Last updated on April 1st, 2025 at 11:20 am
ಬಂಟ್ವಾಳ, ಏ. 01: ಜಿಲ್ಲೆದ ಪ್ರಮುಖ ನೀರ್ದ ಮೂಲ ಆಯಿನ ನೇತ್ರಾವತಿ ಸುದೆ ಮೈಲೆ ಆವೊಂದುಪ್ಪುನ ಈ ನೀರ್ನ್ ನಂಬುದು ಬದುಕುನಕ್ಲೆಗ್ ಮಂಡೆಬೆಚ್ಚ ಉಂಡು ಮಲ್ದ್ಂಡ್. ಕುಡ್ಲ ಪೇಂಟೆ ಬೊಕ್ಕ ಪಾಕ ತಾಲ್ಲೂಕ್ಲೆಗ್ ಪ್ರಾಥಮಿಕ ಪರ್ಪಿನ ನೀರ್ ಆದಿತ್ತ್ಂಡಲಾ, ಬಂಟ್ವಾಳದ ಪಾಕ ಜಾಗೆಲೆಡ್ ಸಂಸ್ಕರಣೆ ಮಲ್ಪಂದಿನ ಗಲೇಜಿ ನೀರ್ ಬೊಕ್ಕ ಕಜವು ಸುದೆತ ಉಡಲ್ಗ್ ಗೋಡ್ಯೊಂದೇ ಉಂಡು.
ಬಂಟ್ವಾಳ ಪೇಂಟೆ ಪುರಸಭೆ ಸೀಮೆಡ್ ಕಮ್ಮಿಡ್ 12 ಜಾಗೆಲೆನ್ ಗುರ್ತ ಪತ್ತ್ದಿತ್ತ್ದ್, ಅಲ್ಪ ಗಲೇಜಿ ನೀರ್ ಸೀದಾ ನೇತ್ರಾವತಿ ಸುದೆಕ್ ಸೇರೊಂದುಂಡು, ಉಂದು ನೀರ್ ಮಲಿನ ಆದ್ ಸಾಂಕ್ರಾಮಿಕ ಸೀಕ್ಲು ಪಗರುನ ಪೋಡಿಗೆನ್ ಎಚ್ಚ ಮಲ್ದ್ಂಡ್. ಆಂಡಲಾ, ಬಂಟ್ವಾಳ ಪುರಸಭೆ, ಜಿಲ್ಲಾಡಳಿತ ಬೊಕ್ಕ ಕುಡ್ಲ ಮಹಾನಗರ ಪಾಲಿಕೆ ಸೇರ್ದ್ ಸಂಬಂಧಿತಿನ ಅಧಿಕಾರಿಲು ಈ ವಿಷಯೊದ ಬಗೆಟ್ ಮನಿಪಂದೆ ಕುಲ್ದೆರ್.
ಪರ್ಯೆರ ಪೋಪುನ ನೀರ್ನ್ ಫಿಲ್ಟರ್ ಮಲ್ತ್ದ್ ಸಂಸ್ಕರಣೆ ಮಲ್ತ್ಂಡಲಾ, ಸುದೆಟ್ ಪಾಂಬುನ ಕಜವು, ಗೋಡ್ಯುನ ಗಲೇಜಿ ನೀರ್, ಪ್ಲಾಸ್ಟಿಕ್ ಬಾಟ್ಲಿಲೆನ್ ತೂನಗ ಏರೆಗ್ಲಾ ಪೋಡಿಗೆ ಆವಂದೆ ಕುಲ್ಲಂದ್. ಬಿ.ಸಿ. ರೋಡ್, ಮಾಪತ್ ಲಾಲ್ ಲೇಔಟ್, ಆರಾಧ್ಯ ಲೇಔಟ್, ಬಸ್ತಿಪಡ್ಪು, ಕಂಚಿಕಾರಪೇಂಟೆ, ಗುಡ್ಡೆ, ಬಂಟ್ವಾಳ ಬಡ್ಡಕಟ್ಟ, ಬೊಕ್ಕ ತಿರುಮಲ ವೆಂಕಟರಮಣ ದೇಲಂತಡೆದ ಕೈತಲ್ ಅಂಚೆನೇ ಪಾಣೇರ್ದ ಕೆಲ ಜಾಗೆಲೆಡ್ ಎಚ್ಚಾದ್ ಈ ಕಜವು, ಗಲೇಜಿ ನೀರ್ ಸೇರೊಂದುಲ್ಲ.
ಬಂಟ್ವಾಳ ಪುರಸಭೆಕ್ ಅಂಡರ್ಗ್ರೌಂಡ್ ಡ್ರೈನೇಜ್ (ಯುಜಿಡಿ) ಯೋಜನೆಗ್ 2011 ಟ್ 16.62 ಕೋಟಿ ರೂ. ಅನುಮೋದನೆ ಕೊರ್ದಿತ್ತ್ಂಡಲಾ, ಈ ಯೋಜನೆ ಒಂಜಿ ದಶಕ ಕರೀಂಡಲಾ ಅರ್ದೊಡೇ ಒರಿದ್ಂಡ್.
56.54 ಕೋಟಿ ರೂ.ಗ್ ಅನುಮೋದನೆ ಗೆತೊಂದಿನ ಯುಜಿಡಿ ಯೋಜನೆದ ರಡ್ಡನೇ ಹಂತೊಲಾ ಅನುಮೋದನೆ ತಿಕ್ಕ್ದ್ ಒಂಜಿ ವರ್ಸ ಕರಿಂಡಲಾ ನನಲಾ ಸುರು ಆತಿಜಿ.
ಬಂಟ್ವಾಳ ಬೊಕ್ಕ ಕುಡ್ಲಡ್ ಸಾರಗಟ್ಲೆ ಜನ ನೇತ್ರಾವತಿದ ನೀರ್ನೇ ನಂಬುದು ಇಪ್ಪುನೆರ್ದಾವರ, ಅಧಿಕಾರಿಲು ಬೇಗೊಡೇ ಪಿರಿಕಟ್ಟ್ದ ಕ್ರಮ ಗೆತೊನೊಡು ಪನ್ದ್ ಮುಲ್ಪದಕುಲು ಒತ್ತಾಯ ಮಲ್ತೊಂದುಲ್ಲೆರ್.
Image credit: Daijiworld