Last updated on January 29th, 2025 at 04:46 pm
ಇನಿತ ಡಿಜಿಟಲ್ ಕಾಲೊಡು ಗೂಗಲ್ ನಮ್ಮ ಜೂವನೊರ್ದ್ ದೆಪ್ಪೆರಗಾವಂದಿನ ಸೊತ್ತುಲೆಡ್ ಒಂಜಿ ಆದ್ ಪೋತುಂಡು. ಇತ್ತೆದ ಪೊಸ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್‌ದ ಚಾಟ್‌ಬಾಟ್‌ಲೆರ್ದಾವರ ಒಂತೆ ಪಿರ ಬೂರ್ನ್ಡಲಾ ಗೂಗಲ್ ಸರ್ಚ್ ತನ್ನ ಪುಗರ್ತೆ, ಜನಪ್ರಿಯತೆನ್ ಬುಡ್ದ್ ಕೊರ್ತುಜಿ. ಇತ್ತೆಲಾ ಒವ್ವಾಂಡಲಾ ಪೊಸ ಇಸಯೊದ ಬಗೆಟ್ ತೆರಿಯೊನರೆ ನಮ ಸುರು ತೂಪುನು ಗೂಗಲೊ‌ದಂಚಿಗೇ.
ಎಚ್ಚಿನ ಸಮಸ್ಯೆಲೆಗ್, ಸೋದ್ಯಲೆಗ್ ಸದು ಕೊರ್ಪುನ ಗೂಗಲ್‌ನ್ ಗಲಸ್‌ನಗ ನಮ ಜಬದ್ದರಿಡ್ ನಡತೊನೊಡಾಪುಂಡು. ಒಂಜಾತ್ ಇಸಯೊಲೆನ ಬಗೆಟ್ ನಾಡುನವು ನಮನ್ ಕೋರ್ಟ್ ಕೋರ್ಟ್ ತಿರ್ಗೆರನಾ, ಜೈಲ್‌ಡ್ ಕುಲ್ಲುಲೆಕನಾ ಮಲ್ತ್ ಪಾಡು.
ಸರಕಾರೊಲು ಬೊಕ್ಕ ಕಾನೂನು ಸುವ್ಯವಸ್ಥೆನ್ ಕಾಪುನಂಚಿನ ಸಂಸ್ಥೆಲು ಸಾಮಾಜಿಕ ಭದ್ರತೆನ್ ಒರತೊನರೆ ಬೋಡಾದ್ ಆನ್‌ಲೈನ್‌ಡ್ ಆಪಿನ ಪೋಪಿನೆನ್ ಮಾತ ಬಾರೀ ಜಾಕಿನಡ್ ತೂವೊಂದುಪ್ಪುವೆರ್.
ಎಚ್ಚಾದ್ ಎಡ್ಡೇನ ಇಸಯೊಲೆನ ಬಗೆಟ್ ನಾಡೆರೆಗ್ ಗಲಸುನ ಗೂಗಲ್‌ಡ್ ಕೆಲವೊಂಜಿ ಸರ್ಚ್‌ಲು ನಮನ ಮಿತ್ತ್ ಜಡ್ತೆ, ದಂಡ ಅತ್ತ್ಂಡ ಕರ್ಪಿಲ್ಲ ಶಿಕ್ಷೆಗ್‌ಲಾ ಸಾದಿ ಆವು.
ಈ ಇಸಯೊಲು ಎಚ್ಚಾದ್ ಕಾನೂನು ಬಾಹಿರ, ದೇಶ ಅತ್ತ್ಂಡ ವಿಶ್ವೊದ ಸುರಕ್ಷತೆಗ್ ಪೆಟ್ಟ್ ಬೂರುನಂಚಿನವು ಆದುಪ್ಪುಂಡು. ಇಂಚಿನ ನಾಲ್ ಇಸಯೊಲೆನ್ ಈ ತಿರ್ತ್ ಕೊರೊಂದುಲ್ಲ. ಉಂದೆನ್ ನಿಕುಲು ಏಪೊಗ್ಲಾ ಗೂಗಲ್‌ಡ್ ನಾಡೆರೆ ಬಲ್ಲಿ.
1. ಬಾಂಬ್ ಎಂಚ ಮನ್ಪುನು?
ಎಚ್ಚಿನ ದೇಸೊಲೆಡ್ ಬಾಂಬ್ ಮನ್ಪುನೆತ ಬಗೆಟ್ ಸರ್ಚ್ ಮನ್ಪುನವು ಒಂಜಿ ಸೀರಿಯಸ್ ಕ್ರಿಮಿನಲ್ ಅಪರಾಧ ಆದುಂಡು. ಭಯೋತ್ಪಾದನೆತ ವಿರುದ್ಧ ಉಂತೆರ ಸರಕಾರೊಲು ಪಾಕ ಸುರಕ್ಷಾ ಪ್ರಕ್ರಿಯೆಲೆನ್ ಮಲ್ದಿಪ್ಪ. ಕಾಲಿ ಗಮ್ಮತ್ತ್‌ಗ್ ಅತ್ತ್ಂಡ ಕ್ಯೂರಿಯಾಸಿಟಿಡ್ ಇಂಚಿನ ಸರ್ಚ್ ಮಲ್ತ್ಂಡಲಾ ಜಡ್ತೆ, ಅರೆಸ್ಟ್ ಆಪಿನ ಸಾಧ್ಯತೆಲು ಇಪ್ಪುವ.
