Last updated on April 2nd, 2025 at 12:03 pm
ಬಜ್ಪೆ, ಎ. 02: ಇಲ್ಲಡ್ 16 ಸಿಸಿಟಿವಿ ಕ್ಯಾಮರಾ ಇತ್ತ್ಂಡಲಾ ಕ್ಯಾಮರಾ ಇಜ್ಜಂದಿನ ಕಡೆರ್ದ್ ಇಲ್ಲದುಲಯಿ ಪೊಗ್ಗುದು ಇಲ್ಲಡಿತ್ತಿನ ಒಂಜಿ ಕೆಜಿಗ್ಲಾ ಎಚ್ಚಿನ ಪದ್ದೈ ಬಂಗಾರ್ ಕಂಡಿನ ನಡಕೆ ಬಜ್ಪೆ ಪೊಲೀಸ್ ಸ್ಟೇಶನ್‌ ಸೀಮೆದ ಪೆರ್ಮುದೆಡ್ ಅಕಗಾರೆ ವರದಿ ಆತ್ಂಡ್.
ಪೆರ್ಮುದೆ ನಿವಾಸಿ ಪ್ರವೀಣ್ ಪಿಂಟೊ ಪನ್ಪಿನಾರೆನ ಇಲ್ಲಡ್ ಈ ಕಲ್ವೆ ನಡತ್‌ದ್ಂಡ್, ಕಲ್ವೆರ್ ಸುಮಾರ್ 1.080 ಕೆಜಿದ ಅಂದಾಜಿ 80 ಲಕ್ಷ ರೂ.ಮೌಲ್ಯೊದ ಬಂಗಾರ್ ಲಕ್ಕಾದೆರ್ ಪನ್ದ್ ತೆರಿದ್ ಬೈದ್ಂಡ್. ಪೆರ್ಮುದೆದ ಜಾನ್ವಿನ್ ಪಿಂಟೋ ಬೊಕ್ಕ ಆರೆನ ಮಗೆ ಪ್ರವೀಣ್ ಪಿಂಟೋ ಕುವೈತ್‌ಡ್ ಇತ್ತ್‌ದ್, ಇಲ್ಲಡ್ ಏರ್ಲಾ ಇಜ್ಜಂಡ್. ಮೊಕ್ಲೆನ ಇಲ್ಲದ ಸುತ್ತ 16 ಸಿಸಿ ಕೆಮರಾ ಇತ್ತ್ಂಡಲಾ, ಕೆಮರಾ ಇಜ್ಜಂದಿನಂಚಿರ್ದ್ ಬತ್ತ್‌ದ್ ಕೆಮರಾದ ದಿಕ್ಕ್‌ನ್ ಪಗತ್‌ದ್ ಕಂಡಿದ ಕರ್ಬದ ರಾಡ್‌ನ್ ಪೊಲಿತ್‌ದ್ ಕಲ್ವೆರ್ ಇಲ್ಲ್‌ದುಲಯಿ ಪೊಗ್ಗುದೆರ್.
ಮಾರ್ಚ್ 31ತ ರಾತ್ರೆರ್ದ್ ಎಪ್ರಿಲ್ 1ತ ಕಾಂಡೆದುಲಯಿ ಈ ನಡಕೆ ನಡತ್‌ದ್ಂಡ್. ಇಲ್ಲದ ಒಂಜಿ ಅದೆತ ಕರ್ಬದ ಸರಳ್‌ಲೆನ್ ತುಂಡು ಮಲ್ತ್‌ದ್ ಉಲಯಿ ಬತ್ತಿನ ಕಲ್ವೆರ್ ಅದೆಟ್ ಇತ್ತಿನ ಕಪಾಟ್ ಪುಡತ್‌ದ್ ಬಂಗಾರ್ ಕಂಡ್‌ದೆರ್ ಪನ್ದ್ ತೆರಿದ್ ಬೈದ್ಂಡ್.
ಈ ಇಲ್ಲಡ್ ಮುಧೋಳ, ಜರ್ಮನ್‌ ಶೆಫ‌ರ್ಡ್‌ ಸೇರ್ದ್ 8 ಸಾಂಕುನ ನಾಯಿಲು ಉಲ್ಲ. ಐಕ್ಲೆನನ ಕಣ್ಣ್ ತಪ್ಪಾದ್ ಈ ಬೇಲೆ ಮಲ್ದೆರ್. ಲಾಕರ್‌‌ಡ್ ಇತ್ತಿನ ಪಾಕ ಬಂಗಾರ್, ವಾಚ್‌‌ಲೆನ್ ಕಂಡ್‌ದೆರ್. ಲಾಕರ್‌ ಕೀ ಗವಸ್‌ದ್ ಅವೆನ್ ಓಪನ್ ಮಲ್ದಿನ ತೋಜಿದ್ಂಡ್. ನಿಚ್ಚೊಲಾ ಇಲ್ಲದ ನಾಯಿಲೆಗ್ ತಿನ್ಯೆರ ಪಾಡೆರ ಇರ್ವೆರ್ ಬೇಲೆದಕುಲು ಬರ್ಪೆದೆರ್. ಏಪೊಲ್ದ ಲೆಕ ಅಕುಲು ಕಾಂಡೆ ನಾಯಿಲೆಗ್ ತಿನ್ಯೆರ ಪಾಡ್ರ ಬನ್ನಗ ನಡಕೆ ಬೊಲ್ಪುಗು ಬೈದ್ಂಡ್. ಬೊಕ್ಕ ಅಕುಲು ಕುವೈತ್‌ಡ್ ಇಪ್ಪುನ ದನಿಕ್ಲೆಗ್ ಒಲವು ಕೊರ್ತೆರ್. ಬಜ್ಪೆ ಪೊಲೀಸ್ ಸ್ಟೇಶನ್‌‌ಡ್ ಪ್ರಕರಣ ದಾಕಲಾದಿತ್ತ್‌ದ್, ಜಡ್ತೆ ಮಲ್ತೊಂದುಲ್ಲೆರ್.