Last updated on February 10th, 2025 at 10:10 am
ಕುಡ್ಲ: ಗೊಬ್ಬೊಂದಿತ್ತಿನ 12 ವರ್ಸ ಪ್ರಾಯೊದ ಆಣನ ಮಿತ್ತ್ ಮಡಲ್ ಬೂರ್ದ್, ಅವೆತ ತುಂಡು ಬೊಕ್ಕ ಆಯನ ಕೆಕ್ಕಿಲ್‌ಡಿತ್ತಿನ ಚೈನ್ ಕೆಕ್ಕಿಲ್‌ಡೆ ಆದ್ ತಿಗಲೆದುಲಯಿ ಪೊಗ್ಗಿನ ನಡಕೆ ಮಡಿಕೇರಿಡ್ ನಡತಿತ್ತ್‌ದ್, ಕುಡ್ಲದ ವೆಸ್ಲಾಕ್ ಆಸ್ಪತ್ರೆಡ್ ಶಸ್ತ್ರಚಿಕಿತ್ಸೆ ಮಲ್ತ್‌ದ್ ಮಡಲ್ ಬೊಕ್ಕ ಚೈನ್‌ನ್ ಪಿದಯಿ ದೆತ್ತ್‌ದೆರ್. ಇತ್ತೆ ಆಣ್ ಆರೋಗ್ಯವಾದುಲ್ಲೆ.
ನಡಕೆ ನಡತಿನೇ ಆಣನ್ ವೆಸ್ಲಾಕ್‌ಗ್ ಲೆತೊಂದು ಬತ್ತಿತ್ತ್‌ದ್, ಬೈದ್ಯೆರ್ ರಡ್ಡ್ ಗಂಟೆ ಶಸ್ತ್ರಚಿಕಿತ್ಸೆ ಮಲ್ತ್‌ದ್ ಆಯನ್ ಬದ್‌ಕಾದೆರ್.
ಪ್ರಕರಣದ ಒಲವು:
ಅಸ್ಸಾಂ ಮೂಲೊದ ಆಣ್ ಕಮಲ್ ಹುಸೇನ್(12)ನ ಅಪ್ಪೆ ಅಮ್ಮೆ ಮಡಿಕೇರಿದ ಒಂಜಿ ಇಲ್ಲಡ್ ಬೇಲೆಗಿತ್ತೆರ್. ಅಕುಲು ಶನಿವಾರ ತೋಟಡ್ ಬೇಲೆ ಮಲ್ತೊಂದುಪ್ಪುನಗ ಅಲ್ಪನೇ ಬರಿಟ್ ಆಣ್ ಗೊಬ್ಬೊಂದಿತ್ತೆ. ಈ ಪೊರ್ತುಡು ಮಡಲ್ ಆಣನ ಮಿತ್ತ್ ಬೂರ್ದ್ಂಡ್. ಐತ ಒಂಜಿ ಭಾಗ ಆಣನ ಕೆಕ್ಕಿಲ್‌ಡೆ ಆದ್ ತಿಗಲೆಗ್ ಪೊಗ್ಗುದುಂಡು. ಈ ಪೊರ್ತುಡು ಆಣನ ಕೆಕ್ಕಿಲ್‌ಡಿತ್ತಿನ ಚೈನ್‌ಲಾ ಮಡಲ್‌ಗ್ ಸುತ್ತ್‌ದ್ ಉಲಯಿ ಸೇರ್ದ್ಂಡ್. ಅಪಗನೇ ಆಯನ್ ಮಡಿಕೇರಿದ ಸರಕಾರಿ ಆಸ್ಪತ್ರೆಗ್ ಲೆತೊಂದು ಪೋತೆರ್. ಎಚ್ತಿನ ಮರ್ದ್‌ದ ಅಗತ್ಯ ಇತ್ತಿನೆರ್ದಾವರ ಕುಡ್ಲಗ್ ಲೆತೊಂದು ಬತ್ತ್‌ದೆರ್.
ಫೆ.8ದಾನಿ ಬಯ್ಯಡ್ ಸುಮಾರ್ 7.30ಕ್ಕ್ ನಡಕೆ ನಡತಿತ್ತ್‌ದ್, ರಾತ್ರೆ 12.15ಕ್ಕ್ ವೆಸ್ಲಾಕ್ ಎತ್ತ್‌ದಿತ್ತೆರ್. ರಾತ್ರೆ 1.30 ರ್ದ್ 3.30 ಮುಟ್ಟ ಡಾ| ಸುರೇಶ್ ಪೈ ಮೆರೆನ ಮುತಾಲಿಕೆಡ್ ಯಶಸ್ವಿ ಶಸ್ತ್ರಚಿಕಿತ್ಸೆ ಮಲ್ದೆರ್. ಇತ್ತೆ ಆಣ್ ಪಾತೆರೊಂದಿತ್ತ್‌ದ್, ಚೇತರಿಕೆ ಆವೊಂದುಲ್ಲೆ.