Last updated on February 7th, 2025 at 05:09 pm
ಪ್ರಯಾಗ್‌ರಾಜ್, ಫೆ.07: ಉತ್ತರ ಪ್ರದೇಶೊದ ಪ್ರಯಾಗ್‌ರಾಜ್‌ಡ್ ನಡತೊಂದುಪ್ಪುನ ಮಹಾ ಕುಂಭಮೇಳಡ್ ಕುಡೊರ ಸೂತ ಅವಘಡ ನಡತಿತ್ತ್‌ದ್, ಹರಿಹರಾನಂದ ಸ್ವಾಮಿಲು ಇತ್ತಿನ ಟೆಂಟ್‌ಗ್ ಸೂ ಬೂರ್ದಿತ್ತ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ಅಗ್ನಿಶಾಮಕ ದಳೊತ ಸಿಬ್ಬಂದಿಲು ಸೂ ತೆಕ್ಕಾಯೆರ ಪಾಕ ಬಙ್ಙ ಬತ್ತೆರ್. ದೇವೆರೆ ದಯೆಟ್ ಒವ್ವೇ ಸಾವು ಬೇನೆ ನಡತ್‌ದಿಜಿ. ಈ ನಡಕೆ ಓಲ್ಡ್ ಜಿಟಿ ರೋಡ್‌ದ ತುಳಸಿ ಛೇದಕ ದಲ್ಪ ಇಪ್ಪುನ ಶಿಬಿರಡ್ ನಡಣ್‌ದ್ಂಡ್ ಪನ್ದ್ ಖಾಕ್ ಚೌಕ್ ಪೊಲೀಸ್ ಸ್ಟೇಶನ್ ಇನ್ಸ್‌ಪೆಕ್ಟರ್ ಯೋಗೇಶ್ ಚತುರ್ವೇದಿ ತೆರಿಪಾದೆರ್.
ಜಾಗೆಗ್ ರಪಕ್ಕ ಅಗ್ನಿಶಾಮಕ ದಳೊತ ಅಧಿಕಾರಿಲು ಬತ್ತ್‌ದ್ ಸೂ ತೆಕ್ಕಾದೆರ್. ಸೂ ಬೂರ್ಯೆರ ನೆವನ ದಾದ ಪನ್ಪಿನೆತ ಬಗೆಟ್ ಜಡ್ತೆ ನಡತೊಂದುಂಡು. ಉಂದೆಕ್ ದುಂಬೇ ರಡ್ಡ್ ಸರ್ತಿ ಸೂ ಬೂರ್ದಿತ್ತ್ಂಡ್. ಆತೇ ಅತ್ತಂದೆ, ಕೆಲ ದಿನೊಕು ದುಂಬು ಕಾರಡಿಕ್ ಬೂರ್ದ್ 40ರ್ದ್‌ಲಾ ಎಚ್ಚ ಜನ ತೀರ್ದಿತ್ತೆರ್.