Last updated on February 26th, 2025 at 12:29 pm
ಕುಡ್ಲ, ಫೆ. 26: ಸೈಬ‌ರ್ ದಗೆ ಪ್ರಕರಣೊದ ಆರೋಪಿಲೆ ಒಟ್ಟುಗು ತಿರ್ಗೊಂದು ಅಕ್ಲೆನ ಒಟ್ಟುಗು ಸೆಲ್ಫಿ ಗೆತೊಂದಿನ ಪ್ರಕರಣೊಗು ಸಂಬಂಧಿತ್‌ದ್ ಇತ್ತೆ ಉರ್ವ ಸ್ಟೇಶನ್‌ದ ಪೊಲೀಸ್ ಹೆಡ್ ಕಾನ್‌ಸ್ಟೇಬಲ್ ಪೀಟರ್ ಡಿಸೋಜ ಮೆರೆನ್ ಸಸ್ಪೆಂಡ್ ಮಲ್ತ್‌ದ್ ಪೊಲೀಸ್ ಕಮಿಷನರ್ ಅನುಪಮ್ ಅಗ್ರವಾಲ್ ಆದೇಶ ಕೊರ್ತೆರ್. ಆತೇ ಅತ್ತಂದೆ ಈ ನಡಕೆಗ್ ಸಂಬಂಧಿತ್‌ದ್ ಉರ್ವ ಸ್ಟೇಶನ್‌ದ ಇನ್ಸ್ಪೆಕ್ಟರ್ (ಭಾರತಿ) ಮೆರೆನ ಮಿತ್ತ್ ಇಲಾಖೆದ ಶಿಸ್ತ್ ಕ್ರಮ ಗೆತೊಂದೆರ್.
ಅಮೆಜಾನ್ ಕಂಪನಿಗ್ ದಗೆ ಮಲ್ದಿನ ಪ್ರಕರಣೊಡು ಆರೋಪಿಲೆನ್ ಕಸ್ಟಡಿಗ್ ಗೆತೊಂದಿನ ಪೊರ್ತುಡು ಪೊಲೀಸೆರ್ ರಾಜಸ್ಥಾನೊಗು ಪೋದುಪ್ಪುನಗ ಸೆಲ್ಪಿ ಗೆತೊಂದೆರ್. ಪ್ರಕರಣೊದ ಜಡ್ತೆದ ಜಬದ್ದರಿ ಉರ್ವ ಇನ್ಸ್ಪೆಕ್ಟರ್ ಗೆತೊಂದಿತ್ತೆರ್. ಈ ಪೊರ್ತುಡು, ಬೆಂಗಳೂರು ಏರ್‌ಪೋರ್ಟ್‌ರ್ದ್ ರಾಜಸ್ಥಾನೊದ ಜೈಪುರಗ್ ಬೇತೆ ಸಿಬ್ಬಂದಿಲೆ ಒಟ್ಟುಗು ವಿಮಾನೊಡು ಪೋದಿತ್ತೆರ್.
ಈ ಪೊರ್ತುಡು ಪೊಲೀಸೆರ್ ಆರೋಪಿಲೆ ಒಟ್ಟುಗು ಚಙ್ಗಾಯಿ ಬುಲೆಪಾವೊಂದು ರಾಜಸ್ಥಾನೊದ ಟೂರಿಸ್ಟ್ ಜಾಗೆಲೆನ್ ಸುತ್ತಿನ ಫೋಟೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆದಿತ್ತ್ಂಡ್. ಆರೋಪಿ ರಾಜಕುಮಾರ್ ಮೀನಾ ಮೊಬೈಲ್ ಪತೊಂದು ತಾನೇ ಪೊಲೀಸೆರೊಟ್ಟೂಗು ಸೆಲ್ಪಿ ಗೆತೊಂದಿನ ಫೋಟೋಲು ಉಲ್ಲ. ಕುಡೊಂಜಿ ಫೋಟೋಡು ಪೊಲೀಸ್ ಸಿಬ್ಬಂದಿಯೇ ಆರೋಪಿನ ಪುಗೆಲ್‌ಗ್ ಕೈಪಾಡ್ದಿನ ಲೆಕಂದಿನ ಪೋಸ್ ಉಂಡು. ಸೈಬ‌ರ್ ದಗೆ ಪ್ರಕರಣೊದ ಆರೋಪಿಲೆ ಒಟ್ಟುಗು ತಿರ್ಗೆರೆ ಪೋದು ಪೊಲೀಸೆರ್ ಸೆಲ್ಪಿ ಗೆತೊಂದಿನ ಪ್ರಕರಣೊನು ಗಾತಿಡ್ ಗೆತೊಂದಿನ ಕುಡ್ಲ ಪೊಲೀಸ್ ಕಮಿಷನರ್ ಅನುಪಮ್ ಅಗರ್ವಾಲ್, ನಡಕೆಗ್ ಸಂಬಂಧಿತ್‌ದ್ ಉರ್ವ ಸ್ಟೇಶ‌ದನ್ ಹೆಡ್ ಕಾನ್‌ಸ್ಟೇಬಲ್ ಪೀಟರ್ ಡಿಸೋಜ ಮೆರೆನ್ ಸಸ್ಪೆಂಡ್ ಮಲ್ತ್ ಆದೇಶ ಕೊರ್ತೆರ್. ಒಟ್ಟುಗು, ಪ್ರಕರಣೊಡು ಗೋಸ್ಮರಿ ಮಲ್ತಿನ ಇನ್ಸ್‌ಪೆಕ್ಟ‌ರ್‌ನ ಮಿತ್ತ್‌ಲಾ ಶಿಸ್ತು ಕ್ರಮ ಗೆತೊನ್ದೆರ್.
