Last updated on April 9th, 2025 at 01:03 pm
ಕೋಡೆ ಕರ್ನಾಟಕ ರಾಜ್ಯೊದ ಸೆಕೆಂಡ್ ಪಿಯುಸಿ ಫಲಿತಾಂಶ ಬತ್ತ್‌ದ್ಂಡ್. ನಮನ ತುಳುನಾಡ್‌ದ ಜೋಕುಲು ಎಡ್ಡೆಡ್ ಪರೀಕ್ಷೆ ಬರೆತೆರ್ ಪಾಸ್ ಆತಿನಕುಲೆಗ್ ಎಡ್ಡೆಪ್ಪು ಬಯಕೊಂದು, ಪಾಸ್ ಆವರೆ ಆವಂದಿನಕುಲೆಗ್ ಕುಡೊರ ಪರೀಕ್ಷೆ ಕಟ್ಟ್‌ದ್ ಎಡ್ಡೆಡ್ ಬರೆಲೆ ಪನ್ಪಿ ದೈರೊದ ಪಾತೆರ ಪನ್ಡೊಂದು ಸೈನ್ಸ್ ಗೆತೊಂದಿನಕುಲು ನನ ದಾದ ಮನ್ಪೊಲಿ ಪನ್ದ್ ಪನ್ಪ.
1. ಇಂಜಿನಿಯರಿಂಗ್ (Engineering)
2. ಮೆಡಿಸಿನ್ (MBBS)
3. ಡೆಂಟಿಸ್ಟ್ರಿ (BDS – Dentistry)
4. ಫಾರ್ಮಸಿ (Pharmacy)
5. ವಿಜ್ಞಾನ (B.Sc)
6. ಕೃಷಿ ವಿಜ್ಞಾನ (Agriculture Science)
7. ಬಯೋ ಟೆಕ್ನಾಲಜಿ (Biotechnology)
8. ನರ್ಸಿಂಗ್ (B Sc Nursing)
9. ಪರಿಸರ ವಿಜ್ಞಾನ (Environmental Science)
10. ಆರ್ಕಿಟೆಕ್ಚರ್ (Architecture)
11. Computer Science (BCA /B.Sc)
ಪಿಯುಸಿ ಡ್ Science ಪಾಸ್ ಮಲ್ತಿನೇ ವಿದ್ಯಾರ್ಥಿಲೆಗ್ ಪಾಕ ಕಸುಬುಲೆನ ಕ್ಷೇತ್ರೊಲೆಗ್ ಪೋವೊಲಿ. ಎಚ್ಚಿನಕುಲು ಇಂಜಿನಿಯರಿಂಗ್ ಬೊಕ್ಕ ಮೆಡಿಕಲ್‌ದಂಚಿ ಪೋಯೆರ್ನ್ಡಲಾ ಕಸುಬುಗು ನನಲಾತ್ ಸಾದಿಲು ಉಲ್ಲ. ಈ ಆರ್ಟಿಕಲ್‌ಡ್ ಎಚ್ಚಾದ್ ಸೆಕೆಂಡ್ ಪಿಯುಸಿ ಆದ್ ಗೆತೊನುನಂಚಿನ ಕೋರ್ಸ್‌ಲೆನ ಬಗೆಟ್ ಪನ್ಪ. ಉಂದು ನಿಕಲೆಗ್ ಬೋಡಾಪಿನ/ಒಂಬುನ ಕ್ಷೇತ್ರೊನು ಅಜಪೆರ ಸಕಾಯ ಆವು.
