ಕುಡ್ಲದ ಮಹಾನಗರ ಪಾಲಿಕೆಡ್ ನನ ಮೆನ್ಕುಂಡು ತುಳು ಲಿಪಿ..!

Last updated on February 24th, 2025 at 12:26 pm

ಕುಡ್ಲದ ಮೇಯರ್ ಮನೋಜ್ ಕುಮಾರ್ ಮೆರೆನ ಮುತಾಲಿಕೆಡ್ ಮಹಾನಗರ ಪಾಲಿಕೆದ ಕಟ್ವಾನೊಗು ತುಳು ಲಿಪಿತ ಪುದರ್ ಪಲವೆ ಪಾಡ್ದಿತ್ತ್‌ದ್, ಅವೆತ ಲೋಕಾರ್ಪಣೆದ ಕಾರ್ಯಕ್ರಮ ಇನಿ ಫೆಬ್ರವರಿ 24ತಾನಿ ಬಯ್ಯಡ್ 5:30 ಕ್ಕ್ ಮಹಾನಗರ ಪಾಲಿಕೆದಲ್ಪ ತುಳು ಸಂಘಟನೆಲೆನ ಒಟ್ಟು ಸೇರಿಗೆಡ್ ನಡಪರೆಗುಂಡು.

ಈ ಪುದರ್ ಪಲವೆ ಪಾಡ್ಪಾವುನ ಕಜ್ಜೊದ ಬೆರಿಪತ್ತ್‌ದ್ ಸಾಮಾಜಿಕ ಕಾರ್ಯಕರ್ತೆ, ತುಳು ಪೊರ್ಮ್ಬಾಟಗಾರೆ ರೋಶನ್ ರೆನೋಲ್ಡ್ ಬೆನ್ತೆರ್. ಅಂಚೆನೇ ಈ ಪಲವೆಗ್ ಬೋಡಾಪಿನ ಪಿಎನ್‌ಜಿ ಪೃಥ್ವಿ ತುಲುವೆ ಮೇರ್ ಕೊರ್ತೆರ್.

ಕುಡ್ಲ ಪೇಂಟೆದ ನಡುಟು ನಮ್ಮ ಅಪ್ಪೆಬಾಸೆನ್ ಬರೆಯೆರ ಸಾರ ವರ್ಸೊಗು ದುಂಬುರ್ದೇ ಗಲಸೊಂದಿತ್ತಿನ ತುಳುಲಿಪಿತ ಮಲ್ಲ ಪಲವೆ ಮೆನ್ಕೆರೆ ನೆವನ ಆಯಿನ, ಅಂಚೆನೇ ನನಲಾತ್ ಸಂಸ್ಥೆಲು ತುಳು ಲಿಪಿ ಗಲಸೆರೆ ಉಮೇದ್ ದಿಂಜಾವುನ ಈ ಪಲವೆನ್ ಪಾಡ್ಪಾಯೆರ ಸಹಕಾರ ಕೊರ್ತಿನ ಮೇಯರ್ ಮನೋಜ್ ಕುಮಾರ್ ಮೆರೆಗ್ ತುಳುಸಮಾಚಾರದ ಪರವಾದ್ ಸೊಲ್ಮೆಲು.