Last updated on March 13th, 2025 at 03:05 pm
ಹೈದರಾಬಾದ್, ಮಾ. 13: ನಾಲ್ ವರ್ಸೊದ ಆಣ್ ಬಾಲೆ ಒರಿ ಅಪಾರ್ಟ್‌ಮೆಂಟ್‌ದ ಲಿಫ್ಟ್‌ದ ಗೇಟ್‌ದ ನಡುಟು ತಿಕಲೊಂದು ತೀರ್ದಿನ ನಡಕೆ ಹೈದರಾಬಾದ್‌ದ ಸಂತೋಷ್‌ನಗರ ಕಾಲೋನಿದ ಮುಜ್ತಬಾ ಅಪಾರ್ಟ್‌ಮೆಂಟ್‌ಡ್ ಬುದಾರ ನಡತ್‌ದ್ಂಡ್.
ತೀರ್ದಿನ ಆಣ್ ಅವ್ವೇ ಅಪಾರ್ಟ್‌ಮೆಂಟ್‌ಡ್ ಸೆಕ್ಯೂರಿಟಿ ಗಾರ್ಡ್ ಆದ್ ಬೇಲೆ ಮಲ್ಪುನ ಶ್ಯಾಮ್ ಬಹದ್ದೂರ್ ಪನ್ಪಿನಾರೆನ ಮಗೆ ಸುರೇಂದರ್ ಪನ್ದ್ ತೆರಿದ್ ಬೈದ್ಂಡ್. ಮೂಲತಃ ನೇಪಾಳ ದಕುಲಾಯಿನ ಮೊಕುಲು ಏಳ್ ತಿಂಗೊಲುಗು ಪಿಲವು ಬೇಲೆ ನಾಡೊಂದು ಬತ್ತಿತ್ತ್‌ದ್, ಈ ಲಿಫ್ಟ್‌ದ ಬರಿಟೇ ಎಲ್ಯ ಅದೆಟ್ ಕುಲ್ಲುದಿತ್ತೆರ್.
ವರದಿಲೆನ ಪ್ರಕಾರ ಲಿಫ್ಟ್‌ದ ಬರಿಟ್ ಗೊಬ್ಬೊಂದಿತ್ತಿನ ಸುರೇಂದರ್ ಲಿಫ್ಟ್‌ದ ಗ್ರಿಲ್‌ದ ನಡುಟು ಸುಮಾರ್ 10 ನಿಮಿಷದಾತ್ ಪೊರ್ತು ತಿಕ್‌ದ್ ಬೂರೊಂದೆ. ಬಾಲೆ ತೋಜೊಂದಿಂಜ್ಜಿ ಪನ್ದ್ ಇಲ್ಲದಕುಲು ನಾಡ್ನಗ ಲಿಫ್ಟ್‌ಡ್ ಗಾತಿದ ಗಡಿಕುಲಾದ್ ಮತಿ ತತ್ತಿನ ಸ್ಥಿತಿಟ್ ಆಣ್ ತಿಕ್ಕ್‌ದೆ.
ಅಪಗನೇ ಅಲ್ಪದಕ್ಲೆನ ಸಕಾಯೊಡು ಆಣನ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಅಲ್ಪ ಬೈದ್ಯೆರ್ ತೀರ್ದಿನೆನ್ ದೃಢ ಮಲ್ತ್‌ದೆರ್. ಆಸಿಫ್‌ನಗರ ಪೋಲೀಸ್ ಸ್ಟೇಷನ್‌ಡ್ ಪ್ರಕರಣ ದಾಕಲಾದಿತ್ತ್‌ದ್, ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.