1. ಇಂಜಿನಿಯರಿಂಗ್ (Engineering)
ಇಂಜಿನಿಯರಿಂಗ್ ಎಚ್ಚಿನ ಸೈನ್ಸ್ ಮಲ್ದಿನ ವಿದ್ಯಾರ್ಥಿಲು ಗೆತೊನುನು ಫೀಲ್ಡ್ ಆದುಂಡು. ಇಂಜಿನಿಯರಿಂಗ್‌ದ ಉಲಯಿ ಮೆಕ್ಯಾನಿಕಲ್, ಎಲೆಕ್ಟ್ರಿಕಲ್, ಸಿವಿಲ್, ಕಂಪ್ಯೂಟರ್ ಸೈನ್ಸ್, ಕೆಮಿಕಲ್ ಇಂಜಿನಿಯರಿಂಗ್, ಎಲೆಕ್ಟ್ರಾನಿಕ್ಸ್ ಇಂಚ ಪಾಕ ಸ್ಪೆಷಲೈಸೇಷನ್ ಉಲ್ಲ. ಇಂಚಿನ ಸಾಂಪ್ರದಾಯಿಕ ಕ್ಷೇತ್ರೊಲು ಅತ್ತಂದೆ ನ್ಯಾನೋ ಟೆಕ್ನಾಲಜಿ, ಡೇಟಾ ಸೈನ್ಸ್, ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್‌, ಮರೈನ್, ಏರೋನಾಟಿಕ್ಸ್ ಇಂಚಿನ ಒಂತೆ ‘ಸಪುರ’ ದ ಕ್ಷೇತ್ರೊಲ್ಲಾ ಉಲ್ಲ. IIT, NIT ದಂಚಿನ ಮಲ್ಲ ಮಲ್ಲ ಇಂಜಿನಿಯರಿಂಗ್ ಕಾಲೇಜಿಲೆಡ್ ಸೀಟ್ ತಿಕ್ಯೆರೆ JEE Main ಬೊಕ್ಕ JEE Advanced ಇಂಚಿನ ಪರೀಕ್ಷೆ ಪಾಸ್ ಆವೊಡು. ರಾಜ್ಯ ಮಟ್ಟೊಡು CET ದಂಚಿನ ತಾಂತ್ರಿಕ ಗೇನೊ ಬೊಕ್ಕ ಪ್ರಾಬ್ಲಂ ಸಾಲ್ವಿಂಗ್ ಕೌಶಲ್ಯೊನು ಪರೀಕ್ಷಿಪುನ ಪರೀಕ್ಷೆ ಬರೆಯೊಡು. ಕೆಲ ಕಾಲೇಜಿಲೆಗ್ ಅಕ್ಲೆನವೇ ಆಯಿನ ಪ್ರವೇಶ ಪರೀಕ್ಷೆಲು ಇಪ್ಪುವ.
2. ಮೆಡಿಸಿನ್ (MBBS)
ಆರೋಗ್ಯ ಕ್ಷೇತ್ರೊಡು ಬೇಲೆ ಮನ್ಪೊಡು, ಕುಡೊರ್ಯನ ಸೀಕ್, ಬೇನೆ ಗುನ ಮನಾಪೊಡು ಪನ್ದ್ ಇಪ್ಪುನಕುಲೆಗ್ ಉಂದು ಎಡ್ಡೆ ಕ್ಷೇತ್ರ. ಡಾಕ್ಟರ್ ಆಪಿನಕ್ಲೆಗ್ MBBS ಸಾಮಾನ್ಯ ಡಿಗ್ರಿ ಆದುಪ್ಪುಂಡು, ಅವೆರ್ದ್ ಬೊಕ್ಕ ಸರ್ಜರಿ, ಪೀಡಿಯಾಟ್ರಿಕ್, ಕಾರ್ಡಿಯೋಲಜಿ ಇಂಚ ಪಾಕ ಸ್ಪೆಷಲೈಸೇಷನ್ ಉಲ್ಲ. MBBS ಮನ್ಪೆರಗ್ ವಿದ್ಯಾರ್ಥಿಲು NEET(National Eligibility cum Entrance Test) ಬರೆಯೊಡಾಪುಂಡು. ಆರೋಗ್ಯ ಕ್ಷೇತ್ರೊಡು ಬೆನ್ಪುನಕ್ಲೆಗ್ ಸಮಾಜೊಡು ಎಡ್ಡೆ ಗೌರವೊಲಾ ಇಪ್ಪುಂಡು. ಆಸ್ಪತ್ರೆಲೆಡ್, ಕ್ಲಿನಿಕ್‌ಲೆಡ್, ಪ್ರೈವೇಟ್ ಪ್ರಾಕ್ಟೀಸ್‌ಲೆಡ್ ತನ್ನ ಪ್ರೊಫೆಷನ್ ಕಟ್ಟೊಲಿ.
