Last updated on October 23rd, 2026 at 04:21 pm
ನಿಟ್ಟೆ, ಅ. 23: ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯೊದ ಅಂಗಸಂಸ್ಥೆ ನಿಟ್ಟೆ ಮಹಾಲಿಂಗ ಅಡ್ಯಂತಾಯ ಸ್ಮಾರಕ ತಾಂತ್ರಿಕ ಮಹಾವಿದ್ಯಾಲಯೊದ ಸಾಂಸ್ಕೃತಿಕ ಸಂಘ ‘ಕಲಾಸಂಗಮ’ ಅಟ್ಟನೆ ಮಲ್ದಿನ ಲೆಪ್ಪು ಕೊರ್ತಿನ ಕೂಟೊಲೆನ ತೆಂಕುತಿಟ್ಟ್ ಯಕ್ಷಗಾನ ಪಂತ ‘ಯಕ್ಷಗವಿಷ್ಟಿ–2026’ ಅಕ್ಟೋಬರ್ 24ತಾನಿ ನಿಟ್ಟೆ ಕಾಲೇಜ್‌ಡ್ ನಡಪರೆಗುಂಡು.
ಯಕ್ಷಗಾನೊದ ಸಾಂಪ್ರದಾಯಿಕ ಪೊರ್ಲುನು ಜವನೆರೆಗ್ ಪೊಲಬು ಮಲ್ಪುನ ಅಂಚೆನೇ ವಿದ್ಯಾರ್ಥಿಲೆಡ ಕಲೆತ ಬಗೆಟ್ ಆಸಕ್ತಿ ಪುಟ್ಟಾವುನ ಉದ್ದೇಶೊಡು ಅಟ್ಟನೆ ಮಲ್ದಿನ ಈ ಪಂತ ನಾಲನೇ ಆವೃತ್ತಿಗ್ ಕಾರ್ ದೀತ್ಂಡ್.
ಈ ಸರ್ತಿದ ಪಂತೊನು ‘ಇನವಂಶಚರಿತಾಮೃತಂ’ ಪನ್ಪಿ ಪರಿಕಲ್ಪನೆದ ಅಡಿಟ್ ನಡಪಾವೊಂದಿತ್ತ್‌ದ್, ಸೂರ್ಯವಂಶೊದ ಐನ್ ರಾಜೆರಾಯಿನ ನಿಬಂಧನೆ, ದಂಡಕೆ, ದಿಲೀಪೆ, ಭಗೀರಥೆ ಬೊಕ್ಕ ದಶರಥನ ಕಥೆನ್ ಆಧರಿತಿನ ಯಕ್ಷಗಾನ ಪ್ರಸಂಗಲು ರಂಗೊಡು ಅನಾವರಣ ಆವರೆ ಉಲ್ಲ. ಐನ್ ಆಹ್ವಾನಿತ ಕೂಟೊಲು ಪಂತೊಡು ಪಾಲ್‌ಪಡೆಯೆರೆ ಇತ್ತ್‌ದ್, ಪೌರಾಣಿಕ ಕಥೆತ ಮುಕೇನ ಯಕ್ಷಗಾನ ಕಲೆತ ವೈವಿಧ್ಯತೆನ ಪ್ರೇಕ್ಷಕೆರೆ ಎದುರು ದೀವೊಂದುಲ್ಲೆರ್.
