Last updated on January 4th, 2025 at 11:19 am
ಕೋವಿಡ್ 19 ದ ಗೊಬ್ಬು ಮುಗಿಲೆಕನೆ, ಪೊಸತೊಂಜಿ ವೈರಸ್‌ದ ಉಪದ್ರ ಚೀನಾಡ್ ತೊಡಂಗ್‌ದ್ಂಡ್. ಪೊಸ ವರ್ಸೊದ ಸುರೂಟೆ ಈ ನಿಗೂಢ ವೈರಸ್‌ದ ಪೋಡಿಗೆ ಉಂಡಾತ್ಂಡ್. ಉಂದೆಕ್ ಹ್ಯೂಮನ್ ಮೆಟಾಪ್ನ್ಯೂಮೋ ವೈರಸ್ (HMPV) ಪನ್ದ್ ಪುದರ್ ದೀತೆರ್. ಉಂದು ಚೀನಾಡ್ ಬಾರೀ ಬೇಗ ಪರಡೊಂದಿತ್ತ್‌ದ್, ಹಾಂಕಾಂಗ್, ಜಪಾನ್‌ಗ್ಲಾ ಎತ್ತ್‌ದ್ಂಡ್. ಚೀನಾದ ಬಡಕಾಯಿ ಪ್ರಾಂತ್ಯೊಡು 14 ವರ್ಸ ಪ್ರಾಯೊರ್ದು ತಿರ್ತ್‌ದ ಜೋಕುಲೆಡ ಎಚ್ಚಾದ್ ತೋಜಿದ್ ಬತ್ತ್‌ದ್ಂಡ್. ಉಂದೆತ ನಡುಟು ಭಾರತೊಡ್ಲಾ ಈ ವೈರಸ್ ಪಗರುಂಡಾ ಪನ್ಪಿನ ಪೋಡಿಗೆ ಪುಟ್ಟುದ್ಂಡ್. ಈ ಬಗೆಟ್ ಆರೋಗ್ಯ ತಜ್ಞೆರ್ ದಾದ ಪನ್ಪೆರ್ ತೂಕ.
HMPV ದ ರೋಗಲಕ್ಷಣೊಲು ಕೋವಿಡ್ 19 ದ ರೋಗಲಕ್ಷಣೊಲೆನ್ ಒಂಬುವ. ಎಚ್ಚಿನ ಪರಿಶೀಲನೆ ಅಂಚೆನೇ ಎಚ್ಚ ಜಾಗ್‌ರ್ತೆಡುಪ್ಪುನ ಅವಶ್ಯಕತೆ ಉಂಡು. ಆಂಡ ಪೋಡ್ಯುನಂಚ ದಾಲ ಇಜ್ಜಿ ಪನ್ದ್ ದೆಹಲಿ ಮೆಡಿಕಲ್ ಕೌನ್ಸಿಲ್ ಅಧ್ಯಕ್ಷೆ ಡಾ ಅರುಣ್ ಗುಪ್ತಾ ತೆರಿಪಾದೆರ್ ಪನ್ದ್ ಲೈವ್ ಮಿಂಟ್ ವರದಿ ಮಲ್ದ್ಂಡ್.
HMPV ದ ರೋಗಲಕ್ಷಣೊಲು ಜ್ವರ, ಶೀತ, ತೆಮ್ಮ ಇಂಚ ಸಾಮಾನ್ಯ ಜ್ವರೊತವೇ ಆದುಲ್ಲ. HMPV ಉಂದೇ ಸುರುತ ಸರ್ತಿ ತೋಜಿದ್ ಬೈದಿನ ಅತ್ತ್. 2011-2012 ದ ಪೊರ್ತುಡು ಅಮೆರಿಕ, ಕೆನಡಾ, ಯೂರೋಪ್ ಪ್ರಾಂತ್ಯೊಲೆಡ್ ವರದಿ ಆದಿತ್ತ್ಂಡ್.
ಭಾರತೊಡು ದಮ್ಮುದ ಸಮಸ್ಯೆ ಇತ್ತಿನಕ್ಲೆನ ಡೇಟಾನ್ ವಿಶ್ಲೇಷಣೆ ಮಲ್ತ್‌ದ. ಡಿಸೆಂಬರ್ 2024ತ ಡೇಟಾಡ್ ದಾಲ ಮಲ್ಲ ಏರ್ತೆಲ್ ಇಜ್ಜಿ. ನಮ್ಮ ಒವ್ವೇ ಸಂಸ್ಥೆಲೆರ್ದ್ ಎಚ್ಚಿನ ಪ್ರಕರಣೊಲುಲಾ ವರದಿಯಾತಿಜ. ಅಂಚಾದ್ ಒವ್ವೇ ಅಲರ್ಟ್‌‌ಲಾ ಇಜ್ಜಿ ಪನ್ದ್ ಆರೋಗ್ಯ ಸೇವೆಲೆನ ಮಹಾನಿರ್ದೇಶಕೆ ಅತುಲ್ ಗೋಯೆಲ್ ಪನ್ತೆರ್.