Last updated on February 24th, 2025 at 06:42 pm
ಕುಡ್ಲ: ಜಿಲ್ಲಾ ಕರ್ಪಿಲ್ಲ್‌ದ ಉಲಯಿ ಅಕ್ರಮೊಲು ಪಡತೋಂದುಲ್ಲ ಪನ್ದ್ ಪೊಲೀಸೆರ್ ಪಾಕ ಸರ್ತಿ ದಾಳಿ ಮಲ್ತ್‌ದೆರ್. ದಾಳಿದ ಪೊರ್ತುಡು ಮೊಬೈಲ್ ಫೋನ್, ಸಿಗರೇಟ್, ಗುಟ್ಕಾ ಬೊಕ್ಕ ಗೂ ಗಾಂಜಾನ್ಲಾ ಪೊಲೀಸೆರ್ ವಶೊಕು ಗೆತೊಂದೆರ್. ಕರ್ಪಿಲ್ಲ ಸಿಬ್ಬಂದಿಲೆ ಕಣ್ಣ್ ತಪ್ಪಾದ್ ಉಂದು ಉಲಯಿ ಎಂಚ ಸೇರೊಂದುಂಡು ಪನ್ಪಿನ ಕೇನ್ಪುಗು ಇತ್ತೆ ಸದು ತಿಕ್ಕ್‌ದ್ಂಡ್.
ಸ್ಕೂಟರ್‌ಡ್ ಬತ್ತಿನ ಇರ್ವೆರ್ ಜವನೆರ್ ಪಟ್ಟಪಗೆಲ್‌ಡೇ ಪರ ಕರ್ಪಿಲ್ಲ ಸುತ್ತುಮದೆಲ್‌ದುಲಯಿ ಪ್ಯಾಕೆಟ್ ದಕ್ಕ್‌ದ್ ಪದ್ರಾಡಾಪಿನ ದೃಶ್ಯ ಕ್ಯಾಮೆರಾಡ್ ಕೈದಾತ್ಂಡ್. ಈ ದೃಶ್ಯ ಕುಡ್ಲರ ಮಾಜಿ ಮೇಯರ್ ಕವಿತಾ ಸನಿಲ್ ಮೆರೆನ ಕಾರ್‌ದ ಡ್ಯಾಶ್‌ಕ್ಯಾಮ್‌ಡ್ ಕೈದಾದಿತ್ತ್‌ದ್, ನಡಕೆನ್ ಪೊಲೀಸೆರೆ ಗುಮನೊಗು ಕನತ್‌ದೆರ್.
ಪಿವಿಎಸ್‌ಡೆ ಆದ್ ಜೈಲ್ ರೋಡ್‌ಡ್ ಕವಿತಾ ಸನಿಲ್ ಪೊವೊಂದುಪ್ಪುನ ಪೊರ್ತುಡು ಈ ದೃಶ್ಯ ಆರೆನ ಕಾರ್‌ದ ಎದುರುದ ಡ್ಯಾಶ್ ಕ್ಯಾಮೆರಾಡ್ ಕೈದಾತ್ಂಡ್. ಉಂದು ಗಾಂಜಾ ಆದುಪ್ಪು ಪನ್ಪಿನ ಸಂಶಯ ಇತ್ತ್‌ದ್, ಈ ಬಗೆಟ್ ಜಡ್ತೆ ಮನ್ಪೆರೆ ಪೊಲೀಸೆರೆನ್ ಒತ್ತಾಯ ಮಲ್ದೆರ್.