Last updated on February 19th, 2025 at 10:23 am
ಕುಡ್ಲ: ಫೆಬ್ರವರಿ 22, ಸನಿಯಾರದಾನಿ ಅಂಬೇಡ್ಕರ್ ಭವನೊಡು “ಮಾಯಿದ ಮಹಾಕೂಟ” ನಡಪರೆಗುಂಡು. ತುಳುಭಾಷೆ ಸಂಸ್ಕೃತಿ ಬುಲೆಚ್ಚಿಲ್, ಸಂಪ್ರದಾಯ ನಿಲೆಟ್ ಅಖಿಲ ಭಾರತ ತುಳು ಒಕ್ಕೂಟ (ರಿ.) ತಾಪನೆ ಆತ್ಂಡ್. ದೇಶ-ಪರದೇಶೊಡು ಸುಮಾರ್ 48 ತುಳು ಸೇವಾ ಸಂಘ-ಸಂಸ್ಥೆಲು ಒಕ್ಕೂಟದ ಪದುಕೆರಾದ್ ಅಕುಲಕುಲೆ ಕ್ಷೇತ್ರೊಲೆಡ್ ತುಳು ಭಾಷೆ ಪರಪೋಕುಗು ಸಂಬಂಧಿತಿನ ಕಾರ್ಯಕ್ರಮ/ಸಮ್ಮೇಳನ ಸಮಾರಂಭ ನಿರಂತರವಾದ್ ನಡಪಾದ್ ತುಳುಭಾಷೆದ ಮಾನಾದಿಗೆದಂಚಿ ಗೇನ ಒಯ್ತೊಂದುಲ್ಲೆರ್ ಪನ್ದ್ ನವನೀತ್ ಶೆಟ್ಟಿ ಕದ್ರಿ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.
ಕರಿನ ವರ್ಸ ಅಗಸ್ಟ್ 24ತಾನಿ ಒಕ್ಕೂಟದ ಕಡೆರ್ದ್ “ತುಳುನಾಡ ಜಾನಪದ ಉಚ್ಚಯ 2024” ಕಾರ್ಯಕ್ರಮೊನು ತುಳುವೆರೆ ದಿಬ್ಬಣ, ಪೆರ್ಮೆದ ತುಳುವೆ ಪ್ರಶಸ್ತಿ, ಗಿಡ್ಡೆರು ಮಾನಾದಿಗೆ, ಅಕಾಡೆಮಿಲೆನ ಸಾಂಸ್ಕೃತಿಕ ಪ್ರದರ್ಶನದೊಟ್ಟುಗು ಪಾಕ ಗಣ್ಯೆರೆ ಒತ್ತುಪಾಲ್‌ಡ್ ಬಾರೀ ಗೌಜಿಡ್ ನಡತಿತ್ತ್ಂಡ್ ಪನ್ದ್ ಪನ್ಡೆರ್.
ಸಂಘಟನೆನ್ ಗಟ್ಟಿ ಮನ್ಪುನ ದಿಟ್ಟಿಡ್ ಫೆಬ್ರವರಿ 22, ಸನಿಯಾರದಾನಿ ಮದ್ಯಾನ 3.30ರ್ದ್ ಅಂಬೇಡ್ಕರ್ ಭವನ ಉರ್ವಾಸ್ಟೋರ್‌‌ಡ್ ನಡಪುನ “ಮಾಯಿದ ಮಹಾಕೂಟ” ಸಮಾರಂಭೊನು ಪೂಜ್ಯೆರಾಯಿನ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿ, ಗುರುದೇವದತ್ತ ಸಂಸ್ಥಾನ ಶ್ರೀ ದತ್ತಾಂಜನೇಯ ಕ್ಷೇತ್ರ ಒಡಿಯೂರ್ ಮೇರ್ ಉದಿಪನ ಮಲ್ತ್‌ದ್, ಆಶೀರ್ವಚನ ಕೊರ್ಯೆರ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಸನ್ಮಾನ್ಯ ಯು.ಟಿ.ಖಾದರ್, ಸಭಾಪತಿಲು ಕರ್ನಾಟಕ ಸರಕಾರ ಬೊಕ್ಕ ಡಾ ॥ ಡೇವಿಡ್ ಫ್ರಾಂಕ್ ಫೆರ್ನಾಂಡಿಸ್, ಲೆಫ್ಟಿನೆಂಟ್ ಜನರಲ್ ಅಂಬಾಸಿಡರ್, ಉದ್ಯಮಿ, ಸಮಾಜ ಸೇವಕೆ, ವಾಗ್ಮಿ, ತ್ರಿಭಾಷಾ ಚಿತ್ರ ನಿರ್ಮಾಪಕೆ ಅಂಚೆನೇ ಆರೆನ ಬೊಡೆದಿ ಶ್ರೀಮತಿ ಆಲೀಸ್ (ಕೊರೆಯಾ) ಫೆರ್ನಾಂಡಿಸ್ ಮೊಕುಲು ಪಾಲ್‌ಪಡೆಪೆರ್. ಸಮಾರಂಭೊದ ಗುರ್ಕಾರ್ಮೆನ್ ಒಕ್ಕೂಟೊದ ಗುರ್ಕಾರೆ ಶ್ರೀ ಎ.ಸಿ. ಭಂಡಾರಿ ಮೇರ್ ವಯಿತೊನುವೆರ್ ಪನ್ದ್ ತೆರಿಪಾದೆರ್.
