪ್ಪುನ ‘ಬೆಂಗಳೂರು ತುಳುವಾಸ್ʼ ಪೇಜ್ ಅಟ್ಟನೆ ಮಲ್ದಿನ ಈ ಕಾರ್ಯಕ್ರಮೊಡು ರಂಜನ್‌ ಎಸ್ ವೈ, ಜಿತೇಶ್‌ ಕುಲಾಲ್‌ ತೋಕೂರು, ಸನತ್‌ ಅಮೀನ್‌, ಜಿತೇಶ್‌ ಪೊಸಬೊಟ್ಟು, ಸಿಂಚನಾ ರಾವ್‌, ಶ್ರೀಪರ್ಣ ಶೆಟ್ಟಿ, ಕಾರ್ತಿಕ್‌ ಅಮೈ ಇಂಚ ಪಾಕ ಜನ ಪಾಲ್‌ಪಡೆದಿತ್ತೆರ್.