Last updated on March 7th, 2025 at 10:20 am
ನೆಲ್ಯಾಡಿ: ಸ್ಕೂಟರ್ ಸ್ಕಿಡ್ ಆದ್ ಪಲ್ಟಿಯಾತಿನೆರ್ದಾವರ ಗಾತಿದ ಗಡಿಕುಲಾದ್ ಕುಡ್ಲಡ್ ಪ್ರೈವೇಟ್ ಆಸ್ಪತ್ರೆಡ್ ದಾಕಲಾದ್ ಮರ್ದ್ ಮಲ್ತೊಂದಿತ್ತಿನ ನೂಜಿಬಾಳ್ತಿಲ ಗ್ರಾಮೊದ ನಿಡ್ಡೋ ನಿವಾಸಿ ರಾಮಚಂದ್ರ ಗೌಡ(65ವ.)ಮೆರ್ ಮರ್ದ್ ಪಲಿಪಂದೆ ಮಾ. 5 ತಾನಿ ಕಾಂಡೆ ತೀರ್ದೆರ್.
ರಾಮಚಂದ್ರ ಗೌಡ ಮೇರ್ ಮಾ.4ತಾನಿ ಬಯ್ಯ 6.45ತ ಅಂದಾಜಿಗ್ ಕಲ್ಲುಗುಡ್ಡೆರ್ದ್ ಎಂಜಿರ ದಂಚಿ ಸ್ಕೂಟರ್ ಬುಡೊಂದು ಬರೊಂದಿತ್ತೆರ್. ನೂಜಿಬಾಳ್ತಿಲ ಗ್ರಾಮೊದ ಅರಿಮಜಲ್ ಪನ್ಪಿನಲ್ಪ ಒರಾನೆ ಬ್ರೇಕ್ ಪಾಡಿನೆರ್ದಾವರ ಸ್ಕೂಟರ್ ಸ್ಕಿಡ್ ಆದ್ ಡಾಮಾರ್ ರೋಡ್‌ಗ್ ಬೂರ್ದೆರ್. ನಡಕೆದ ಬಗೆಟ್ ತೆರಿದ್ ಜಾಗೆಗ್ ಬತ್ತಿನ ನಿಡ್ಡೋ ನಿವಾಸಿ ನಾರಾಯಣ ಗೌಡ, ವಸಂತ ಬೊಕ್ಕ ಬೇತೆಕ್ಲು ಸೇರೊಂದು ರಾಮಚಂದ್ರ ಗೌಡೆರೆನ್ ಕಡಬ ಸರಕಾರಿ ಆಸ್ಪತ್ರೆಗ್ ಲೆತೊಂದು ಪೋದು, ಅಲ್ತ್‌ರ್ದ್ ಎಚ್ಚಿನ ಮರ್ದ್‌ಗ್ ಕುಡ್ಲದ ಫಸ್ಟ್ ನ್ಯೂರೋ ಆಸ್ಪತ್ರೆಗ್ ದಾಕಲ್ತ್‌ದೆರ್. ರಾಮಚಂದ್ರ ಗೌಡ್ರೆನ ತರೆತ ಬಲತ ಮರ್ಗಿಲ್‌ಗ್, ಕೆನ್ನಿಗ್ ಪೆಟ್ಟಾದಿತ್ತ್ಂಡ್. ಫಸ್ಟ್ ನ್ಯೂರೋ ಆಸ್ಪತ್ರೆಡ್ ಮರ್ದ್ ನಡತೊಂದಿತ್ತಿನಾರ್ ಮಾ. 5 ತಾನಿ ಕಾಂಡೆ 11.45ತ ಅಂದಾಜಿಗ್ ಮರ್ದ್ ಪಲಿಪಂದೆ ತೀರ್ದೆರ್ ಪನ್ದ್ ವರದಿ ಆತ್‌ನ್ಡ್. ನಿಡ್ಡೋ ನಿವಾಸಿ ನಾರಾಯಣ ಗೌಡ ಮೇರ್ ಕೊರ್ತಿನ ಒಯಿಲ್‌ದ ಪ್ರಕಾರ ಕಡಬ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ತೀರ್ದಿನ ರಾಮಚಂದ್ರ ಗೌಡೆರ್ ಬೊಡೆದಿ ಪೂವಮ್ಮ, ಮಗೆ ರಂಜಿತ್ ಬೊಕ್ಕ ನಾಲ್ವೆರ್ ಮಗಲರ್ಲೆನ್ ಅಗತ್‌ದೆರ್.