Last updated on April 8th, 2025 at 12:08 pm
ಹೈದರಾಬಾದ್, ಎ. 08: ಬಂಜಿನ ಬೊಡೆದಿಗ್ ಕಂಡನೆ ನಡು ನಡು ಸಾದಿಡ್ ಹಲ್ಲೆ ಮಲ್ತ್‌ದ್ ಕಲ್ಲ್ ತುಂಬುದ್ ಪಾಡ್ದಿನ ನಡಕೆ ಹೈದರಾಬಾದ್ ಪೊಲೀಸ್ ಕಮಿಷನರೇಟ್‌ದ ಗಚಿಬೌಲಿ ಪೊಲೀಸ್ ಸ್ಟೇಶನ್ ಸೀಮೆಡ್ ನಡತಿತ್ತ್‌ದ್, ನಡಕೆದ ವಿಡಿಯೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್. ಈ ನಡಕೆ ಏಪ್ರಿಲ್ 1 ತಾನಿ ರಾತ್ರೆ ನಡತ್‌ದ್ಂಡ್ ಪನ್ದ್ ಪನೊಂದಿತ್ತ್‌ದ್, ಇತ್ತೆ ಸಿಸಿಟಿವಿ ವಿಡಿಯೋ ವೈರಲ್ ಆಯಿ ಬೊಕ್ಕ ಬೊಲ್ಪುಗು ಬೈದ್ಂಡ್.
ಕಂಡನೆ ಬೊಕ್ಕ ಬೊಡೆದಿನ ನಡುಟು ನಡತಿನ ಎದೂರು ಪಾತೆರೊರ್ದು ಬೊಕ್ಕ, ಆಯೆ ಆಲೆಗ್ ತೊರ್ತ್‌ದ್ ನೇಲ್ಯ ಕಲ್ಲನ್ ದೆರ್ತ್‌ದ್ ಆಲೆನ ಮಿತ್ತ್ 14 ಸರ್ತಿ ತುಂಬುದ್ ಪಾಡ್ದೆ, ಬೊಕ್ಕ ಸೈತ್‌ದಲ್ ಪನ್ದ್ ಎನ್ನ್‌ದ್ ಆಲೆನ್ ಅಲ್ಪನೇ ಬುಡ್ದ್ ಪದ್ರಾಡಾತೆ. ಸಾದಿಡ್ ಪೆಟ್ಟಾದ್ ಬೂರ್ದಿತ್ತಿನ ಪೊಂಜೊವುನು ಐಟೆ ಪೋವೊಂದಿತ್ತಿನಕುಲು ತೂದು ಪೊಲೀಸೆರೆಗ್ ಒಲವು ಕೊರ್ತೆರ್.
ಪೊಂಜೊವುನು ನಿಜಾಮ್ ವೈದ್ಯಕೀಯ ವಿಜ್ಞಾನ ಸಂಸ್ಥೆ (NIMS) ಗ್ ಲೆತೊಂದು ಪೋತೆರ್. ತರೆಕ್ ಗಾತಿದ ಪೆಟ್ಟ್ ಬೂರ್ದಿನೆರ್ದಾವರ ಆರ್ ಕೋಮಾಗ್ ಪೋತೆರ್. ಪೊಲೀಸೆರೆ ಪ್ರಕಾರ, ಮೊಹಮ್ಮದ್ ಬಸ್ರತ್ ಮೇರ್ ಅಕ್ಟೋಬರ್ 2024 ಟ್ ಕೋಲ್ಕತ್ತಾದ ಶಬಾನಾ ಪರ್ವೀನ್ ಮೆರೆನ್ ಮೋಕೆ ಮಲ್ತ್ ಮದಿಮೆ ಆದಿತ್ತೆರ್. ಈ ದಂಪತಿಲು ಹಫೀಜ್‌ಪೇಟೆದ ಆದಿತ್ಯನಗರೊಡು ಇತ್ತೆರ್.
ಇಂಟೀರಿಯರ್ ಡಿಸೈನರ್ ಆದಿತ್ತಿನ ಬಸ್ರತ್ ವಿಕಾರಾಬಾದ್‌ರ್ದ್ ಹೈದರಾಬಾದ್‌ಗ್ ಒಕ್ಕೆಲ್ ಬತ್ತ್‌ದ್ ಆದಿತ್ಯನಗರೊಡು ಕುಲ್ಲುದಿತ್ತೆರ್. ಮಾರ್ಚ್ 29 ರ್ದ್ ಕಕ್ಕೆರೆ ಸುರು ಆದಿತ್ತಿನ ರಡ್ಡ್ ತಿಂಗೊಲ್ದ ಬಂಜಿನಾಲ್ ಪರ್ವೀನ್‌ನ್ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್‌ದಿತ್ತೆರ್.
ಆರ್ ಉಸಾರ್ ಆಯಿ ಬೊಕ್ಕ, ಏಪ್ರಿಲ್ 1 ತಾನಿ ರಾತ್ರೆ ಆಸ್ಪತ್ರೆರ್ದ್ ಬುಡುಗಡೆ ಮಲ್ದಿತ್ತೆರ್. ಆಸ್ಪತ್ರೆರ್ದ್ ಬತ್ತಿನೇ, ಇರ್ವೆರ್ ಒವ್ವಾ ಇಸಯೊಡು ಲಡಯಿ ಮಲ್ತೊಂದೆರ್. ಬಸ್ರತ್ ಶಬಾನಾಗ್ ಪಾರೊಂದು ಪೋದು ತೊರಿಪುನ ಸಿಸಿಟಿವಿಡ್ ಕೈದಾತ್ಂಡ್. ಪರ್ವೀನ್ ತಿರ್ತ್ ಬೂರಿನೇ, ಬರಿಟಿತ್ತಿನ ಕಲ್ಲ್ ದೇರ್ತ್‌ದ್ ಆಲೆನ ಮಿತ್ತ್ ತುಂಬುದು ಪಾಡೆರ ಪತ್ತ್‌ದೆ.
ಗಚಿಬೌಲಿ ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ದೆರ್. ಬಸ್ರತ್‌ನ್ ಪತ್ತ್‌ದ್ ನ್ಯಾಯಂತಡೆಗ್ ಹಾಜಿರಿ ಮಲ್ದೆರ್, ನ್ಯಾಯಂತಡೆ ಆಯನ್ ನ್ಯಾಯಾಂಗ ಕೈದ್‌ಗ್ ಕಡಪುಡ್ದ್ಂಡ್. ಎಚ್ಚಿನ ಜಡ್ತೆ ಮಲ್ತೊಂದುಲ್ಲ ಪನ್ದ್ ಪೊಲೀಸೆರ್ ತೆರಿಪಾದೆರ್.