Last updated on March 11th, 2025 at 03:51 pm
ಮಾ.11: ಪೊಲೀಸ್ ಇಲಾಖೆದ ಅಧಿಕಾರಿಲು ಬೊಕ್ಕ ಸಿಬ್ಬಂದಿಲು ತನ್ಕುಲೆ ಸ್ವಂತ ಗಾಡಿಲೆನ ಮಿತ್ತ್ ಪೊಲೀಸ್ ಪನ್ದ್ ಬರೆಪಾಯೆರ ಇಜ್ಜಿ. ಓಲಾಂಡಲಾ ಬರೆಪಾದಿತ್ತ್ಂಡ ಅವು ಕಾನೂನು ಉಲ್ಲಂಘನೆ ಮಲ್ತಿಲೆಕ ಪನ್ದ್ ಗೃಹ ಸಚಿವೆ ಡಾ.ಜಿ.ಪರಮೇಶ್ವರ ಸ್ಪಷ್ಟ ಸೂಚನೆ ಕೊರ್ತೆರ್.
ಶ್ರವಣ ಬೆಳಗೊಳದ ಶಾಸಕೆ ಬಾಲಕೃಷ್ಣ ಸಿಎನ್ ಮೆರೆನ ಪ್ರಶ್ನೆಗ್ ಸಚಿವೆ ಡಾ. ಜಿ ಪರಮೇಶ್ವರ್ ಸದು ಕೊರ್ತೆರ್. ರಾಜ್ಯೊದ ಪೊಲೀಸ್ ಇಲಾಖೆದ ಅಧಿಕಾರಿಲು ಬೊಕ್ಕ ಸಿಬ್ಬಂದಿಲು ತನ್ಕುಲೆ ಸ್ವಂತ ಗಾಡಿಲೆನ ಮಿತ್ತ್ ಪೊಲೀಸ್ ಪನ್ದ್ ಬರೆಪಾವೊಂದು ಗಾಡಿ ಗೆಡಪೆರ ಕಾನೂನುಡು ಅವಕಾಶ ಉಂಡಾ? ಪನ್ದ್ ಪ್ರಶ್ನೆ ಕೇನ್ದಿತ್ತೆರ್.
ರಾಜ್ಯೊದ ಪೊಲೀಸ್ ಇಲಾಖೆದ ಅಧಿಕಾರಿಲು ತನ್ಕುಲೆ ಸ್ವಂತ ಗಾಡಿಲೆನ ಮಿತ್ತ್ ಪೊಲೀಸ್ ಪನ್ದ್ ಬರೆಪಾವೊಂದು ಸಂಚಾರ ಮನ್ಪೆರ ಕಾನೂನುಡು ಅವಕಾಶ ಇಜ್ಜಿ ಪನ್ದ್ ಸದು ಕೊರ್ತೆರ್.
ಅವ್ವೇ ಪೊರ್ತುಡು ಶಾಸಕೆರ್, ಅಂಚ ಇಪ್ಪುನಗ ಸ್ವಂತ ಗಾಡಿಲೆನ ಮಿತ್ತ್ ಪೊಲೀಸ್ ಪನ್ದ್ ಬರೆಪಾದ್ ಕೆಲ ಪೊಲೀಸ್ ನೌಕರೆರ್ ಬೊಕ್ಕ ಅಧಿಕಾರಿಲು ಕಾನೂನು ಉಲ್ಲಂಘನೆ ಮಲ್ದಿನ ಸರ್ಕಾರೊದ ಗುಮನೊಗು ಬೈದ್ಂಡಾ? ಬೈದಿತ್ತ್ಂಡ, ಅಕಲ್ನ ವಿರುದ್ಧ ಸರ್ಕಾರ ದಾದ ಕ್ರಮ ಗೆತೊಂದುಂಡು? ಪನ್ದ್ ಕೇನ್ದೆರ್.
ಅವೆಕ್ ಪರಮೇಶ್ವರ್, ತನ್ಕುಲೆ ಸ್ವಂತ ಗಾಡಿಲೆನ ಮಿತ್ತ್ ಪೊಲೀಸ್ ಪನ್ದ್ ಬರೆಪಾವೊಂದಿನ ಗೃಹ ಇಲಾಖೆದ ಗೇನೊಗು ಬೈದ್ಂಡ್. ಸ್ವಂತ ಗಾಡಿಲೆನ ಮಿತ್ತ್ ಪೊಲೀಸ್ ಅಧಿಕಾರಿಲು ಅಂಚೆನೇ ನೌಕರೆರ್ ಪೊಲೀಸ್ ಪನ್ದ್ ಬರೆಪಾದಿತ್ತ್ಂಡ ಅಕ್ಲೆನ ಮಿತ್ತ್ 2022 ತ ಸರ್ಕಾರೊದ ಸುತ್ತೋಲೆ ಪ್ರಕಾರ ಕಾನೂನು ಕ್ರಮ ಆಪುಂಡು ಪನ್ದ್ ಪನ್ಡೆರ್.