2. ಅಪ್ರಾಪ್ತ ಜೋಕುಲೆನ ಅಶ್ಲೀಲ ವೀಡಿಯೋಲು
ವಿಶ್ವೊಡೊರ್ಮೆ ಉಂದೆನ್ ಬಜೀ ದೆತ್ತ್ ಪಾಡಿನ ಕ್ರೈಂ ಆದ್ ತೂಪೆರ್. ಉಂದೆತ ಬಗೆಟ್ ಸರ್ಚ್ ಮನ್ಪುನವು ಕ್ರಿಮಿನಲ್ ಅಪರಾಧ ಆದುಂಡು. ಪೋಕ್ಸೋ ಕೇಸ್ ಬೂರ್ದ್ ವರ್ಸಗಟ್ಲೆ ಜೈಲ್‌ಡ್ ಕುಲ್ಲೊಡಾದ್ ಬರು.
3. ಹ್ಯಾಕಿಂಗ್ ಟ್ಯುಟೋರಿಯಲ್ ಅತ್ತ್ಂಡ ತಂತ್ರಾಂಶ
ಹ್ಯಾಕಿಂಗ್ ಸಾಫ್ಟ್‌ವೇರ್, ಟ್ಯುಟೋರಿಯಲ್‌ಲೆನ ಬಗೆಟ್ ನಾಡುನಲಾ ಒರ್ಯನ ಮಿತ್ತ್ ಕಾನೂನಾತ್ಮಕ ಕ್ರಮ ಗೆತೊನುನ ಲೆಕ ಮನ್ಪು. ಅನಧಿಕೃತ ಹ್ಯಾಕಿಂಗ್ ಸೈಬರ್ ಸೆಕ್ಯೂರಿಟಿ ಕಾನೂನುಲೆನ ವಿರುದ್ಧವಾದುಂಡು.
4. ಪೈರೇಟೆಡ್ ಪಿಚ್ಚರ್‌ಲು
ಪೈರೇಟ್ ಆತಿನ ಪಿಚ್ಚರ್‌ಲೆನ್ ಡೌನ್‌ಲೋಡ್ ಮನ್ಪುನು ಅತ್ತ್ಂಡ ಸ್ಟ್ರೀಮ್ ಮನ್ಪುನೆಟ್ ಏರೆನ ಜೂವೊಗು ಪಡಾಯಿ ಇಜ್ಜಿಂಡಲಾ ಇಂಟೆಲೆಕ್ಚುವಲ್ ಪ್ರಾಪರ್ಟಿ(ಬೌದ್ಧಿಕ ಆಸ್ತಿ) ದ ಕಾನೂನುಲೆಗ್ ವಿರುದ್ಧವಾದ್ ಉಂಡು. ಭಾರತೊಡು ಪೈರಸಿ ಕೇಸ್‌ಡ್ ಮೂಜಿ ವರ್ಸೊದ ಶಿಕ್ಷೆರ್ದ್ ಪತ್ತ್‌ದ್ 10ಲಕ್ಷ ಮುಟ್ಟ ದಂಡ ಕಟ್ಟೊಡಾದ್ ಬರ್ಪುಂಡು. ಏಪೊಲ ಲೀಗಲ್ ಪ್ಲಾಟ್‌ಫಾರ್ಮ್‌ಲೆರ್ದ್ ಡೌನ್‌ಲೋಡ್ ಮನ್ಪುನು ಎಡ್ಡೆ.
ಎಚ್ಚಿನಕುಲು ಎಂಕ್ಲು ಆನ್‌ಲೈನ್‌ಡ್ ಮಲ್ದಿನ ಏಲೆಗ್ಲಾ ಗೊತ್ತಾಪುಜಿ ಪನ್ದ್ ಎನ್ನುವೆರ್, ಆಂಡ ಇಂಟರ್ನೆಟ್ ಸರ್ವಿಸ್ ಪ್ರೊವೈಡರ್, ಸರ್ಚ್ ಇಂಜಿನ್, ಸೈಬರ್ ಸೆಕ್ಯೂರಿಟಿ ಸಂಸ್ಥೆಲೆಗಾ ನಮ ದಾದ ಸರ್ಚ್ ಮಲ್ತ್‌ದ ಪನ್ಪಿನೆತ ರೆಕಾರ್ಡ್ ತಿಕ್ಕುಂಡು.
ಏಪೊಲ ದೇಸೊದ ಎಡ್ಡೆ ಪ್ರಜೆ ಆದ್, ಜಬದ್ದರಿ ಇತ್ತಿನ ಜನ ಆದ್ ಇಂಟರ್ನೆಟ್ ಗಲಸ್‌ಗ.