Last updated on February 9th, 2025 at 09:14 am
ನಡತೊಂದು ಪೋವೊಂದಿತ್ತಿನ ಇರ್ವೆರೆಗ್ ಕಾರ್ ಒಂಜಿ ಎಡ್ತ್‌ದ್, ಡ್ರೈವರ್ ಕಾರ್ ಉಂತಾವಂದೆ ಪದ್ರಾಡಾದಿತ್ತ್‌ದ್, ಇರ್ವೆರೆಗ್ಲಾ ಗಾತಿದ ಗಡಿಕುಲಾದ್, ಒರಿ ಬಾರೀ ಸೀರಿಯಸ್ ಸ್ಥಿತಿಟ್ ಇಪ್ಪುನ ನಡಕೆ ಸುಳ್ಯದ ಕನಕಮಜಲ್ ಗ್ರಾಮೊದ ಸುಣ್ಣಮೂಲೆಡ್ ನಡತ್‌ದ್ಂಡ್.
ಕನಕಮಜಲ್ ಶ್ರೀ ಆತ್ಮಾರಾಮ ಭಜನಾ ಮಂದಿರೊದ ಏಕಾಹ ಭಜನೆ ನಡತೊಂದಿತ್ತ್‌ದ್, ಕೋಡಿದ ಜನಾರ್ದನ ಶೆಟ್ಟಿ ಬೊಕ್ಕ ಆರೆನ ಸಮ್ಮಲೆ ರಾಮ ಶೆಟ್ಟಿ ಮೇರ್ ಏಕಾಹ ಭಜನೆಗ್ ಮುಖ್ಯ ಸಾದಿದ ಬರಿಟೆ ನಡತೊಂದು ಬರೊಂದುಪ್ಪುನಗ ಪುತ್ತೂರುರ್ದ್ ಸುಳ್ಯ ದಂಚಿ ಪೋವೊಂದಿತ್ತಿನ ಕಾರ್ ಒಂಜಿ ಬರಸ್‌ಡ್ ಬತ್ತ್‌ದ್ ಮೊಕಲೆಗಿರ್ವೆರೆಗ್ ಎಡ್ತ್‌ದ್ಂಡ್ ಪನ್ದ್ ಪನೊಂದುಲ್ಲೆರ್.
ಈ ಪೊರ್ತುಡು ರಾಮ ಶೆಟ್ಟಿ ಮೇರ್ ಸಾದಿ ಬರಿಟ್ ಬೂರ್ದಿನೆನ್ ತೂಯಿನ ಅಲ್ಪದಕುಲು ಆರೆನ್ ಅಂಬ್ಯುಲೆನ್ಸ್‌ಡ್ ಸುಳ್ಯದ ಕೆವಿಜಿ ಆಸ್ಪತ್ರೆಗ್ ಲೆತೊಂದು ಪೋತೆರ್.
ಆಂಡ ಕಾರ್ ಜನಾರ್ದನ ಮೆರೆಗ್ಲಾ ಎಡ್ತ್‌ದಿತ್ತ್‌ದ್, ಆರ್ ಸಾದಿರ್ದ್ ಒಂತೆ ದೂರ ದಕ್ಕಿಲೆಕ ಆದ್ ಗಾತಿದ ಗಡಿಕುಲಾದ್ ಮತಿ ತತ್ತ್‌ದ್ ಬೂರ್ದಿತ್ತೆರ್‌ಗೆ. ಉಂದೆನ್ ಏರ್ಲಾ ತೂದಿಜ್ಜಂಡ್.
ಒಂತೆ ಬೊಕ್ಕ, ಮುಟ್ಟದಕುಲು ತೂನಗ ಆರ್ ನೆತ್ತೆರ್ದ ಮಡುಟು ಬೂರ್ದಿನ ತೋಜಿದ್, ಅಲ್ಪದಾರೇ ಆಯಿನ ಜಯಪ್ರಸಾದ್ ಕಾರಿಂಜ ಮೇರ್ ಕಾರ್‌ಡ್ ಸುಳ್ಯದ ಕೆವಿಜಿ ಆಸ್ಪತ್ರೆಗ್ ಲೆತೊಂದು ಪೋತೆರ್. ಅಲ್ಪ ಕಡಿಮರ್ದ್ ಕೊರ್ತೆರ್. ಆಂಡ ಆರೆನ ತರೆಕ್ ಗಾತಿದ ಪೆಟ್ಟ್ ಬೂರ್ದಿನೆರ್ದಾವರ ಆರೆನ್ ಕುಡ್ಲದ ಆಸ್ಪತ್ರೆಗ್ ಅಂಬ್ಯುಲೆನ್ಸ್‌ಡ್ ಲೆತೊಂದು ಪೋತೆರ್.
ಕಾರ್ ಡ್ರೈವರ್ ಇರ್ವೆರೆಗ್ ಎಡ್ತ್‌ದ್ ಗಾಡಿ ಉಂತಾವಂದೆ, ಪದ್ರಾಡಾತಿನ ತೆರಿದ್ ಬೈದ್ಂಡ್.