ಯಕ್ಷಗಾನ ರಂಗೊದ ಪೆರಿಯ ಕಲಾವಿದೆರ್ ಕೀರ್ತಿಶೇಷ ಸೂರಿಕುಮೇರ್ ಶ್ರೀ ಕೆ. ಗೋವಿಂದ ಭಟ್ರೆನ ಸ್ಮರಣಾರ್ಥ ಈ ಸರ್ತಿದ ಪಂತೊದ ಚಾವಡಿಗ್ ಆರೆನ ಪುದರ್ ದೀತೆರ್. ಆತೇ ಅತ್ತಂದೆ, ಶಿಕ್ಷಣ ಬೊಕ್ಕ ಸಾಂಸ್ಕೃತಿಕ ಕ್ಷೇತ್ರೊಗು ಮಾಮಲ್ಲ ಸೇಜ ಕೊರ್ತಿನ ದಿ. ಶ್ರೀ ಎನ್. ವಿನಯ ಹೆಗ್ಡೆ ಮೆರೆನ ಸ್ಮರಣಾರ್ಥ ಈ ವರ್ಸೊದ ‘ಯಕ್ಷಗವಿಷ್ಟಿ’ನ್ ಸಮರ್ಪಣೆ ಮಲ್ತೊಂದುಲ್ಲೆರ್.
ಲೇಸ್‌ನ್ ಶ್ರೀ ಕೋದಂಡರಾಮ ಕೃಪಾಪೋಷಿತ ಯಕ್ಷಗಾನ ಮಂಡಳಿ, ಹನುಮಗಿರಿ ಮೇಳದ ಪುಗರ್ತೆದ ಯಕ್ಷಗಾನ ಕಲಾವಿದೆ ಶ್ರೀ ಜಯಪ್ರಕಾಶ್ ಶೆಟ್ಟಿ ಪೆರ್ಮುದೆ ಉದಿಪನ ಮಲ್ಪರೆ ಉಲ್ಲೆರ್. ನಿಟ್ಟೆ ತಾಂತ್ರಿಕ ಮಹಾವಿದ್ಯಾಲಯೊದ ಪ್ರಾಂಶುಪಾಲೆರ್ ಡಾ. ನಿರಂಜನ್ ಎನ್. ಚಿಪ್ಲೂಣ್ಕರ್ ಉದ್ಘಾಟನಾ ಸಮಾರಂಭೊದ ಅಧ್ಯಕ್ಷತೆ ವಯಿತೊನುವೆರ್.
ಪಂತೊದ ಸಮಾರೋಪ ಸಮಾರಂಭೊಡು ಸುಳ್ಯದ ಸರ್ಕಾರಿ ಪದವಿಪೂರ್ವ ಕಾಲೇಜ್‌ದ ಉಪಪ್ರಾಂಶುಪಾಲೆರ್ ಬೊಕ್ಕ ಯಕ್ಷಗಾನ ಪಠ್ಯಪುಸ್ತಕ ಸಮಿತಿದ ಸದಸ್ಯೆರಾಯಿನ ಶ್ರೀ ಪ್ರಕಾಶ ಮೂಡಿತ್ತಾಯೆರ್ ಮಲ್ಲ ಬಿನ್ನೆರಾದ್ ಬರೊಂದುಲ್ಲೆರ್. ಪಂತೊರ್ದು ಬೊಕ್ಕ ಆತಿಥೇಯ ನಿಟ್ಟೆ ಕಾಲೇಜ್‌ದ ವಿದ್ಯಾರ್ಥಿ ಕಲಾವಿದೆರೆರ್ದ್, ವಿಶೇಷ ತೆಂಕುತಿಟ್ಟ್ ಯಕ್ಷಗಾನ ಪ್ರದರ್ಶನ ನಡಪರೆಗುಂಡು.
ಯಕ್ಷಗಾನ ಕಲಾಭಿಮಾನಿಲು, ವಿದ್ಯಾರ್ಥಿಲು ಬೊಕ್ಕ ಸಾರ್ವಜನಿಕೆರ್ ಎಚ್ಚಿಗೆ ಸಂಖ್ಯೆಡ್ ಪಾಲ್‌ಪಡೆದ್ ಕಾರ್ಯಕ್ರಮೊನು ಯಶಸ್ವಿ ಮಲ್ಪೊಡು ಪನ್ದ್ ಆಯೋಜಕೆರ್ ಬಿನ್ನೈತೊಂದೆರ್.