3. ಡೆಂಟಿಸ್ಟ್ರಿ (BDS – Dentistry)
ಡೆಂಟಿಸ್ಟ್ರಿ ಅತ್ತ್ಂಡ ದಂತವೈದ್ಯಶಾಸ್ತ್ರ ಬಾಯಿದ, ಕೂಲಿದ ಆರೋಗ್ಯ, ಸರ್ಜರಿ, ಮರ್ದ್‌ಗ್ ಸಂಬಂಧಿತಿನ ಆರೋಗ್ಯ ಕ್ಷೇತ್ರ ಆದುಂಡು. ಈ ಫೀಲ್ಡ್‌ಗ್ ಬರ್ಪಿನಕುಲು ಪಿಯುಸಿ ಮಲ್ತ್‌ದ್ NEET ಎಕ್ಸಾಂ ಬರೆದ್ BDS (Bachelor of Dental Surgery) ಕೋರ್ಸ್ ಮನ್ಪೊಡು. ಈ ಕ್ಷೇತ್ರೊಡ್ಲಾ ಆಸ್ಪತ್ರೆ, ಕ್ಲಿನಿಕ್, ಪ್ರೈವೇಟ್ ಪ್ರಾಕ್ಟೀಸ್, ಪ್ರಿವೆಂಟಿವ್ ಕೇರ್, ಕಾಸ್ಮೆಟಿಕ್ ಪ್ರೊಸೀಡರ್ ಇಂಚ ತನ್ನ ಕಸುಬು ಕಟ್ಟೊನೊಲಿ. ಜನೊಕುಲೆಡ ಬಾಯಿದ, ಕೂಲಿದ ಆರೋಗ್ಯದ ಬಗೆಟ್ ಗುಮನ ಎಚ್ಚ ಆವೊಂದುಪ್ಪುನೆರ್ದಾವರ BDS ಮಲ್ತಿನಕ್ಲೆಗ್ ಡಿಮ್ಯಾಂಡ್‌ಲಾ ಎಚ್ಚ ಆವೊಂದುಂಡು.
4. ಫಾರ್ಮಸಿ (Pharmacy)
ಆರೋಗ್ಯ ಕ್ಷೇತ್ರೊಡು ಬೆನೋಡು ಆಂಡ ಡಾಕ್ಟರ್ ಮಾತ ಎನರ್ದ್ ಬಲ್ಲಿ ಪನ್ಪಿನಕ್ಲೆಗ್ ಫಾರ್ಮಸಿ ಎಡ್ಡೆ ಅಜಪು. B.Pharm ಮಲ್ತಿನಕ್ಲೆಗ್ ಡ್ರಗ್ ಫಾರ್ಮುಲೇಷನ್, ಟೆಸ್ಟಿಂಗ್, ಸೇಫ್ಟಿ ಇಂಚಿನ ಕೌಶಲ್ಯೊಲು ಇಪ್ಪುವ. ರಿಸರ್ಚ್ ಬೊಕ್ಕ ಪೊಸ ಮರ್ದ್‌ಲೆನಾ ಮನ್ಪುನ ಬೇಲೆಲಾ ಮನ್ಪೊಲಿ. B.Pharm ಮಲ್ಪೆರ ರಾಜ್ಯ ಅತ್ತ್ಂಡ ಯುನಿವರ್ಸಿಟಿ ಮಟ್ಟೊದ ಪ್ರವೇಶ ಪರೀಕ್ಷೆಲೆನ್ ಬರೆಯೊಡು. ಫಾರ್ಮಸಿ ಮಲ್ತಿನಕುಲು ಆಸ್ಪತ್ರೆಲೆಡ್, ಫಾರ್ಮಾಸಿಟಿಕಲ್ ಕಂಪೆನಿಲೆಡ್, ರೆಗ್ಯುಲೇಟರಿ ಏಜೆನ್ಸಿಲೆಡ್, ಶೈಕ್ಷಣಿಕ ಕ್ಷೇತ್ರೊಡು ಬೇಲೆ ಮಲ್ಪೊಲಿ.
