Last updated on April 28th, 2025 at 09:41 am
ಮಂಜೇಶ್ವರ, ಏ.28: ಬೈಕ್‌ಡ್ ಪೋವೊಂದಿತ್ತಿನ ಜವನಗ್ ಗುಂಡು ಬೂರ್ದಿನ ನಡಕೆ ಕೇರಳದ ಮಂಜೇಶ್ವರ ಪೊಲೀಸ್ ಸ್ಟೇಶನ್ ಸೀಮೆದ ಮುಡಿಪು ಮುಟ್ಟದ ಕಜೆಪದವು ಪನ್ಪಿನಲ್ಪ ಕೋಡೆ ರಾತ್ರೆ ನಡತ್‌ದ್ಂಡ್. ಬಾಕ್ರಬೈಲ್ ನಡೀಬೈಲು ನಿವಾಸಿ ಸವಾದ್ (20) ಪನ್ಪಿನಾಯನ ಮಿತ್ತ್ ಶೂಟೌಟ್ ನಡತ್‌ದ್ಂಡ್. ಕೋಡೆ ಕತ್ತಲೆ ಬೂರ್ನಗ ಬೈಕ್‌ಡ್ ಇಲ್ಲಗ್ ಪೋವೊಂದುಪ್ಪುನ ಪೊರ್ತುಡು ಕಜೆಪದವು ತಿರ್ಗೆಲ್‌ಡ್ ಈ ಶೂಟೌಟ್ ನಡತ್‌ದ್ಂಡ್.
ಕಾರ್‌ಗ್ ಬುಲೆಟ್ ಪೊಗ್ಗಿನ ಸವಾದ್‌ನ್ ಅಪ್ಪಗನೇ ಆಸ್ಪತ್ರೆಗ್ ದಾಕಲ್ತ್‌ದೆರ್. ಬೋಂಟೆಗ್ ಬತ್ತಿನಕುಲು ದಕ್ಕಿನ ಬೆಡೀ ತತ್ತ್‌ದ್ ಬೂರ್ದಿನ ಸಾಧ್ಯತೆ ಇಪ್ಪು ಪನ್ದ್ ಮಂಜೇಶ್ವರ ಜಿಲ್ಲಾ ಪಂಚಾಯತ್ ಮಾಜಿ ಸದಸ್ಯೆ ಹರ್ಷಾದ್ ವರ್ಕಾಡಿ ಮಾಧ್ಯಮೊಲೆಗ್ ತೆರಿಪಾದೆರ್. ಕುಡೊಂಜಿ ಮೂಲೊಲೆನ ಪ್ರಕಾರ ಗಾಂಜಾ ವ್ಯಸನಿಲು ಈ ಬೇಲೆ ಮಲ್ತಿಪ್ಪುನ ಸಾಧ್ಯತೆಲಾ ಉಂಡುಗೆ.
ಬೈಕ್‌ಡ್ ಪೋವೊಂದುಪ್ಪುನ ಪೊರ್ತುಡು ಜನದಾಂತಿ ಜಾಗೆಡ್ ಗಾಡಿದ ಹೆಡ್ಲೈಟ್ ತೋಜಿದಿತ್ತ್‌ದ್, ಅವೆನ್ ತೂದು ಸವಾದ್ ಬೈಕ್ ಉಂತಾಯಿನೆಕ್ ಶೂಟೌಟ್ ನಡತ್‌ದ್ಂಡ್ ಪನ್ಪಿನ ಪಾತೆರೊಲುಲಾ ಕೇನ್ದ್ ಬರೊಂದುಲ್ಲ. ಮಂಜೇಶ್ವರ ಸ್ಟೇಶನ್ ಪೋಲೀಸೆರ್ ಕೇಸ್ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್. ಮಂಜೇಶ್ವರ ಶಾಸಕೆ ಎ.ಕೆ.ಎಂ. ಅಶ್ರಫ್, ಜಿಲ್ಲಾ ಪಂಚಾಯತ್ ಮಾಜಿ ಸ್ಥಾಯಿ ಸಮಿತಿ ಅಧ್ಯಕ್ಷೆ ಹರ್ಷಾದ್ ವರ್ಕಾಡಿ ಮಾತ ಜಾಗೆಗ್ ಭೇಟಿ ಕೊರ್ತೆರ್.