Last updated on May 30th, 2025 at 01:44 pm
ಉಳ್ಳಾಲ: ಇಲ್ಲದ ಮಿತ್ತ್ ಬರೆ ಜರಿದ್ ಬೂರ್ದು ಜನೊಕುಲು ಮಣ್ಣ್ದಡಿಟ್ ತಿಕಲೊಂದಿನ ಪ್ರಕರಣೊಡು ಇತ್ತೆ ಅಪ್ಪೆ ಬೊಕ್ಕ ಒಂಜಿ ಬಾಲೆನ್ ಪಿದಯಿ ದೆತ್ತ್ದೆರ್. ನಡಕೆಡ್ ಒರ್ತಿ ಪೊಂಜೊವು ಬೊಕ್ಕ ಬಾಲೆ ತೀರ್ದೆರ್. ಒಟ್ಟು ನಾಲ್ ಜನೊತ ರಕ್ಷಣೆ ಮಲ್ದೆರ್.
ಉಳ್ಳಾಲದ ಮಂಜನಾಡಿ ಗ್ರಾಮೊದ ಉರುಮನೆ ಮದಪಾಡಿಡ್ ಶುಕ್ರವಾರ (ಮೇ 30) ಕಾಂಡೆ ಇಲ್ಲದ ಮಿತ್ತ್ ಭಾರೀ ಪ್ರಮಾಣೊಡು ಮಣ್ಣ್ ಜರಿದ್ ಬೂರ್ದಿತ್ತ್ಂಡ್. ತೋಟೊದ ನಡುಟು ಇತ್ತಿನ ಇಲ್ಲದ ಮಿತ್ತ್ ನೇಲ್ಯ ಮರ ತ ಒಟ್ಟುಗು ಸುಮಾರ್ 30 ಫೀಟ್ದಾತ್ ಬರೆ ಜರಿದ್ ಬೂರ್ದ್ಂಡ್. ಶುಕ್ರವಾರ ಕಾಂಡೃ ಸುಮಾರ್ 4 ಗಂಟೆದ ಅಂದಾಜಿಗ್ ಈ ನಡಕೆ ನಡತ್ದ್ಂಡ್.
ನಡಕೆದ ಪೊರ್ತುಡು ಯಜಮಾನೆ ಕಾಂತಪ್ಪ ಪೂಜಾರ್ಲು, ಆರೆನ ಬೊಡೆದಿ ಪ್ರೇಮಾ, ಮಗೆ ಸೀತಾರಾಮೆ ಬೊಕ್ಕ ಆರ್ನ ಬೊಡೆದಿ, ಅಶ್ವಿನಿ ಜೋಕುಲು ಆರುಷ್, ಆರ್ಯನ್ ಜೆತ್ತಿತ್ತೆರ್. ಸೀತಾರಾಮೆರ್ ಎಂಚನಾ ಇಲ್ಲರ್ದ್ ಪಿದಯಿ ಬತ್ತ್ದೆರ್.
ಪ್ರೇಮಾ ಅಲ್ಪನೇ ತೀರ್ದೆರ್. ಆರೆನ ಮೃತದೇಹೊಲಾ ಮಣ್ಣ್ದಡಿಟೇ ಉಂಡು. ಕಾಂತಪ್ಪ ಪೂಜಾರ್ಲೆಗ್ ಗಡಿಕುಲಾದಿತ್ತ್ದ್ ಆರೆನ್ ಆಸ್ಪತ್ರೆಗ್ ದಾಕಲ್ತ್ದೆರ್. ಬೊಕ್ಕ ನಡತಿನ ಕಾರ್ಯಾಚರಣೆಡ್ ಅಶ್ವಿನಿ ಬೊಕ್ಕ ಆರುಷ್ (2 ವರ್ಷ) ನ ರಕ್ಷಣೆ ಮಲ್ತ್ದೆರ್. ಇರ್ವೆರೆ ಸ್ಥಿತಿಲಾ ಸೀರಿಯಸ್ ಆದುಂಡು.
ಮೂಜಿ ವರ್ಸೊದ ಬಾಲೆ ಆರ್ಯನ್ ಬೊಕ್ಕ ಪ್ರೇಮ (54) ತೀರ್ದೆರ್.
NDRF, SDRFಕೂಟೋಲು ಕಾರ್ಯಾಚರಣೆ ಮಲ್ತೊಂದಿತ್ತ್ದ್, ಪ್ರೇಮ ಮೆರೆನ ಮೃತದೇಹೊನು ನಾಡೊಂದುಲ್ಲೆರ್.