Last updated on March 3rd, 2025 at 01:31 pm
ಕಂಡೇವುದ ಆಯನೊಡು ಸಂಕ್ರಾಂತಿದಾನಿ ಮೀನ್ ಪತ್ತುನ ಇಸೇಸ ಕ್ರಮ ಉಂಡು. ಎರ್ಮಾಲ್ ಜಪ್ಪು ಕಂಡೇವು ಅಡೆಪ್ಪು ಪನ್ಪಿನ ಪಾತೆರ ತುಳುನಾಡ ಧಾರ್ಮಿಕ ಕ್ಷೇತ್ರೊಡು ಕೇನಂದಿನಕುಲು ಇಪ್ಪಯೆರ್. ಈ ಸೀಮೆಡ್ ಸುರೂತ ಕೊಡಿ ಏರ್ದ್ ಜಾತ್ರೆ ಆಪುನು ಎರ್ಮಾಲ್‌ಡ್, ಅಕೇರಿದ ಕಂಡೇವುದ ಆಯನ. ತುಳುನಾಡ್‌ದ ಆದಿ ಆಲಡೆಲೆಡ್ ಕಂಡೇವುಲಾ ಒಂಜಿ. ಇನಿಕಾನಗ ನರಮಾನ್ಯನ ಸ್ವಾರ್ಥೊರ್ದಾವರ ಕಂಡೇವುದ ಆಯನೊಡು ಅನಾದಿಕಾಲೊರ್ದು ನಡತೊಂದು ಬೈದಿನ ಈ ಮೀನ್ ಪತ್ತುನ ಕಟ್ಟ್ ಉಂತುನಡೆ ಮುಟ್ಟ ಎತ್ತ್‌ದ್ಂಡ್.
ಪರತಿರಿ‌ತ ಪುಗಾರ್ತೆದ ತೆಲಾರ್ ಖಂಡೇವು ನಂದಿನಿ ಸುದೆಕ್ ಮುಂಚೂರ್ ವೆಟ್‌ವೆಲ್‌ದ ಕೈತಲ್ದ ಉಲಚರಂಡಿಲೆನ ಗಲೇಜಿ ನೀರ್, ಕೊಡಿಪಾಡಿಡ್ ಕಟ್ಟಾದಿನ ತ್ಯಾಜ್ಯ ಸಂಸ್ಕರಣಾ ಘಟಕೊದ ನೀರ್, ಮುಕ್ಕದ ಪ್ರೈವೇಟ್ ಆಸ್ಪತ್ರೆ, ಕಾಲೇಜಿ, ಲಾಡ್ಜ್, ಹೋಟೇಲ್‌ಲೆನ ಗಲೇಜಿ ನೀರ್‌ನ್ ಸುದೆಕ್ ಬುಡೊಂದುಪ್ಪುನೆರ್ದಾವರ ನಂದಿನಿ ಸುದೆತ ನೀರ್ ಅಲಕ್ಕ ಹಾಲಾತ್ಂಡ್.
ಉಂದೆರ್ದಾವರ ತೆಲಾರ್ ಕಂಡೇವು ಭಾಗೊದ ಬೆನ್ನಿನೇ ನಂಬುದಿನ ಪಾಕ ಕುಟುಮೊಲು ಬೆನ್ನಿ ಮನ್ಪೆರಾವಂದೆ, ಪರ್ಪಿನ ನೀರ್‌ಗ್ಲಾ ಸಮಸ್ಯೆ ಆದ್, ಗೂವೆಲ್‌ಲೆನ ನೀರ್‌ಲಾ ಪರ್ಯೆರಾವಂದಿಲೆಕ ಆದ್, ತುಳುನಾಡ ಪುಗಾರ್ತೆದ ಕಂಡೇವು ಜಾತ್ರೆಲಾ ಉಂತುನಡೆ ಮುಟ್ಟ ಬೈದ್ಂಡ್. ಕೈಕಂಜಿಲೆಗ್ ಪರ್ಪಿನ ನೀರ್ ದೀಯೆರಾವಂದಿಲೆಕ, ಪಜಿರ್ ತಿನೆರಾವಂದಿಲೆಕ ಆದಿತ್ತ್‌ದ್, ಗೂವೆಲ್‌ದ ನೀರ್ ಪರ್ನಕುಲು ಮಾತಾ ಆಸ್ಪತ್ರೆಲೆಡ್ ಮರ್ದ್ ಮಲ್ಪುಲೆಕ ಆತ್ಂಡ್.
