Last updated on March 18th, 2025 at 08:15 am
ದೆಲ್ಲಿ: ಒಂಜಿ ಕಡೆಟ್ ಉಕ್ರೇನ್ ಬೊಕ್ಕ ರಷ್ಯಾದ ನಡುತ ಕೊಲಲಗ್ ಶಾಂತಿ ಸಂಧಾನೊದ ತೇಪೆ ಪಾಡೆರ ವಿಶ್ವೊದ ಮಲ್ಲ ಮಲ್ಲ ರಾಷ್ಟ್ರೊಲೆನ ನಾಯಕೆರ್ ಪುಣೆಯೊಂದಿತ್ತೆರ್ನ್ಡ, ಕುಡೊಂಜಿ ಕಡೆಟ್ ಈ ಕೊಲಲೊನು ಉಂತಾಯೆರ ಭಾರತೊದ ಪ್ರಧಾನಿ ನರೇಂದ್ರ ಮೋದಿಮೆರ್ ಆಪಿನ ಮಾತಾ ಪುನೆಪು ಬೈದೆರ್ ಪನ್ಪಿನ ಕುಡೊರ ಸಾಬೀತ್ ಆತ್ಂಡ್.
ರಷ್ಯಾ-ಉಕ್ರೇನ್ ಕೊಲಲದ ಬಗೆಟ್ ಪಾತೆರ್ನ ಪೋಲೆಂಡ್‌ದ ಉಪ ವಿದೇಶಾಂಗ ಸಚಿವೆ ವ್ಲಾಡಿಸ್ಲಾವ್ ಟಿಯೋಫಿಲ್ ಬಾರ್ಟೋಸ್ಜೆವ್ಸ್ಕಿ ಮೇರ್, ಭಾರತೊದ ಪ್ರಧಾನಿ ನರೇಂದ್ರ ಮೋದಿ ಮೇರ್, ರಷ್ಯಾದ ಅಧ್ಯಕ್ಷೆ ವ್ಲಾಡಿಮಿರ್ ಪುಟಿನ್ ರೆನ್ ಪರಮಾಣು ಯುದ್ಧತಂತ್ರೊದ ಶಸ್ತ್ರಾಸ್ತ್ರೊಲೆನ್ ಗಲಸಂದಿ ಲೆಕ ಒಪ್ಯಾದೆರ್ ಪನ್ದ್ ತೆರಿಪಾದೆರ್.
ಸಿಎನ್‌ಎನ್-ನ್ಯೂಸ್ 18 ಗ್ ಕೊರ್ತಿನ ವಿಶೇಷ ಸಂದರ್ಶನೊಡು ಪಾತೆರ್ನ ಪೋಲೆಂಡ್‌ದ ಉಪ ವಿದೇಶಾಂಗ ಸಚಿವೆ ಬೊಕ್ಕ ವಿದೇಶಾಂಗ ಕಾರ್ಯದರ್ಶಿಯಾದುಪ್ಪುನ ವ್ಲಾಡಿಸ್ಲಾವ್ ಟಿಯೋಫಿಲ್ ಬಾರ್ಟೋಸ್ಜೆವ್ಸ್ಕಿ ಮೇರ್, “ಪ್ರಧಾನಿ ಮೋದಿಯೆರೆ ವಾರ್ಸಾ ಭೇಟಿ ಎಂಕ್ಲೆಗ್ ಬಾರೀ ಎಡ್ಡೆ ಆಂಡ್. ನ್ಯೂಕ್ಲಿಯರ್ ಶಸ್ತ್ರಾಸ್ತ್ರೊಲೆನ್ ಗಲಸಂದಿ ಲೆಕ ಪ್ರಧಾನಿ ಮೋದಿ ಪುಟಿನ್‌ರೆನ್ ಒಪ್ಯಾಯೆರ್. ನಮಕ್ ಶಾಶ್ವತ ಶಾಂತಿ ಬೋಡು. ಉಕ್ರೇನ್‌ಡ್ ನಮಕ್ ಸ್ಥಿರ ಬೊಕ್ಕ ಸುಸ್ಥಿರ ಶಾಂತಿ ಬೋಡು” ಪನ್ದ್ ಪನ್ಡೆರ್.