ತಮ್ಮನ ಬಲ್ಮನ : ಸಭಾ ಕಾರ್ಯಕ್ರಮೊಡು ಒಕ್ಕೂಟೊದ ಪದುಕ ಕೂಟೊಲೆಡ್ ತುಳು ಭಾಷೆ ಸಂಸ್ಕೃತಿಗ್ ಪುನೆದಿನ ಅಡೂರ್ ಉಮೇಶ್ ನ್ಯಾಕ್- ಪೆರಿಯ ನ್ಯಾಯವಾದಿ, ಕಾಸ್ರೋಡ್, ಶ್ರೀ ಜಯಶೆಟ್ಟಿ- ಮಾಜಿ ಕಾರ್ಪೋರೇಟರ್ ಪೂಣೆ, ಶ್ರೀ ಯು.ಜಿ. ದೇವಾಡಿಗ- ತುಳು ಸಂಘಟಕೆರ್ ಒಡಿಪು, ಶ್ರೀ ಕೆ. ಸೇಸಪ್ಪ ರೈ- ನಿವೃತ್ತ ದೈಹಿಕ ಶಿಕ್ಷಣ ಶಿಕ್ಷಕೆರು ರಾಮಕುಂಜ, ಶ್ರೀ ಕೆ.ಎಚ್. ದಾಸಪ್ಪ ರೈ- ಪೆರಿಯ ಯಕ್ಷಗಾನ ಕಲಾವಿದೆರ್ ಪುತ್ತೂರು ಮೊಕಲೆನ್ ‘ಪೆರ್ಮೆದ ಸಾಧಕೆರ್’ ಪನ್ದ್ ಸನ್ಮಾನಿಪೆರ ಉಂಡು ಪನ್ದ್ ಪನ್ಡೆರ್.
ಸಾಂಸ್ಕೃತಿಕ ಕಾರ್ಯಕ್ರಮ: ಬಯ್ಯ 4.00ರ್ದ್ 5.00 ಮುಟ್ಟ ಶ್ರೀ ದಿನೇಶ್ ಕೊಡಪದವು ಬೊಕ್ಕ ಆರೆನ ಕೂಟರ್ದ್ “ಯಕ್ಷತೆಲಿಕೆ” ಸಾಂಸ್ಕೃತಿಕ ಕಾರ್ಯಕ್ರಮ ನಡಪುಂಡು. ಪತ್ರಿಕಾಗೋಷ್ಠಿಡ್ ಅಧ್ಯಕ್ಷೆರಾಯಿನ ಎ.ಸಿ. ಭಂಡಾರಿ, ಉಪಾಧ್ಯಕ್ಷೆರ್ ಇಂದ್ರಾಳಿ ಜಯಕರ ಶೆಟ್ಟಿ ಬೊಕ್ಕ ಯೋಗೀಶ್ ಶೆಟ್ಟಿ ಜೆಪ್ಪು, ಪ್ರಧಾನ ಕಾರ್ಯದರ್ಶಿ ಪಿ.ಎ. ಪೂಜಾರಿ, ಕೋಶಾಧಿಕಾರಿ ಶ್ರೀಮತಿ ವಿಜಯಲಕ್ಷ್ಮಿ ಬಿ.ಕೆಟ್ಟ, ಸಮಾರಂಭೊದ ಪ್ರಧಾನ ಸಂಚಾಲಕೆ ಕದ್ರಿ ನವನೀತ್ ಶೆಟ್ಟಿ, ಒಕ್ಕೂಟೊದ ಮಾಧ್ಯಮ ವಕ್ತಾರೆ ಮುಲ್ಕಿ ಕರುಣಾಕರ ಶೆಟ್ಟಿ ಇತ್ತೆರ್.