ಮುಗಿಯಂದಿನ ಇಂದ್ರಾಳಿ ರೈಲ್ವೇ ಮಿತ್ತಸಂಕೊದ ಬೇಲೆ: ಕಾಂಟ್ರಾಕ್ಟರ್‌ನ್ ಬ್ಲ್ಯಾಕ್ ಲಿಸ್ಟ್‌ಗ್ ಗೋಡ್ಯಾವರೆ ಡಿಸಿ ಸೂಚನೆ

Last updated on January 7th, 2025 at 08:44 am

ಒಡಿಪು : ಇಂದ್ರಾಳಿ ರೈಲ್ವೇ ಮಿತ್ತಸಂಕೊದ ಬೇಲೆನ್ ಗೊತ್ತುಮಲ್ದಿನ ಪೊರ್ತುದ ಉಲಯಿ ಮನ್ಪಂದೆ ನಿರ್ಲಕ್ಷ್ಯ ತೋಜಾದಿನ ಗುತ್ತಿಗೆದಾರನ್ ಕಪ್ಪು ಪಟ್ಟಿಗ್ ಗೋಡ್ಯಾಯೆರೆ ಕ್ರಮ ಗೆತೊನೊಡು ಪನ್ದ್ ಇಂಜಿನಿಯರ್‌ಗ್ ಜಿಲ್ಲಾಧಿಕಾರಿ ಡಾ. ಕೆ ವಿದ್ಯಾಕುಮಾರಿ ಸೂಚನೆ ಕೊರ್ಯೆರ್. ಆರ್ ಕೋಡೆ ಮಣಿಪಾಲ ರಜತಾದ್ರಿದ ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣೊಡು ರಾಷ್ಟ್ರೀಯ ಪೆರ್ಸಾದಿ 169 ಎ ಇಂದ್ರಾಳಿ ರೈಲ್ವೇ ಮಿತ್ತಸಂಕೊದ ಬೇಲೆದ ಪ್ರಗತಿ ಪರಿಶೀಲನೆದ ಬಗೆಟ್ ಚರ್ಚಿಪೆರೆ ನಡತಿನ ಇನಯೊದ ಗುರ್ಕಾರ್ಮೆ ವಯಿತೊಂದು ಪಾತೆರೊಂದಿತ್ತೆರ್.

ಒಡಿಪುರ್ದ್ ಮಣಿಪಾಲಗ್ ಪೋಪಿನ ಸಾದಿ ಅಗೆಲ್ಪುನ ಬೇಲೆದ ಪೊರ್ತುಡು ರೈಲ್ವೇ ಮಿತ್ತಸಂಕೊದ ಬೇಲೆನ್ಲಾ ಸುರು ಮಲ್ತಿತ್ತ್ಂಡ್. ರೈಲ್ವೇ ಇಲಾಖೆ ಮಿಲಾವುದ ಸಂಕ ಕಟ್ಟೊಡು ಪನ್ದ್ ಸೂಚನೆ ಕೊರ್ತಿನ ದಿಸೆಟ್, 2018 ನೇ ಸಾಲ್‌ಡ್ ಮಿಲಾವುದ ಸಂಕೊದ ಬೇಲೆ ಸುರುವಾದ್, 5 ವರ್ಸ ಕರೀಂಡಲಾ ಪೂರ್ಣ ಆವಂದೆ ಸಾರ್ವಜನಿಕೆರೆ ಸಂಚಾರೊಗು ಅವ್ಯವಸ್ಥೆ ಉಂಡಾದ್ ಸಾರ್ವಜನಿಕೆರೆರ್ದ್ ಒಯಿಲ್‌ಲ್ ದಿನೋಲಾ ಬರೊಂದುಲ್ಲ. ಆಂಡ, ಗುತ್ತಿಗೆದಾರೆರ್ ಗೊತ್ತು ಮಲ್ದಿನ  ಪೊರ್ತುದುಲಯಿ ಬೇಲೆ ಮುಗಿಪಂದಿನವೆ ಉಂದೆಕ್ ಮಾತಾ ನೆವನ. ಪ್ರಮುಖ ಗುತ್ತಿಗೆದಾರೆ ಬೊಕ್ಕ ಉಪ ಗುತ್ತಿಗೆದಾರನ್ ಬ್ಲಾಕ್ ಲಿಸ್ಟ್‌ಗ್ ಗೋಡ್ಯಾಯೆರೆ ಓಲೆ ಬರೆಯೆರೆ ಜಿಲ್ಲಾಧಿಕಾರಿ ಇಂಜಿನಿಯರ್‌ರೆಗ್ ತೆರಿಪಾಯೆರ್.