Last updated on February 25th, 2025 at 02:24 pm
ಕಾಪು ಫೆ. 25: ಮೋಕೆಡ್ ತಾಂಕಿನ ಉಸಾರ್ ಇತ್ತಿನ ನಾಯಿ ಒರರ್ದ್ ಒರಾನೆ ಸೈತಿನೆತ ಪಿರವು ಬರಿತಿಲ್ಲದಕುಲು ಉಲ್ಲೆರ್, ಅಕುಲು ತೆನಸ್‌ಡ್ ವಿಷ ಪಾಡ್ದ್ ನಾಯಿನ್ ಕೆರ್ತೆರ್ ಪನ್ದ್ ಆರೋಪ ಮಲ್ತ್‌ದ್ ನಾಯಿ ತಾಂಕಿನಾರ್ ಒಯಿಲ್ ಕೊರ್ತಿನೆರ್ದಾವರ, ಜಡ್ತೆಗಾದ್ ಕೌಂತಿನ ನಾಯಿದ ಪುನನ್ ಪೊಲೀಸೆರ್ ಒಕ್ಕುದೆರ್. ಕಾಪುದ ಮಣಿಪುರದ ಬಡಗ‌ಇಲ್ಲ್‌ದ ಕೈತಲ್ ಈ ನಡಕೆ ನಡತ್‌ದ್ಂಡ್.
ಸಾಮಾಜಿಕ ಕಾರ್ಯಕರ್ತೆದಿ ಬಿಂದು ಪನ್ಪಿನಾರ್ ನಾಯಿ ಒಂಜೆನ್ ತಾಂಕ್‌ದಿತ್ತೆರ್. ಉಸಾರ್ ಇತ್ತಿನ ನಾಯಿ ಫೆಬ್ರವರಿ 21ತಾನಿ ತನ್ನಾತೆಗೆ ತೀರ್ದ್ಂಡ್. ಇಲ್ಲದಕುಲು ಅವೆನ್ ಕೌಂತ್‌ದ್‌ಲಾ ಇತ್ತೆರ್. ಆಂಡ ನಾಯಿಗ್ ವಿಷ ಪಾಡ್ದ್ ಕೆರ್ತಿನ ಡೌಟ್ ಇತ್ತಿನೆರ್ದಾವರ ಫೆಬ್ರವರಿ 21ತಾನಿಯೇ ಬಿಂದು ಮೇರ್ ಕಾಪು ಪೊಲೀಸೆರೆಡ ಒಯಿಲ್ ಬರೆಪಾದಿತ್ತೆರ್. ಈ ಬಗೆಟ್ ಪ್ರಕರಣ ದಾಕಲ್ತೊಂಡಿನ ಪೊಲೀಸೆರ್, ಜಡ್ತೆಗಾದ್ ಕೌಂತಿನ ನಾಯಿದ ಪುನೊನು ಒಕ್ಕುದು, ಪೋಸ್ಟ್ ಮಾರ್ಟಂ ಮಲ್ಪಾದೆರ್.
ಪ್ರಕರಣ ದಾಕಲಾತಿನೆರ್ದಾವರ ಕಾನೂನು ಪ್ರಕ್ರಿಯೆ, ಬೊಕ್ಕ ವೈದ್ಯಕೀಯ ಪರೀಕ್ಷೆ ಮಲ್ಪೊಡಾದ್ ಬತ್ತ್‌ದ್ಂಡ್. ಹೆಡ್ ಕಾನ್‌ಸ್ಟೇಬಲ್‌ ಆಯಿನ ಅರುಣ್ ಉಪ್ಪಾರ್, ಸುಧಾಕರ್ ನಾಯ್ಕ್, ಪ್ರಾಣಿ ದಯಾ ಸಂಘೊದ ಮಂಜುಳಾ ಸಮಕ್ಷಮೊಡು ನಾಯಿದ ಪೊನೊನು ಗುಂಡಿರ್ದ್ ಮೀತ್ತ್ ದೆತ್ತೆರ್. ಪಶುಬೈದ್ಯೆ ಡಾ.ಚಂದ್ರಕಾಂತ್ ಮೇರ್ ಮರಣೋತ್ತರ ಪರೀಕ್ಷೆ ಮಲ್ತಿತ್ತ್‌ದ್ ವರದಿ ನನ ಬರೊಡಾತೆ. ಪೊಲೀಸರು ಜಡ್ತೆ ಮಲ್ತೊಂದುಲ್ಲೆರ್.