Last updated on February 17th, 2025 at 02:21 pm
ಬೆದ್ರ: ಇಲ್ಲಡ್ ಪೊಣ್ಣು ಒರ್ತಿ, ಒರ್ತಿಯೇ ಇತ್ತಿನ ಪೊರ್ತುಡು ಮೋನೆಗ್ ಕುಂಟು ಮುಚೊಂದು ಪೊಗ್ಗುದು, ಮೂಜರೆ ಲಕ್ಷ ರೂ. ಕಾಸ್ ಬೊಕ್ಕ ಸುಮಾರ್ 20 ಪವನ್ ತೂಕೊದ ಪದ್ದೈ ಬಂಗಾರ್‌ನ್ ಕಂಡ್‌ದಿನ ಪ್ರಕರಣ ತಾಲೂಕ್‌ದ ಅಳಿಯೂರ್‌ದ ನೇಲಡೆಡ್ ಉಪ್ಪುನ ಪಾಕಶಾಸ್ತ್ರಜ್ಞೆ ಪ್ರಶಾಂತ್ ಜೈನ್ ಮೆರೆನ ಇಲ್ಲಡ್ ಐತಾರ ನಡತ್‌ದ್ಂಡ್.
ಪ್ರಶಾಂತ್ ಜೈನ್ ಬೊಕ್ಕ ಆರೆನ ಮಗೆ ಮುಲ್ಕಿಗ್ ಅಟಿಲ್‌ದ ಬೇಲೆಗ್ ಪೋದಿತ್ತೆರ್. ಇಲ್ಲದ ಎಜಮಾನ್ದಿ ಶಿರ್ತಾಡಿಗ್ ಪೋದಿತ್ತ್‌ದ್, ಇಲ್ಲಡ್ ಮಗಲ್ ಮಾತ್ರ ಇತ್ತಿನಪಗ ಕಲ್ವೆರ್ ಈ ಬೇಲೆ ಮಲ್ದೆರ್. ಕಲ್ವೆರ್ ಪ್ರಶಾಂತೆರ್ನ ಮಗಲೆನ ಬಾಯಿನ್ ಒತ್ತುದು ಪತ್ತ್‌ದ್, ಮತಿ ತಪ್ಪಾವುನ ಮರ್ದ್ ಸ್ಪ್ರೇ ಮಲ್ತ್‌ದ್ ಆಲ್ ಮತಿ ತತ್ತಿನೇ ಬಂಗಾರ್ ಪತೊಂದು ಪದ್ರಾಡಾತೆರ್ ಪನ್ದ್ ಪನ್ತೆರ್.
ಕಾಂಡೆ ಸುಮಾರ್ 10.30ತ ಅಂದಾಜಿಗ್ ಈ ನಡಕೆ ನಡತಿತ್ತ್‌ದ್, 2 ಗಂಟೆ ಕರಿದ್ ಬರಿತಿಲ್ಲದ ಪೊಂಜೊವು ಬತ್ತಿತ್ತ್‌ದ್, ಆತನಗ ಲಕ್ಕಿನ ಪೊಣ್ಣು, ಪೊಂಜೊವುಡ ನಡತಿ ನಡಕೆದ ಬಗೆಟ್ ವಿವರಿತ್‌ದೆರ್ ಪನ್ದ್ ಪನ್ತೆರ್.
ಜಾಗೆಗ್ ಪಣಂಬೂರು ಎಸಿಪಿ ಶ್ರೀಕಾಂತ್, ಬೆದ್ರ ಸರ್ಕಲ್ ಇನ್ಸ್ಪೆಕ್ಟರ್ ಸಂದೇಶ್ ಪಿ.ಜಿ. ಬತ್ತ್‌ದ್ ಪ್ರಕರಣ ದಾಕಲ್ತೊಂದೆರ್. ಶ್ವಾನದಳ, ಫೊರೆನ್ಸಿಕ್ ವಿಭಾಗೊದಕುಲ್ಲಾ ಬತ್ತ್‌ದೆರ್. ಇಲ್ಲದಕುಲು ಪೋಪಿನ ಬರ್ಪಿನ ತೆರಿದಿತ್ತಿನ ಗುರ್ತದಕುಲೇ ಈ ಬೇಲೆ ಮಲ್ದುಪ್ಪೆರ್ ಪನ್ದ್ ಜನ ಪಾತೆರೊಂದುಲ್ಲೆರ್.