Last updated on February 3rd, 2025 at 02:20 pm
ಕಡಬ: ನಕಲಿ ಫೋನ್ ಪೇ ಗಲಸ್ದ್ ಮಂಗೆ ಮಲ್ತೊಂದಿತ್ತಿನಾಯನ್ ಆಲಂಗಾರ್ದ ಅಂಗಡಿದಕುಲು ಪೊಲೀಸೆರೆಗ್ ಪತ್ತ್ದ್ ಕೊರ್ನ ನಡಕೆ ಆಲಂಗಾರ್ಡ್ ನಡತ್ದ್ಂಡ್. ಸವಣೂರು ಮಾಂತೂರು ನಿವಾಸಿ ಸಮೀರ್(27ವ) ಪನ್ಪಿನ ಜವನೆ ಅಂಗಡಿಲೆಗ್ ಪೋದು ಇಲ್ಲಗ್ ಬೋಡಾಪಿನ ಸಾಮಾನ್ಲೆನ್ ಗೆತೊಂದು, ಎಂಕೊಂತೆ ಕಾಸ್ ಬೋಡು ಅಂಚೆನೇ ಒಟ್ಟು ಅಮೌಂಟ್ ಸೇರ್ದ್ ಪೋನ್ ಪೇ ಮನ್ಪೆ ಪನ್ದ್ ಪನ್ಡ್ದ್ ನಕಲಿ ಪೊನ್ ಪೇ ಡ್ ಸ್ಕ್ಯಾನರ್ಗೆ ಸ್ಕ್ಯಾನ್ ಮಲ್ತ್ದ್ ಕಾಸ್ ಬೈದ್ಂಡ್ ಪನ್ದ್ ನಂಬಾದ್ ತಾನ್ ಕಾಯೆಸ್ ದೀತಿನಾತ್ ಕಾಸ್ ಗೆತೊಂದು ಪೋಪೆದೆ ಪನ್ದ್ ಅಂಗಡಿದಕುಲು ಆರೋಪ ಮಲ್ದೆರ್. ಆಲಂಗಾರ್ ಪೇಂಟೆಡೆ ಕರಿನ ಕೆಲ ದಿನೊರ್ದಿಂಚಿ ಉಂಬ್ಯೆ ಅಂಗಡಿದಕ್ಲೆನ್ ಇಂಚ ಮಂಗೆ ಮಲ್ತೊಂದುಲ್ಲೆ ಪನ್ದ್ ಪನ್ತೆರ್.
ಫೆ.1 ತ ಮಧ್ಯಾಹ್ನದ ಪೊರ್ತುಡು ಆಲಂಗಾರ್ ಬಸ್ ಉಂತಡೆದಲ್ಪ ಒರ್ಯಡ 2ಸಾರ ಪೋನ್ಪೇ ಮನ್ಪೆ ಕ್ಯಾಶ್ ಕೊರ್ಲೆ ಪನ್ದ್ ಕಾಯೆಸ್ ಮಲ್ತಿತ್ತೆ. ವಿಪರ್ಯಾಸ ಪನ್ಡ ಈ ಜನ ಬೇಲೆ ಮನ್ಪುನ ಅಂಗಡಿರ್ದ್ ಸಮೀರ್ ರಡ್ಡ್ ದಿನೊಕು ದುಂಬು ತನ್ನ ಮಂಡೆಕರ್ಚಿಡ್ ಕಾಸ್ ಲಕ್ಕಾದಿತ್ತೆ, ಸಿಸಿ ಕ್ಯಾಮರ ಪರಿಶೀಲಿಪುನಗ ಒವ್ವೇ ಒಲವು ತಿಕ್ಕ್ದಿಜ್ಜಂಡ್. ಆಂಡ ಆಯೆ ತನ್ನ ಕೈಕ್ ಬ್ಯಾಂಡೇಜ್ ಸುತ್ತುದಿತ್ತ್ನೆನ್ ಬೇಲೆದ ಜವನೆ ತೂದಿತ್ತೆ, ಇನಿ ಅವ್ವೇ ಜವನಡ ಕಾಸ್ದ ಕೇಂದಿನೆರ್ದಾವರ ಆಯನ ಸ್ವರ ಬೊಕ್ಕ ಕೈಟುಪ್ಪುನ ಬ್ಯಾಂಡೇಜ್ ತೂದು ಗುರ್ತ ಪತ್ತಿನ ಜವನೆ ತನ್ನ ದನಿನ್ ಮಂಗೆ ಮಲ್ತ್ದ್ ಕಾಸ್ ಪತ್ತಾಯಿನಾಯೆ ಉಂಬ್ಯೆನೇ ಪನ್ದ್ ಗುರ್ತ ಪತ್ತ್ದ್ ಅಪಗನೇ ದನಿಕ್ ಒಲವು ಕೊರ್ತೆ. ಜಾಗೆಡ್ ಜನ ಒಟ್ಟಾದ್ ವಿಚಾರಿಪುನಗ ಉಂಬ್ಯೆ ಆಲಂಗಾರ್, ಕುಂತೂರ್, ನೆಲ್ಯಾಡಿ ಇಂಚ ಪಾಕ ಕಡೆಟ್ ದಗೆ ಮಲ್ದಿನ ತೆರಿದ್ ಬೈದ್ಂಡ್.
ಹೆಲ್ಮೆಟ್ ಪಾಡ್ದ್ ಅಂಗಡಿಲೆಗ್ ಪೊಗ್ಗುನ ಉಂಬ್ಯೆ ಸಿಸಿ ಟಿವಿ ಡ್ ತನ್ನ ಗುರ್ತ ತಿಕ್ಕೆರೆ ಬಲ್ಲಿ ಪನ್ದ್ ಒಲ್ಪಲಾ ಹೆಲ್ಮೆಟ್ ದೆಪ್ಪುಜೆ. ಅತ್ತಂದೆ ತನ್ನ ಟೂವೀಲರ್ದ ನಂಬರ್ ಪ್ಲೇಟ್ನ್ ಅಲಕ್ಕ ತಿರ್ಗದ್ ದೀತೆ. ತನ್ನ ಒಲವು ತಿಕ್ಕೆರೆಬಲ್ಲಿ ಪನ್ದ್ ತನ್ನ ಆಧಾರ್ ಕಾರ್ಡ್ದ ಪುರಪುದ ಭಾಗೊನು ಪರಿತ್ ಪಾಡ್ದೆ ಪನ್ದ್ ಅಲ್ಪದಕುಲು ಒಲವು ಕೊರ್ತೆರ್.
ಆಯನ ಬೈಕ್ಡ್ ಅಮಲ್ ಸೊತ್ತುಲ್ಲಾ ತಿಕ್ಕದ ಪನ್ದ್ ಸ್ಥಳೀಯೆರ್ ಪನ್ತೆರ್. ಅವೆತ ಒಟ್ಟುಗು ಅಮಲ್ ಬರ್ಪುನ ಸಿರಪ್, ಮಾತ್ರೆಲ್ಲಾ ಆಯಡ ಇತ್ತ್ನ್ಡ್ ಪನ್ದ್ ತೆರಿದ್ ಬೈದ್ಂಡ್.
ಸಾರ್ವಜನಿಕೆರೆ ದೂರು ಕೇನ್ದ್ ಅಡೆಗ್ ಬತ್ತಿನ ಪೋಲಿಸೆರ್ ಆರೋಪಿನ್ ಲೆತೊಂದು ಪೋತೆರ್. ಒವ್ವೇ ಪ್ರಕರಣ ದಾಕಲಾತಿಜಿ ಪನ್ದ್ ತೆರಿದ್ ಬೈದ್ಂಡ್.