Last updated on February 16th, 2025 at 09:25 am
ಕುಡ್ಲ ಫೆಬ್ರವರಿ 16: ಕುಡ್ಲಡ್ ಬಿಜೆಪಿ ಬೊಕ್ಕ ಕಾಂಗ್ರೇಸ್ ನಡುಟು ಕ್ರೆಡಿಟ್ ಪಾಲಿಟಿಕ್ಸ್ ಜೋರಾತ್ಂಡ್. ಉಂದೆಕ್ ಉದಾರ್ಮೆ ಆದ್ ಪ್ರಾಥಮಿಕ ಆರೋಗ್ಯ ಕೇಂದ್ರಗ್ ರಡ್ಡ್ ರಡ್ಡ್ ಸರ್ತಿ ಉದಿಪನದ ಲೇಸ್ ನಡತ್‌ದ್ಂಡ್. ಜಪ್ಪುದಮೊಗೇರ್‌ದ ಪೊಸ ಆರೋಗ್ಯ ಕೇಂದ್ರೊನು ಆರೋಗ್ಯ ಬೊಕ್ಕ ಜಿಲ್ಲಾ ಉಸ್ತುವಾರಿ ಸಚಿವೆ ದಿನೇಶ್ ಗುಂಡೂರಾವ್ ಕುಡ ಉದ್ಘಾಟನೆ ಮಲ್ದೆರ್.
ಮಂಗಳಾದೇವಿ ವಾರ್ಡ್‌ ಜಪ್ಪು ಮೈನ್‌ರೋಡ್‌ಡ್ ರಿನೋವೇಟ್ ಮಲ್ದಿನ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರ ಕಟ್ವಾನೊಗು ಒಂಜಿ ವಾರೊದುಲಯಿ ರಡ್ಡನೇ ಸರ್ತಿ ಉದಿಪನೆದ ಭಾಗ್ಯ ತಿಕ್ಕ್‌ದ್ಂಡ್. ಆರೋಗ್ಯ ಕೇಂದ್ರ ಇತ್ತಿನ ಜಾಗೆಡ್ ಸ್ಮಾರ್ಟ್ ಸಿಟಿ ಯೋಜನೆದಡಿಟ್ ಮಹಾನಗರ ಪಾಲಿಕೆ ₹ 7.85 ಕೋಟಿ ಕರ್ಚಿಡ್ ಆರೋಗ್ಯ ಕೇಂದ್ರ, ಪಶು ಆಸ್ಪತ್ರೆ, ಪಾಲಿಕೆ ಸಿಬ್ಬಂದಿಲೆನ ವಸತಿಗೃಹ, ಬಸ್ ಬೇ ಬೊಕ್ಕ ವಾಕಿಂಗ್ ಪಾಥ್ ಕಟ್ಟಾದಿತ್ತ್ಂಡ್.
ಫೆಬ್ರವರಿ 9ದಾನಿ ಐತಾರ ತೆನ್ಕಾಯಿ ಕುಡ್ಲ ಶಾಸಕೆ ವೇದವ್ಯಾಸ ಕಾಮತ್, ಮೇಯರ್ ಮನೋಜ್ ಬೊಕ್ಕ ಸಂಸದೆ ಬ್ರಿಜೇಶ್ ಚೌಟೆರೆರ್ದ್ ಉದಿಪನ ಆದಿತ್ತ್ಂಡ್. ಉದಿಪನ ಲೇಸ್ ಶಿಷ್ಟಾಚಾರೊದ ಪ್ರಕಾರ ಆತಿಜಿ ಪನ್ದ್ ಆರೋಪಿತ್‌ದ್ ಸಂಬಂಧಿತಿನ ಅಧಿಕಾರಿಲೆನ ಮಿತ್ತ್ ಕ್ರಮ ಗೆತೊನರ ಸಚಿವೆ ದಿನೇಶ್ ಗುಂಡೂರಾವ್ ಮುಖ್ಯ ಕಾರ್ಯಂತೆರೆಗ್ ಗುರುವಾರ ಸೂಚನೆ ಕೊರ್ದಿತ್ತೆರ್. ಜಿಲ್ಲಾಧಿಕಾರಿಲೆಗ್ಲಾ ಒಲವು ಕೊರಂದೆ ಬಿಜೆಪಿದಕ್ಲು ಉದ್ಘಾಟನೆ ಮಲ್ದೆರ್ ಪನ್ದ್ ಆರೋಪ ಕೇನ್ದ್ ಬತ್ತಿತ್ತ್ಂಡ್. ಆಂಡ ಶಿಷ್ಟಾಚಾರೊದ ನೆವನ ಕೊರ್ದು ನಾಲೇ ದಿನೊಟು ಪ್ರಾಥಮಿಕ ಆರೋಗ್ಯ ಕೇಂದ್ರ, ಪಶು ವೈದ್ಯಕೀಯ ಆಸ್ಪತ್ರೆಗ್ ಬೀಗ ಪಾಡ್ದಿತ್ತೆರ್.
ಇತ್ತೆ ಕುಡ ಜಿಲ್ಲಾ ಉಸ್ತುವಾರಿ ಸಚಿವೆ ದಿನೇಶ್ ಗುಂಡೂರಾವ್ ಆರೋಗ್ಯ ಕೇಂದ್ರೊದ ಉದಿಪನ ಮಲ್ದೆರ್. ಉದಿಪನ ಲೇಸ್‌ಡ್ ಪಾತೆರ್ನ ಸಚಿವೆ ಗುಂಡೂರಾವ್, ಸೀದಾ ಶಾಸಕೆ ವೇದವ್ಯಾಸ ಕಾಮತ್‌ರೆನ ಮಿತ್ತ್ ಬೆಚ್ಚಡ್ ಪಾತೆರ್ಯೆರ್. ಮೊಕುಲು ಚೀಪ್ ರಾಜಕೀಯ ಮಲ್ತೊಂದುಲ್ಲೆರ್. ಎಂಕುಲು ಮಾತೆರೆನ್ಲಾ ಲೆತ್ತ್‌ದ್ ಬೆಂಗಳೂರ್‌ಡ್ ಇನ್ವೆಸ್ಟ್ ಕರ್ನಾಟಕ ಮಲ್ತೊಂದಿಜ್ಜೊನಾ.. ಬುಲೆಚ್ಚಿಲ್ ವಿಚಾರೊಡು ಇಂಚ ಕುರ್ತೆಲ್ ರಾಜಕೀಯ ಮಲ್ಪುನಾ.. ಮೊಕುಲು ತನ್ಕುಲೆ ಕಾಸ್‌ಡ್ ಮಲ್ದಿನ ಅತ್ತ್, ಮೊಕುಲ್ನನೇ ಕಾಸ್, ಜಾಗೆ ಆತುಂಡ ಕೇನೆದಿಜಿ. ಯಾನ್ ದಾಲ ವರ್ಸೊಗೊರ ಬರ್ಪಿನ ಉಸ್ತುವಾರಿ ಅತ್ತ್, ತಿಂಗೊಲ್ಡ್ 2-3 ಸರ್ತಿ ಕುಡ್ಲಗ್ ಬರ್ಪೆ. ಒಂಜಿ ಫೋನ್ ಮಲ್ತ್‌ದೊಲಿ ಅತಾ.. ಶಾಸಕೆರೆ ನಡಕೆರ್ದ್ ಪೊಕ್ಕಡೆ ಆತ್ಂಡ್ ಪನ್ದ್ ಪನ್ಡೆರ್.