Last updated on April 15th, 2025 at 03:05 pm
ಕಟ್ಪಾಡಿ: ಮುಲ್ಪದ ಶ್ರೀ ವಿಶ್ವನಾಥ ಕ್ಷೇತ್ರೊದ ಸಪ್ತಪದಿ ಮಂಟಮೆಡ್ ಏಪ್ರಿಲ್ 13ತಾನಿ ನಡತಿನ ತುಳುನಾಡ್ ಕಾನ್‌ಕ್ಲೇವ್‌ 2025 ದ ತುಳುವ ಜವನೆರೆ ಆಯನೊಡು ಪಾಕ ಗಣ್ಯೆರೆ ಒತ್ತುಪಾಲ್‌ಡ್ ಕುವಿಕು ಪನ್ದೇ ಪುದರಾತಿನ ಸಾಹಿತಿ ಶ್ರೀಮತಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಮೆರೆನ ಪತ್ತನೇ ಬೂಕು, ತುಳು ಕಬಿತೆಲೆ ತಂಚಿ ‘ಪತ್ತ್’ ಪೆರಿಯ ಸಾಹಿತಿ, ಆಕಾಶವಾಣಿ ಪ್ರಸಾರಕೆರ್, ರಂಗಭೂಮಿ ಇಂಚ ಪಾಕ ಕ್ಷೇತ್ರೊಲೆಡ್ ಸಾದಗೊ ಬೆನ್ತಿನ ಶ್ರೀ ಮುದ್ದು ಮೂಡುಬೆಳ್ಳೆ ಮೆರೆನ ಕೈರ್ದ್ ಬುಡುಗಡೆ ಆಂಡ್.
ಒರ್ತಿ ಗೃಹಿಣಿ ಆದ್, ಸಾಹಿತ್ಯ ಕ್ಷೇತ್ರೊಡು ಕುಶಲಾಕ್ಷಿ ಕಣ್ವತೀರ್ಥ ಮೆರೆನ ಸಾಧಗೊನು ಮೆಚ್ಚೊಡು, ತುಲು ಸಾಹಿತ್ಯೊದ ಪತ್ತ್ ಕೃತಿಕುಲೆನ್ ಪ್ರಕಟ ಮಲ್ಪುನು ಪನ್ಡ ಸಾಮಾನ್ಯ ಬೇಲೆ ಅತ್ತ್, ಮೆರೆನ ಕಬಿತೊಲೆಡ್ ಪರಿಸರ ಕಾಳಜಿ, ಸಮಾಜೊಗು ಎಡ್ಡೆ ಸೊಲ್ಲಂಜೊಲು ದಿಂಜಿದ್ ಕೆಲ ಕವನೊಲು ರಾಗೊಡು ಪಾಡೆರೆ ಆಪಿಲೆಕ ಉಲ್ಲ. ನನದ ಬರವುಗಾರೆರೆನ್ ತಿದ್ದ್‌ದ್ ಕೈ ಪತ್ತ್‌ದ್ ನಡಪಾವುನ ಆರೆನ ಬೇಲೆ ಪುಗರೊಡಾಯಿನವು, ಜೋಕುಲೆ ತುಲು ಸಾಹಿತ್ಯೊಡುಲಾ ಬೇಲೆ ಮಲ್ತೊಂದುಪ್ಪುನ ಮೇರ್ ನನದ ದಿನೊಕು ಅಪ್ಪೆಬಾಸೆದ ಗೇನ ಒರರಿಪಾವುನ ಕಜ್ಜ ಮಲ್ತೊಂದುಲ್ಲೆರ್, ಮೆರೆನ ಕೈರ್ದ್ ನನಲಾತ್ ತುಲು ಭಾಷೆ ಕೃತಿಕುಲು ಬರಡ್ ಪನ್ದ್ ಕೃತಿ ಬುಡುಗಡೆ ಮಲ್ತ್‌ದ್ ಶ್ರೀ ಮುದ್ದು ಮೂಡುಬೆಳ್ಳೆ ಎಡ್ಡೆಪ್ಪು ಬಯಕಿಯೆರ್.