Last updated on February 13th, 2025 at 10:18 am
ಕುಡ್ಲ: ನಂದಿನಿ ಡೈರಿ ಉತ್ಪನ್ನೊಲೆನ್ ಕೊನೊಪುನ ಗಾಡಿ ಬೊಕ್ಕ ಲಾರಿ ಎಡ್ತೊಂದು ನಂದಿನಿ ಡೈರಿ ಗಾಡಿದ ಕ್ಯಾಬಿನ್‌ಡ್ ಕಾರ್ ತಿಕಲೊಂದು ಬಾಕಿಯಾದಿತ್ತಿನ ಡ್ರೈವರ್ನ ರಕ್ಷಣೆಗ್ ಸ್ಪೀಕರ್ ಖಾದರ್ ಬತ್ತ್‌ದ್ ರಕ್ಷಣಾ ಬೇಲೆಡ್ ಕೈಗೋಡ್ಯಾದ್ ಮಾನವೀಯತೆ ತೋಜಾದೆರ್.
ಮಧ್ಯಾಹ್ನ 2 ಗಂಟೆದ ಅಂದಾಜಿಗ್ ಅಡ್ಯಾರ್ ಕಣ್ಣೂರ್‌ಡ್ ನಂದಿನಿ ಡೈರಿ ಉತ್ಪನ್ನೊಲೆನ್ ಕೊನೊಪುನ ಗಾಡಿ ಡಿವೈಡರ್ ಲಾಗಿದ್ ಎದುರುರ್ದ್ ಪೋವೊಂದಿತ್ತಿನ ಲಾರಿಗ್ ಎಡ್ತ್‌ದ್ ಉಂತುದುಂಡು. ಎಡ್ತೆದ ಬರಸ್‌ಗ್ ಗಾಡಿದ ಎದುರು ಮೆಯಿ ಅಲಕ್ಕ ಞಕ್ಕೆ ಆದ್ ಡ್ರೈವರ್ನ ಕಾರ್ ಅವೆತಡಿಟ್ ತಿಕ್ಕ್‌ದ್ ಬೂರ್ದಿತ್ತ್ಂತ್. ಈ ಮಾರ್ಗೊಡೆ ಆದ್ ಬಂಟ್ವಾಳದಂಚಿ ಪೋವೊಂದಿತ್ತಿನ ಸ್ಪೀಕರ್ ಯು. ಟಿ. ಖಾದರ್ ತನ್ನ ಕಾರ್ ಉಂತಾದ್ ಎಡ್ತೆದ ಜಾಗೆಗ್ ಬೈದೆರ್.
ಡ್ರೈವರ್ನ ಕಾರ್ ಗಾಡಿದುಲಯಿ ತಿಕಲೊಂದಿನೆನ್ ತೂಯಿನ ಆರ್, ಞಕ್ಕೆ ಆತಿನ ಗಾಡಿದ ಎದುರು ಮೆಯಿನ್ ಅಲ್ಪ ಸೇರ್ದಿತ್ತಿನ ಸಾರ್ವಜನಿಕೆರೆ ಸಕಾಯೊಡು ಒಯ್ತ್‌ದೆರ್. ಈ ಪೊರ್ತುಡು ಗಾಡಿದುಲಯಿರ್ದ್ ಕಾರ್‌ನ್ ಸುರಕ್ಷಿತವಾದ್ ಪಿದಯಿ ದೆತ್ತ್‌ದ್, ಡ್ರೈವರ್ ಅಪಾಯೊರ್ದು ಬಚಾವಾತೆರ್. ಕಿಞ್ಞ ಕಿಞ್ಞ ಗಡಿಕುಲಾತಿನ ಡ್ರೈವರ್‌ನ್ ಆಸ್ಪತ್ರೆಗ್ ದಾಕಲ್ತ್‌ದೆರ್.