5. ವಿಜ್ಞಾನ (B.Sc)
ಎಚ್ಚಿನ ವಿದ್ಯಾರ್ಥಿಲು ಗೆತೊನುನ ಕುಡೊಂಜಿ ಫೀಲ್ಡ್ B.Sc ಪ್ಯೂರ್ ಸೈನ್ಸ್ ಕ್ಷೇತ್ರೊಲಾಯಿನ ಫಿಸಿಕ್ಸ್, ಕೆಮಿಸ್ಟ್ರಿ, ಬಯೋಲಜಿ, ಗಣಿತ ಇಂಚಿನೆಕ್ ಸಾದಿ ಮಲ್ತ್ ಕೊರ್ಪುಂಡು. ರಿಸರ್ಚ್, ಟೀಚಿಂಗ್ ಮನ್ಪುನ ಉಮೇದ್ ಇತ್ತಿನಕ್ಲೆಗ್ ಉಂದು ಎಡ್ಡೆ ಕಲ. B.Sc ಮಲ್ತ್‌ದ್ M.Sc ಬೊಕ್ಕ ಅವೆರ್ದ್ ಮಿತ್ತ Ph.D ಲಾ ಮಲ್ಪೊಲಿ. ರಿಸರ್ಚರ್, ವಿಜ್ಞಾನಿ, ಪ್ರೊಫೆಸರ್, ಲ್ಯಾಬ್ ಟೆಕ್ನಿಷಿಯನ್ ಆವೊಲಿ. ಎಚ್ಚಾದ್ ಸರಕಾರಿ ಏಜೆನ್ಸಿಲು ಪ್ಯೂರ್ ಸೈನ್ಸ್ ಪಿರನಿಲೆ ತಕ್ಲೆನ್ ಬೇಲೆಗ್ ದೆತೊನುವೆರ್.
6. ಕೃಷಿ ವಿಜ್ಞಾನ (Agriculture Science)
ಕೃಷಿ ವಿಜ್ಞಾನ ಒಂಜಿ ಅನನ್ಯ ಬೊಕ್ಕ ಬುಲೆವೊಂದುಪ್ಪುನ ಕ್ಷೇತ್ರ ಆದುಂಡು. ಉಂದೆಟ್ ಬೆನ್ನಿದ ತಂತ್ರೊಲು, ಬುಲೆ ದೆಪ್ಪುನ, ಮಣ್ಣ್‌ದ ಆರೋಗ್ಯ, ಸಮರ್ಥವಾಯಿನ ಬುಲೆ ತಂತ್ರೊಲು ಮಾತ ಬರ್ಪ. B.Sc Agriculture ಮಲ್ತಿನಕುಲು ಆಗ್ರೋಬ್ಯುಸಿನೆಸ್ ಕಂಪೆನಿಲು, ಸರಕಾರೀ ಏಜೆನ್ಸಿಲು, ಸಂಶೋಧನಾ ಸಂಸ್ಥೆಲೆಡ್ ಬೇಲೆ ಮಲ್ಪೊಲಿ. ಈ ಡಿಗ್ರಿದ ಗೇನೊಡು ತನ್ಕುಲೇ ಕೃಷಿ ಸುರು ಮಲ್ತ್‌ದ್ ವರ್ಸೊಡು ಕೋಟಿಗಟ್ಲೆ ಬೆನ್ಪುನಕುಲ್ಲಾ ನಮ್ಮ ನಡುಟು ಉಲ್ಲೆರ್. ಪಸಂದ್ರ ಬೊಕ್ಕ ಗ್ರಾಮೀಣಾಭಿವೃದ್ಧಿ ದಂಚಿ ಒಯ್ಲ್ ಇತ್ತಿನಕುಲು ಈ ಕ್ಷೇತ್ರೊಗು ಬರೊಲಿ.
