Last updated on March 25th, 2025 at 05:18 pm
ಬಂಟ್ವಾಳ, ಮಾ.25: ವೀರಕಂಬ ಗ್ರಾಮೊದ ಬಾಡಾಯಿದ ಇಲ್ಲ್‌ಲೆನ ಮಿತ್ತ್ ಕಣ್ಣ್ ದೀಯೆರೆ ರಡ್ಡನೇ ಗ್ರಾಮಸಭೆಟ್ ಗ್ರಾಮಸ್ಥೆರ್ ಕಾಯೆಸ್ ಮಲ್ತೆರ್. ವೀರಕಂಭ ಮಜಿ ಸರಕಾರಿ ಪೆರಿಯ ಪ್ರಾಥಮಿಕ ಶಾಲೆದ ಸಭಾ ಭವನೊಡು ನಡತಿನ ಗ್ರಾಮಸಭೆಟ್ ಈ ವಿಚಾರ ಪ್ರಸ್ತಾಪ ಆಂಡ್.
ಗ್ರಾಮಡ್ ಇಪ್ಪುನ ಬಾಡಾಯಿದ ಇಲ್ಲ್‌ಲೆರ್ದ್ ಗ್ರಾಮೊದ ನಿರ್ಮಲೊಗು ತಲೆಪು ಆವೊಂದಿತ್ತ್‌ದ್, ಗುರ್ತದಾಂತಿನಕ್ಲೆಗ್ ಬಾಡಾಯಿಡ್ ಇಲ್ಲ್ ಕೊರ್ಪುನೆರ್ದಾವರ ಅಕ್ರಮ ಚಟುವಟಿಕೆಲು ನಡತೊಂದುಲ್ಲ. ಬಾಡಾಯಿದ ಇಲ್ಲ್ ಕೊರ್ನಗ ಪತ್ತ ದಾಖಲೆಲೆನ್ ಗೆತೊಂದು ಗ್ರಾಮ ಪಂಚಾಯತಿಗ್ ಒಲವು ಕೊರೊಡು ಪನ್ದ್ ಗ್ರಾಮಸ್ಥೆರ್ ಬಿನ್ನಪು ಮಲ್ತೆರ್. ವೀರಕಂಬ ಗ್ರಾಮೊಡು ಆರೋಗ್ಯ ಕೇಂದ್ರ ಕಟ್ಟಾಯೆರ ಗೊತ್ತು ಮಲ್ದಿನ ಜಾಗೆಡ್ ಬೇಗೊಡು ಆರೋಗ್ಯ ಉಪ ಕೇಂದ್ರ ಕಟ್ಟಾವೊಡು, ಗ್ರಾಮೊಡುಪ್ಪುನ ಗೋಮಾಲ ಜಾಗೆದ ಗಡು ಗುರ್ತ ಮನ್ಪೊಡು, ಘನ ತ್ಯಾಜ್ಯ ಘಟಕೊದ ಉದಿಪನ ಆವೊಡು, ಸಾದಿ ಬರಿಟ್ ಕಜವು ದಕ್ಕುನಕ್ಲೆನ ಮಿತ್ತ್ ಕ್ರಮ ಗೆತೊನೊಡು ಪನ್ದ್ ಗ್ರಾಮೊದಕುಲು ಆಗ್ರಹ ಮಲ್ತೆರ್.
ಬೇತೆ ಬೇತೆ ಇಲಾಖೆಲಾಯಿನ ಅರೋಗ್ಯ, ಮೆಸ್ಕಾಂ, ಪೋಂಜುವು ಬೊಕ್ಕ ಜೋಕುಲೆನ ಅಭಿವೃದ್ಧಿ ಇಲಾಖೆ, ಶಿಕ್ಷಣ ಇಲಾಖೆ, ಅರಣ್ಯ ಇಲಾಖೆ, ಪಶು ಸಂಗೋಪನ ಇಲಾಖೆ, ತೋಟಗಾರಿಕಾ ಇಲಾಖೆದ ಕಡೆರ್ದ್ ಗ್ರಾಮಸ್ಥೆರೆಗ್ ಇಲಾಖಾವಾರ್ ಒಲವು ಕೊರ್ಯೆರ್. ಗ್ರಾಮ ಸಭೆತ ಮಾರ್ಗದರ್ಶಿ ಅಧಿಕಾರಿಯಾದ್ ಬಂಟ್ವಾಳ ತೋಟಗಾರಿಕಾ ಇಲಾಖೆದ ಸಹಾಯಕ ನಿರ್ದೇಶಕೆ ಪ್ರದೀಪ್ ಪಾಲ್‌ಪಡೆದ್ ಬೋಡಾಪಿನ ಸಲಹೆ ಅಂಚೆನೇ ಮಾರ್ಗದರ್ಶನೊ ಕೊರ್ಯೆರ್. ಮಿತ್ತರ್ಮೆಡ್ ಗ್ರಾ.ಪಂ. ಅಧ್ಯಕ್ಷೆದಿ ಲಲಿತ, ಉಪಾಧ್ಯಕ್ಷೆ ಜನಾರ್ಧನ ಪೂಜಾರಿ, ಪದುಕೆರ್, ಇಲಾಖೆಲೆನ ಅಧಿಕಾರಿಲು ಇತ್ತೆರ್.