Last updated on January 7th, 2025 at 06:40 pm
ಕುಡ್ಲ: “ಯಾನ್ ರಾಜಕೀಯ ನಿವೃತ್ತಿ ಗೆತೊಂದಿಜಿ, ಕಿಡಿಗೇಡಿಲು ಸುಳ್ಳು ಸುದ್ದಿ ಪಟ್ಟೊಂದುಲ್ಲೆರ್” ಪನ್ದ್ ವಿಧಾನ ಪರಿಷತ್‌ ಸದಸ್ಯೆ, ದ.ಕ ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷೆ ಹರೀಶ್‌ ಕುಮಾರ್ ಸ್ಪಷ್ಟನೆ ಕೊರ್ಯೆರ್.
ಸುದ್ದಿಗಾರೆರೆಡ ಪಾತೆರ್ನ ಆರ್, ಏರೋ ಕಿಡಿಗೇಡಿಲು ಇಂಚಿನ ಕಲು ಸುದ್ದಿ ಪಟ್ಟೊಂದುಲ್ಲೆರ್. ಉಂದು ಸತ್ಯೊಗು ದೂರವಾಯಿನ ಸುದ್ದಿ. ಯಾನ್ ಕೋರ್‌ ಕಮಿಟಿ ಇನಯಡ್ ಪಾಲ್‌ಪಡೆದಿತ್ತೆ. ಪೊಸ ವರ್ಸೊದ ಲೆಕ್ಕೊಡು ಚೀಪೆ ಪಟ್ಟ್‌ದಿನ ಅಂದ್, ಭಾಷಣ ಮಲ್ದಿನಲಾ ಅಂದ್. ಆಂಡ ಒಲ್ಪಲಾ ರಾಜೀನಾಮೆ ಕೊರ್ಪೇನ್ದ್ ಪನ್ದಿಜಿ ಪನ್ದ್ ಪನ್ಡೆರ್.
ಕೋರ್‌ ಕಮಿಟಿ ಸಭೆತ ಪೊರ್ತುಡು ಹರೀಶ್‌ ಕುಮಾರ್ ರಾಜೀನಾಮೆ ಕೊರ್ಪೆರ್ ಪನ್ದ್ ಕೆಲ ವೆಬ್‌ಸೈಟ್‌‌ಲೆಡ್ ಸುದ್ದಿ ಆದಿತ್ತ್ಂಡ್, ಈ ಬಗೆಟ್ ಹರೀಶ್‌ ಕುಮಾರ್ ಅಸಮಾಧಾನ ತೂಪಾದಿತ್ತೆರ್.
ಜಿಲ್ಲಾ ಕಾಂಗ್ರಸ್‌ ಅಧ್ಯಕ್ಷೆ ಆದ್ ರಡ್ಡ್ ಅವಧಿ ಬೆನ್ತೆ. ರಡ್ಡ್ ವರ್ಸ ದುಂಬೇ ರಾಜಿನಾಮೆ ಕೊರ್ದಿತ್ತೆ. ಆಂಡ ಚುನಾವಣೆ ಸೇರ್ದ್ ಬೇತೆ ನೆವನೊಲೆನ್ ದುಂಬು ದೀದ್ ದುಂಬರಿಪೆರ ಹೈಕಮಾಂಡ್‌‌ದ ಸೂಚನೆ ಇತ್ತ್ಂಡ್. ಏಳ್ ವರ್ಸ ಏಳ್ ತಿಂಗೊಲುರ್ದಿಂಚಿ ಅಧ್ಯಕ್ಷೆ ಆದ್ ಉಲ್ಲೆ. ಏರೆನಲಾ ಪುದರ್‌ನ್ ಹೈಕಮಾಂಡ್‌ ಪ್ರಕಟ ಮಲ್ತ್ಂಡ ಅಪಗನೇ ಯಾನ್ ಅಧ್ಯಕ್ಷನ ಜಾಗೆರ್ದ್ ಜಪ್ಪೆ. ರಾಜಕೀಯ ನಿವೃತ್ತಿದ ಪಾತೆರನೇ ಇಜ್ಜಿ ಪನ್ದ್ ಹರೀಶ್‌ ಕುಮಾರ್ ಸ್ಪಷ್ಟನೆ ಕೊರ್ಯೆರ್.