ಈ ಬಗೆಟ್ ಖಂಡೇವು ತೆಲಾರ್‌ದ ‘ನಂದಿನಿ ನದಿ ಸಂರಕ್ಷಣಾ ಸಮಿತಿ’ ದ ಮುಕೇನ ಜಿಲ್ಲೆದ ಸಂಸದೆರೆಗ್, ಕ್ಷೇತ್ರೊದ ಶಾಸಕೆರೆಗ್, ಮಹಾನಗರ ಪಾಲಿಕೆದ ಮೇಯರ್‌ಗ್, ಜಿಲ್ಲಾಧಿಕಾರಿಲೆಗ್, ನಗರ ಪಾಲಿಕೆ ಅಧಿಕಾರಿಲೆಗ್, ಗ್ರಾಮ ಪಂಚಾಯಿತಿಗ್ ಸಂಬಂಧಿತಿನ ಮಾತಾ ಇಲಾಖೆಲೆಗ್ ಪಾಕ ಸಮೆರ್ದಿಂಚಿ ಬಿನ್ನಪು ಮಲ್ತೊಂದು ಬತ್ತಿತ್ತ್ಂಡಲಾ, ಅವೆನ್ ಇದಮುಟ್ಟ ಗೆನ್ತ್‌ದಿಜೆರ್. ಉಂದೆರ್ದಾವರ ಪಿಸಿರಾತಿನ ಸಂರಕ್ಷಣಾ ಸಮಿತಿ ಬೊಕ್ಕ ಗ್ರಾಮದಕುಲು ಚೇಲಾೖರ್ ಕಂಡೇವು ದೈವಸಾನೊದ ವಠಾರೊಡು ಊರುಗು ಆವೊಂದುಪ್ಪುನ ಅನ್ಯಾಯೊದ ಬಗೆಟ್ ಮಲ್ಲ ಪೊರ್ಮ್ಬಾಟ ಮಲ್ಪೆರ ಪಿದಡ್ದೆರ್. ನಂದಿನೀ ಸುದೆನ್ ಒರಿಪಾವುನ ದಿಟ್ಟಿಡ್ ಆಯಿನಾತ್ ಜನ ಈ ಪೊರ್ಮ್ಬಾಟೊಡು ಪಾಲ್‌ಪಡೆಯೊಡು ಪನ್ದ್ ಕೇನೊಂದೆರ್.
ಈ ಮಾತಾ ಸಮಸ್ಯೆಲೆಗ್ ಜಿಲ್ಲಾಡಳಿತ ಬೊಕ್ಕ ಪರಿಸರ ಇಲಾಖೆದ ವೈಫಲ್ಯೊನೇ ನೆವನ. ಇದಮುಟ್ಟ ಕೊರ್ತಿನ ಓಲೆಲೆನ್ ಗೆನ್ತಿನೇ ಇಜ್ಜೆರ್. ಜನಾಂದೋಲನ ಬೊಕ್ಕ ಕಾನೂನು ಪೊರ್ಮ್ಬಾಟೊದ ಮುಕೇನ ಈ ಸಮಸ್ಯೆಗ್ ಪಿರಿಕಟ್ಟ್ ಮನ್ಪುನ ಅಗತ್ಯ ಉಂಡು.
ಮಾರ್ಚ್ 4 ತಾನಿ ಕಾಂಡೆ 9:30 ಗಂಟೆಗ್ ತೆಲಾರ್‌ದ ನಂದಿನಿ ಮಿತ್ರ ಮಂಡಳಿ ದಲ್ಪ ಊರೂದಕುಲು ಮಾತಾ ಒಟ್ಟು ಸೇರ್ದ್ ಮಲ್ಲ ಪ್ರತಿಭಟನೆ ಮಲ್ಪೆರ ನಿರ್ಧಾರ ಮಲ್ತ್‌ದ ಪನ್ದ್ ಊರುದಕುಲು ತುಳುಸಮಾಚಾರೊಗು ತೆರಿಪಾದೆರ್.
ಒವ್ವೇ ನೆವನೊಗ್ಲಾ ಆಸ್ಪತ್ರೆ, ಎಸ್‌ಟಿ‌ಪಿ ಪ್ಲಾಂಟ್, ಉಲಚರಂಡಿದ ಗಲೇಜಿ ನೀರ್, ವೆಟ್‌ವೆಲ್‌ದ ನೀರ್, ಇಲ್ಲಲೆನ ತ್ಯಾಜ್ಯ ನೀರ್ ಸುದೆಕ್ ಸೇರ್ಯೆರೆ ಬಲ್ಲಿ ಪನ್ದ್ ಪನ್ಡೆರ್.