7. ಬಯೋಟೆಕ್ನಾಲಜಿ (Biotechnology)
ಬಯೋಟೆಕ್ನಾಲಜಿ ಲಾ ಬೀಸೋಡು ಬುಲೆಯೊಂದುಪ್ಪುನ ಒಂಜಿ ಕಲ. ಜೀವಶಾಸ್ತ್ರ ಬೊಕ್ಕ ತಂತ್ರಜ್ಞಾನೊದ ಒಟ್ಟುಸೇರಿಗೆಡ್ ಆರೋಗ್ಯ, ಕೃಷಿ, ಪಸಂದ್ರದ ಎಡ್ಡೆಪು ಇಂಚಿನವು ಉಂದೆತ ಅಡಿಟ್ ಬರ್ಪುಂಡು. ಪಿಯುಸಿ ಆದ್ B.Sc in Biotechnology ಅತ್ತ್ಂಡ B.Tech in Biotechnology ಮಲ್ತ್‌ದ್ ಈ ಕ್ಷೇತ್ರೊಗು ಬರೊಲಿ. ಸಂಶೋಧನೆ, ಫಾರ್ಮಾಸ್ಯುಟಿಕಲ್, ಕೃಷಿ, ಲ್ಯಾಬ್ ಟೆಕ್ನಿಷಿಯನ್, ಜೆನೆಟಿಕ್ ಇಂಜಿನಿಯರಿಂಗ್, ಡ್ರಗ್ ಡೆವಲಪ್ಮೆಂಟ್, ಫುಡ್ ಇಂಡಸ್ಟ್ರಿಡ್ ಬೇಲೆ ಮಲ್ಪೊಲಿ.
8. ನರ್ಸಿಂಗ್ (B.Sc Nursing)
ರೋಗಿಲೆನ ಆರೈಕೆಡ್ ಉಮೇದ್ ಇತ್ತಿನಕ್ಲೆಗ್ ನರ್ಸಿಂಗ್ ಎಡ್ಡೆ ಗೌರವ ಇತ್ತಿನ ಅಂಚೆನೇ ಎಡ್ಡೆ ಡಿಮ್ಯಾಂಡ್ ಇತ್ತಿನ ಕ್ಷೇತ್ರ ಆದುಂಡು. B.Sc Nursing ಮಲ್ತಿನಕುಲು ಆಸ್ಪತ್ರೆಲೆಡ್, ಕ್ಲಿನಿಕ್‌ಲೆಡ್ ರಿಜಿಸ್ಟರ್ಹಡ್ ನರ್ಸ್ ಆದ್ ಬೇಲೆ ಮಲ್ಪೊಲಿ. ಪಿದಯಿ ದೇಶೊಡ್ಲಾ ಎಡ್ಡೆ ಡಿಮ್ಯಾಂಡ್ ಉಂಡು.
9. ಪರಿಸರ ವಿಜ್ಞಾನ (Environmental Science)
ಪರಿಸರ ವಿಜ್ಞಾನ ಪಸಂದ್ರ, ಅವೆನ್ ಒರಿತೊನುನ, ಎಡ್ಡೆಡ್ ತೂವೊನುನ ಬಗೆಟ್ ಇಪ್ಪುನ ಒಂಜಿ ಇಂಟರ್‌ಡಿಸಿಪ್ಲಿನರಿ ಕ್ಷೇತ್ರ ಆದುಂಡು. ಪಸಂದ್ರದ ಬಗೆಟ್ ಸಲಹೆ ಕೊರ್ಪುನ, ಕ್ಲೈಮೇಟ್ ಅನಾಲಿಸ್ಟ್, ಸಂರಕ್ಷಣಾ ವಿಜ್ಞಾನಿ ಇಂಚಿನ ಬೇಲೆಲು ಇಪ್ಪುವ. ಸರಕಾರೀ ಏಜೆನ್ಸಿಲು, NGO, ಸಂಶೋಧನಾ ಸಂಸ್ಥೆಲು, ಪಸೊಂದ್ರದ ಒರಿಪುಗು ಉಂಡಾತಿನ ಸಂಸ್ಥೆಲೆನ ಒಟ್ಟುಗು ಬೇಲೆ ಮಲ್ಪೊಲಿ.
