Last updated on April 29th, 2025 at 04:00 pm
ಕುಡುಪು, ಎ. 29: ಕುಡುಪುಡು ಜವನನೊರಿಯನ ಪುನ ಐತಾರ ತಿಕ್ಕಿನ ಪ್ರಕರಣೊಗು ಸಂಬಂಧಿತ್ದ್ 15 ಜನೊನು ಪೊಲೀಸೆರ್ ವಶೊಕು ಗೆತೊಂದು ವಿಚಾರಣೆ ಮಲ್ತೊಂದುಲ್ಲೆರ್.
ಐತಾರ ಕುಡುಪುದ ಕೈತಲ್ ಅನುಮಾನಸ್ಪದವಾದ್ ಜವನನೊರಿಯನ ಪುನ ತಿಕ್ಕ್ದಿತ್ತ್ಂಡ್. ಈ ಪ್ರಕರಣೊಗು ಸಂಬಂಧಿತ್ದ್ ಕುಡ್ಲ ಪೊಲೀಸ್ ಕಮೀಷನರ್ ಅನುಪಮ್ ಅಗರ್ವಾರ್ ಒಲವು ಕೊರ್ದಿತ್ತ್ದ್, ಕುಡುಪು ದೆಲಂತಡೆದ ಕೈತಲ್ ಕ್ರಿಕೆಟ್ ಟೂರ್ನಮೆಂಟ್ ಆವೊಂದಿತ್ತ್ಂಡ್, ಈ ಪೊರ್ತುಡು ಅಂದಾಜಿ 35 ವರ್ಸ ಪ್ರಾಯೊದ ಆಂಜೊವು ಅಡೆ ಪೋದಿತ್ತ್ದ್, ಅಲ್ಪ ಉಂತುದಿತ್ತಿನ ಸಚಿನ್ ಪನ್ಪಿನಾಯಡ ಲಡಯಿ ಆದಿತ್ತ್ಂಡ್. ಈ ಪೊರ್ತುಡು ಕ್ರಿಕೆಟ್ ತೂಯೆರೆ ಬತ್ತಿತ್ತಿನ ಕೆಲ ಜವನೆರ್ ಆಯನ ಮಿತ್ತ್ ಹಲ್ಲೆ ಮಲ್ತ್ದೆರ್. ಈ ನಡುಟು ಜವನನ ಸರ್ರೊದ ಸೂಕ್ಷ್ಮ ಜಾಗೆಲೆಗ್ ಪೆಟ್ಟ್ ಬೂರ್ದಿತ್ತ್ದ್, ಐಟೇ ಆಯೆ ತೀರ್ದೆ ಪನ್ದ್ ಪೊಲೀಸ್ ಆಯುಕ್ತೆರ್ ತೆರಿಪಾದೆರ್.
ಸುಮಾರು 30 ಜನ ಕೂಡ್ದ್ ಪೆಟ್ಟ್ ಪಾಡ್ದಿನ ಸಾದ್ಯತೆ ಇತ್ತ್ದ್, ಇತ್ತೆನೇ ಸಚಿನ್, ದೇವದಾಸ್, ಮಂಜುನಾಥ್ ಸೇರ್ದ್ ಪದಿನೈನ್ ಜನೊನು ವಶೊಗು ಗೆತೊಂದ. ಈ ನಡಕೆದ ಪ್ರಮುಖ ಆರೋಪಿ ಸಚಿನ್ ರಿಕ್ಷಾ ಡ್ರೈವರ್ ಆದುಲ್ಲೆ ಪನ್ದ್ ಪೊಲೀಸೆರ್ ತೆರಿಪಾದೆರ್. ಐನೆರ್ದ್ ಎಚ್ಚ ಜನ ಮಾರಣಾಂತಿಕವಾದ್ ಆಕ್ದಿನ ಸಾಧ್ಯತೆ ಇತ್ತ್ದ್, ಈ ನಡಕೆಡ್ ಮಾಜಿ ಕಾರ್ಪೊರೇಟರ್ನ ಕಂಡನೆ ರವೀಂದ್ರ ನಾಯಕ್ ಪನ್ಪಿನಾರ್ಲಾ ಇಪ್ಪುನ ಒಲವು ಉಂಡು ಪನದ್ ತೆರಿದ್ ಬೈದಿತ್ತ್ದ್, ಸೈದಿನಾಯೆ ಏರ್ ಪನ್ದ್ ನನಲಾ ತೆರಿದಿಜಿ. ಉತ್ತರ ಭಾರತ ಅತ್ತ್ಂಡ ಕೇರಳ ಮೂಲೊದಾಯೆ ಆದುಪ್ಪು ಪನ್ಪಿನ ಡೌಟ್ ಉಂಡು ಪನ್ದ್ ಕುಡ್ಲ ನಗರ ಪೊಲೀಸ್ ಕಮೀಷನರ್ ಅನುಪಮ್ ಅಗರ್ವಾಲ್ ಒಲವು ಕೊರ್ತೆರ್.