Last updated on April 8th, 2025 at 08:44 am
ಬೆಂಗಳೂರು: ಕುಡ್ಲ- ಕಾರ್ಲದ ನಡುಟು ನಾಲ್ ಕೆಎಸ್‌ಆರ್‌ಟಿಸಿ ಬಸ್‌ಲೆಗ್ ದಿನೊಟು ಐನ್ ಸಿಂಗಲ್ ಟ್ರಿಪ್‌ಗ್ ಪೊಸ ಪರ್ಮಿಟ್ ಕೊರ್ತಿನ ಕ್ರಮೊನು ಪ್ರಶ್ನೆ ಮಲ್ತ್‌ದ್ ಸಂದಾದಿನ ಅರ್ಜಿದ ಬಗೆಟ್ ಸರಕಾರೊಗು ಹೈಕೋರ್ಟ್ ನೋಟಿಸ್ ಜಾರಿ ಮಲ್ದ್ಂಡ್.
ಈ ಬಗೆಟ್ ಪ್ರೈವೇಟ್ ಬಸ್‌ದ ದನಿ, ಕಾಪು ನಿವಾಸಿ ವಿಜಯ ಎಚ್. ತಂತ್ರಿ ಬೊಕ್ಕ ಬೇತೆಕುಲು ಸಂದಾದಿನ ತಕರಾರ್ ಅರ್ಜಿನ್ ನ್ಯಾ| ಬಿ.ಎಂ. ಶ್ಯಾಮ್‌ ಪ್ರಸಾದ್ ಮೇರ್ ಇತ್ತಿನ ಏಕಸದಸ್ಯ ನ್ಯಾಯಪೀಠ ಸೋಮಾರ ವಿಚಾರಣೆ ಮಲ್ತ್ಂಡ್. ಒಂತೆ ಪೊರ್ತು ವಾದ-ಪ್ರತಿವಾದ ಕೇನ್ಡಿನ ನ್ಯಾಯಪೀಠ, ಅರ್ಜಿದ ಬಗೆಟ್ ಕೆಎಸ್‌ಆರ್‌ಟಿಸಿ ವ್ಯವಸ್ಥಾಪಕ ನಿರ್ದೇಶಕೆ, ದಕ್ಷಿಣ ಕನ್ನಡ ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರೊದ ಅಧ್ಯಕ್ಷೆರೆಗ್ ಬೊಕ್ಕ ಕಾರ್ಯಂತೆರೆಗ್ ನೋಟಿಸ್ ಕೊರ್ತುಂಡು.
ಪೊಸ ಪರ್ಮಿಟ್ ಕೊರ್ಯೆರ ದುಂಬು “ನೂತನ ಸಮಗ್ರ ಏರಿಯಾ ಯೋಜನೆ-2019”ದ ಪ್ರಕಾರ ಟ್ರಾನ್ಸ್‌ಪೋರ್ಟ್ ಡಿಮ್ಯಾಂಡ್‌ದ ಬಗೆಟ್ ಜಂಟಿ ಸಮೀಕ್ಷೆ ಮಲ್ತ್‌ದ್ಂಡಾ ಪನ್ಪಿನ ವಿವರಣೆ ಕೊರ್ಯೆರ ಸರಕಾರೊಗು ನಿರ್ದೇಶನ ಕೊರ್ದು ವಿಚಾರಣೆನ್ ಎ. 21ಕ್ ಲೆತ್ತ್‌ದೆರ್. ಅತ್ತಂದೆ, ಈ ಪೊಸ ಟ್ರಿಪ್‌ಲೆಗ್ ಪೊರ್ತುಪಟ್ಟಿ ಗೊತ್ತುಮಲ್ಪುನ ಬಗೆಟ್ ದ. ಕ. ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರೊದ ಕಾರ್ಯದರ್ಶಿ ಎ. 8ದಾನಿ ಲೆತ್ತಿನ ಇನಯೊದ ನಿರ್ಣಯ ನ್ಯಾಯಂತಡೆದ ನನದ ಆದೇಶೊದ ಅಡಿಕ್ ಬರ್ಪುಂಡು ಪನ್ದ್‌ಲಾ ನ್ಯಾಯಂತಡೆ ಸ್ಪಷ್ಟ ಮಲ್ದ್ಂಡ್. ಅರ್ಜಿದಾರೆರೆ ಕಡೆರ್ದ್ ಅಭಿಜಿತ್ ಹಾನಹಳ್ಳಿ ವಕಾಲತ್ ಮಲ್ತೆರ್. ಪೆರಿಯ ವಕೀಲೆ ವಿಕ್ರಂ ಹುಯಿಲಗೋಳ ವಾದ ಮಂಡನೆ ಮಲ್ದೆರ್.
ಅರ್ಜಿದಾರೆರೆ ವಾದ ಎಂಚಿನ?
ಕುಡ್ಲ- ಕಾರ್ಲದ ನಡುಟು ನಾಲ್ ಕೆಎಸ್‌ಆರ್‌ಟಿಸಿ ಬಸ್‌ಲೆಗ್ ದಿನೊಟು 5 ಸಿಂಗಲ್ ಟ್ರಿಪ್‌ಲೆಗ್ ಪೊಸ ಪರ್ಮಿಟ್ ಮಂಜೂರು ಮಲ್ತ್‌ದ್ ಕೆಎಸ್‌ಆರ್‌ಟಿಸಿ ವ್ಯವಸ್ಥಾಪಕ ನಿರ್ದೇಶಕೆರ್ 2025ಣ ಮಾ. 17ತಾನಿ ಅಧಿಸೂಚನೆ ಕೊರ್ದಿತ್ತೆರ್. ಉಂದು ‘ನೂತನ ಸಮಗ್ರ ಏರಿಯಾ ಯೋಜನೆ-2019’ಗ್ ತದ್ವಿರುದ್ಧವಾದಿತ್ತ್ ದ್, ಪ್ರೈವೇಟ್ ಬಸ್‌ದಕಲೆನ ವಾದೊಗು ಕೆಬಿಕೊರಂದೆ ಏಕಪಕ್ಷೀಯವಾದ್ ಅಧಿಸೂಚನೆ ಪಿದಡ್ಪಾದೆರ್ ಪನ್ದ್ ಅರ್ಜಿದಾರೆರೆ ವಾದ.