Last updated on February 20th, 2025 at 09:10 am
ಅಪ್ರಾಪ್ತೆದಿ ಪೊಣ್ಣು ಒರ್ತಿ ಸರ್ಕಾರಿ ಆಸ್ಪತ್ರೆಡ್ ಪೆದ್ದ್‌ದಿನ ನಡಕೆ ರಾಜಸ್ಥಾನೊದ ಬಾರಾ ಜಿಲ್ಲೆಡ್ ಬೊಲ್ಪುಗು ಬೈದ್ಂಡ್.
ಈ ಪ್ರಕರಣೊಡು ಬಾರೀ ಸೋದ್ಯದ ಇಸಯ ಪಿದಯಿ ಬೈದ್ಂಡ್, ಅವು ದಾದ ಪನ್ಡ ಬಂಜಿ ಬರ್ಪಾದಿನಾಯೆ ಆ ಪೊಣ್ಣು ಕಲ್ತೊಂದುಪ್ಪುನ ಶಾಲೆಡೇ 10 ನೇ ಕ್ಲಾಸ್ ಕಲ್ತೊಂದುಪ್ಪುನ ಆಣ್. ಆಯೆ ಅಪ್ರಾಪ್ತ ಪೊಣ್ಣನ ಮಿತ್ತ್ ಅತ್ಯಾಚಾರ ಮಲ್ತ್‌ದೆ ಪನ್ದ್ ಆರೋಪ ಕೇನ್ದ್ ಬೈದ್ಂಡ್.
ಈ ಬಗೆಟ್ ಸಂತ್ರಸ್ತೆದಿ ಕೊರ್ತಿನ ಒಯಿಲ್‌ದ ಪ್ರಕಾರ ಆರೋಪಿ, ಅಪ್ರಾಪ್ತ ಆಣನ ಮಿತ್ತ್ ಪ್ರಕರಣ ದಾಕಲ್ತೊಂದು ಜಡ್ತೆ ಸುರು ಮಲ್ದೆರ್.
ಕೆಲ ತಿಂಗೊಲುರ್ದ್ ಇರ್ವೆರ್ಲಾ ಒರಿಯನೊರಿ ಮೋಕೆ ಮಲ್ತೊಂದಿತ್ತೆರ್. ಸಂತ್ರಸ್ತೆದಿನ ಅಪ್ಪೆ ತೀರ್ದಿತ್ತ್‌ದ್ ಆಲೆನ ಅಮ್ಮೆರ್ ಬೇಲೆಡ್ ಬ್ಯುಸಿ ಇಪ್ಪೆದೆರ್. ಅಂಚಾದ್ ಸಂತ್ರಸ್ತೆದಿ ಬಂಜಿನಾಲ್ ಪನ್ಪಿನ ವಿಷಯ ಬೊಲ್ಪುಗು ಬೈದಿಜ್ಜಂಡ್. ಆಲೆಗ್ ಬಂಜಿ ಬೇನೆ ಪನ್ದ್, ಆಸ್ಪತ್ರೆಗ್ ದಾಕಲ್ತ್‌ದಾನಗ ಆಸ್ಪತ್ರೆಡೇ ಬಾಲೆನ್ ಪೆದ್ದ್‌ದಲ್.
ನಡಕೆದ ಬಗೆಟ್ ಒಲವು ತಿಕ್ಕ್‌ದ್ ಪೊಲೀಸೆರ್ ಅಡೆ ಬತ್ತ್‌ದ್ ಜಡ್ತೆ ಸುರು ಮಲ್ದೆರ್. ಆರೋಪಿ ಅಪ್ರಾಪ್ತ ಆಣನ ಮಿತ್ತ್ ಅತ್ಯಾಚಾರ ಬೊಕ್ಕ ಪೋಕ್ಸೋ ಕಾಯ್ದೆದಡಿಟ್ ಒಯಿಲ್ ದಾಕಲ್ತೊಂದೆರ್.