Last updated on March 25th, 2025 at 01:47 pm
ಉತ್ತರಪ್ರದೇಶ, ಮಾ. 25: ಇಷ್ಟ ಇಜ್ಜಂಡಲಾ ಮದಿಮೆ ಆಯಿನೆರ್ದಾವರ ಮದಿಮೆ ಆತಿನ 15 ದಿನೊಟೇ ಬೊಡೆದಿ ತನ್ನ ಕಂಡನ್ಯನ್ 2 ಲಕ್ಷ ರೂ.ಗ್ ಸುಪಾರಿ ಕೊರ್ದು ಕೆರ್ಪಾದಿನ ನಡಕೆ ಉತ್ತರ ಪ್ರದೇಶದ ಔರೈಯಾ ಜಿಲ್ಲೆಡ್ ನಡತ್‌ದ್ಂಡ್. ಇತ್ತೆ ಪೊಲೀಸೆರ್ ಪೊಂಜೊವು, ಆಲೆನ ಚಙ್ಗಾಯಿ ಬೊಕ್ಕ ಕೆರ್ತಿನಕ್ಲೆನ್ ಕೈದ್ ಮಲ್ದೆರ್.
ಸೈದಿನ ಆಂಜೊವುನು ದಿಲೀಪ್ ಯಾದವ್ ಪನ್ದ್ ಗುರ್ತ ಪತ್ತ್‌ದೆರ್, ಪೋಲೀಸೆರೆ ಪ್ರಕಾರ ಇರ್ವೆರ್ ಆರೋಪಿಲಾಯಿನ ಪ್ರಗತಿ ಯಾದವ್ ಬೊಕ್ಕ ಅನುರಾಗ್ ಯಾದವ್ ಕರಿನ ನಾಲ್ ವರ್ಸೊರ್ದಿಂಚಿ ಒರಿಯನೊರಿ ಮೋಕೆ ಮಲ್ತೊಂದಿತ್ತೆರ್. ಆಂಡ, ಅಕ್ಲೆನ ಇಲ್ಲದಕುಲು ಅಕ್ಲೆನ ಸಂಬಂಧೊನು ಒತ್ತೊನೊಂದಿಜ್ಜಂಡ್. ಮಾರ್ಚ್ 5 ತಾನಿ ಪ್ರಗತಿನ್ ದಿಲೀಪ್‌ಗ್ ಕೊರ್ದು ಒತ್ತಾಯೊಡು ಮದಿಮೆ ಮಲ್ತ್‌ದೆರ್.
ಮಾರ್ಚ್ 19 ದಾನಿ, ಪೊಲೀಸೆರ್ ದಿಲೀಪ್ ಗುಂಡು ತಾಗ್‌ದ್ ಗಾತಿದ ಪೆಟ್ಟಾದ್ ಕಂಡೊಡು ಬೂರ್ದಿನೆನ್ ತೂತೆರ್. ಆಯನ್ ಮರ್ದ್‌ಗ್ ಬಿಧುನಾದ ಸಮುದಾಯ ಆರೋಗ್ಯ ಕೇಂದ್ರೊಗು ಲೆತೊಂದು ಪೋತೆರ್. ಆಂಡ, ಅಲ್ಪ ಸ್ಥಿತಿ ತೆಟ್ಟೊಂದು ಬತ್ತಿನೇ ಮಧ್ಯಪ್ರದೇಶೊದ ಗ್ವಾಲಿಯರ್‌ಗ್ ಲೆತೊಂದು ಬತ್ತ್‌ದೆರ್. ಆಂಡ ಮರ್ದ್ ಪಲಿಪಂದೆ ದಿಲೀಪ್ ತೀರ್ದೆರ್.
ಪ್ರಕರಣೊದ ಜಡ್ತೆ ಮಲ್ತಿನ ಪೊಲೀಸೆರೆಗ್ ಮದಿಮೆರ್ದ್ ಬೊಕ್ಕಲಾ, ಪ್ರಗತಿ ತನ್ನ ಗ್ರಾಮೊದ ಅನುರಾಗ್ ಅಲಿಯಾಸ್ ಬಬ್ಲು ಅಲಿಯಾಸ್ ಮನೋಜ್ ಯಾದವ್ ನೊಟ್ಟುಗು ಎಡ್ಡೆಡ್ ಉಲ್ಲಲ್. ಉಂದು ದಿಲೀಪ್ ಬೊಕ್ಕ ಪ್ರಗತಿನ ನಡುಟು ಭಿನ್ನಾಭಿಪ್ರಾಯೊಗು ನೆವನ ಆತ್ಂಡ್ ಪನ್ದ್ ತೆರಿದ್ ಬೈದ್ಂಡ್‌.
ದಿಲೀಪ್ ಎಡ್ಡೆ ಕಾಸ್‌ದಾಯೆ ಆದಿತ್ತ್‌ದ್ ಆಯನ್ ಕೆರ್ನ್ಡ ಆ ಆಸ್ತಿಡ್ ತಾನ್ ಬೊಕ್ಕ ಅನುರಾಗ್ ಎಡ್ಡೆಡ್ ಜೂವನ ಕರಿಪೊಲಿ ಪನ್ದ್ ಕನ ಕಟೊಂದಿತ್ತಲ್. ರಾಮ್ ಚೌಧರಿ ಪನ್ಪಿನಾಯಗ್ 2 ಲಕ್ಷ ರೂ. ಸುಪಾರಿ ಕೊರ್ದಿತ್ತಲ್. ರಾಮ್ ಜಿ ದಿಲೀಪ್‌ನ್ ಕಂಡೊಗು ಲೆತೊಂದು ಪೋದು ಶೂಟ್ ಮಲ್ತ್‌ದ್ ಪದ್ರಾಡಾದಿತ್ತೆ. ಆಂಡ ದಿಲೀಪ್ ನನಲಾ ಸೈದಿಜ್ಜಂಡ್.
ಪೊಲೀಸೆರ್ ಸುರುಕು ರಾಮ್‌ಜೀನ್ ಕೈದ್ ಮಲ್ತೆರ್, ಆಯನ ಕೈಟಿತ್ತಿನ ರಡ್ಡ್ ಕಾರ್ಟ್ರಿಡ್ಜ್‌ಲೆನ ಒಟ್ಟುಗು ಒಂಜಿ ಪಿಸ್ತೂಲ್‌ನ್ ವಶೊಕು ಗೆತೊಂದೆರ್.