10. ಆರ್ಕಿಟೆಕ್ಚರ್ (Architecture)
ಕಟ್ವಾನೊಲೆನ್ ಕಟ್ಟುನ, ಡಿಸೈನ್ ಮಲ್ಪುನ ಬಗೆಟ್ ಉಮೇದ್ ಇತ್ತಿನಕ್ಲೆಗ್ ಉಂದು ಎಡ್ಡೆ ಕ್ಷೇತ್ರ. ಸೃಜನಾತ್ಮಕ ಕೌಶಲ್ಯದೊಟ್ಟುಗು ತಾಂತ್ರಿಕ ಗೇನ ಗಲಸ್‌ದ್ ಕಟ್ವಾನೊಲೆನ ಡಿಸೈನ್ ಮಲ್ಪುನ, ಅರ್ಬನ್ ಸ್ಪೇಸ್, ಇಂಟೀರಿಯರ್ ಡಿಸೈನ್ ಮಲ್ಪುನ ಆರ್ಕಿಟೆಕ್ಟ್‌ನ ಬೇಲೆ. ಈ ಕ್ಷೇತ್ರೊಗು ಬರ್ಪಿನಕುಲು NATA ಎಕ್ಸಾಂ ಅತ್ತ್ಂಡ JEE Main Paper 2 ಬರೆಯೊಡಾಪುಂಡು.
11. Computer Science (BCA /B.Sc)
ಇನಿತ ಡಿಜಿಟಲ್ ಕಾಲೊಡು ಕಂಪ್ಯೂಟರ್ ಸೈನ್ಸ್ ಪಾಕ ಬೇಲೆಲು ಇತ್ತಿನ ಕ್ಷೇತ್ರ ಆದುಂಡು. Bachelor in Computer Science (B.Sc) ಅತ್ತ್ಂಡ Bachelor of Computer Applications (BCA) ಪ್ರೋಗ್ರಾಮಿಂಗ್, ಸಾಫ್ಟ್‌ವೇರ್ ಡೆವಲಪ್ಮೆಂಟ್, ಇನ್ಫಾರ್ಮೇಷನ್ ಟೆಕ್ನಾಲಜಿ ದ ಬಗೆಟ್ ಎಡ್ಡೆ ಪಾಯ ಕಟ್ಟ್‌ದ್ ಕೊರ್ಪುಂಡು. ಸಾಫ್ಟ್‌ವೇರ್ ಡೆವಲಪರ್, ಐಟಿ ಕಂಸಲ್ಟಂಟ್, ಡೇಟಾ ಅನಲಿಸ್ಟ್, ಸೈಬರ್ ಸೆಕ್ಯೂರಿಟಿ, ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್‌, ಡೇಟಾ ಸೈನ್ಸ್, ಮೆಷಿನ್ ಲರ್ನಿಂಗ್, ಇಂಚ ಪಾಕ ನಮೂನೆದ ಬೇಲೆಲು ಈ ಕ್ಷೇತ್ರೊಡು ಉಲ್ಲ.
ಈ ಒಲವುನು ನಿಕ್ಲೆನ ಗುರ್ತೊಡು ಇಪ್ಪುನ ಸೆಕೆಂಡ್ ಪಿಯುಸಿ ಸೈನ್ಸ್ ಪಾಸ್ ಮಲ್ದಿನ ಜೋಕುಲೆಡ ಪಟ್ಟೊನ್ಲೆ. ಅಕಲೆಗ್ ಬೋಡಡಾಪಿನ ಫೀಲ್ಡ್ ಅಜತೊನ್ರ ಸಕಾಯ ಮಲ್ಪುಲೆ. ಬೇಗೊಡೇ ಕಾಮರ್ಸ್ ಬೊಕ್ಕ ಆರ್ಟ್ಸ್ ಮಲ್ತಿನಕ್ಲೆಗ್ ನನ ದಾದ ಕಲ್ಪೊಲಿ ಪನ್ಪಿನ ಆರ್ಟಿಕಲ್ ಬರ್ಪುಂಡು.
ತುಳು ಸಮಾಚಾರದ ವಾಟ್ಸಾಪ್ ಗ್ರೂಪ್‌ಗ್ ಗೋಡ್ಯೆರ ಈ ಲಿಂಕ್ ಒತ್ತುಲೆ: https://chat.whatsapp.com/Ex0F42GZ7uHFMu06kX7tds