Last updated on April 2nd, 2025 at 10:41 am
ಉತ್ತರಪ್ರದೇಶ: ಒಂಜಿ ಕಾಲೊಡು ಅಪ್ಪೆಯರ್ಲು ಪತ್ತ್ ಪದಿನೈನ್ ಜೋಕುಲೆನ್ ಪೆದ್ದುನ ಕಾಲ ಇತ್ತ್ಂಡ್, ಆಂಡ ನಮ್ಮ ದೇಶೊಡು ಕುಟುಂಬ ಯೋಜನೆ ಮಾತ ತೊಡಂಗಿಬೊಕ್ಕ, ಜನ ರಡ್ಡ್ ಅತ್ತ್ಂಡ ಮೂಜಿ ಜೋಕುಲೆರ್ದ್ ಎಚ್ಚ ಪೆದ್ದುನ ಉಂತಾದೆರ್.
ಆಂಡ, ಉತ್ತರ ಪ್ರದೇಶೊದ ಹಾಪುರ್ ಜಿಲ್ಲೆದ ಮೊಹಲ್ಲಾ ಬಜರಂಗಪುರ ನಿವಾಸಿ ಇಮಾಮುದ್ದೀನ್ ಮೆರೆನ ಬೊಡೆದಿ ಗುಡಿಯಾ 50 ನೇ ವರ್ಸ ಪ್ರಾಯೊಡು ತನ್ನ 14 ನೇ ಬಾಲೆನ್ ಪೆದ್ದ್‌ದೆರ್.
ಪೆದ್ದುನ ಬೇನೆಡ್ ಇತ್ತಿನ ಗುಡಿಯಾ ಮೆರೆನ್ ಸುರುಕು ಪಿಲ್ಖುವಾ ಸಿಎಚ್‌ಸಿ ಆಸ್ಪತ್ರೆಗ್ ದಾಕಲ್ತ್‌ದಿತ್ತೆರ್. ಅಲ್ಪದ ಬೈದ್ಯೆರೆ ಸಲಹೆದ ಮಿತ್ತ್ ಗುಡಿಯಾ ಮೆರೆನ್ ಮೀರತ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ, ಪೋವೊಂದುಪ್ಪುನ ಸಾದಿ ನಡುಟೇ ಗುಡಿಯಾ ಮೆರೆಗ್ ಬೇನೆ ಜಾಸ್ತಿ ಆತ್ಂಡ್. ಅಂಚಾದ್, ಆಂಬ್ಯುಲೆನ್ಸ್ ಸಿಬ್ಬಂದಿಲೆನ ಸಕಾಯೊಡು ಆರ್ ಪೊಣ್ಣು ಬಾಲೆನ್ ಪೆದ್ದ್‌ದೆರ್. ಅವೆರ್ದ್ ಬೊಕ್ಕ ಅಪ್ಪೆ ಬೊಕ್ಕ ಬಾಲೆನ್ ಅವ್ವೇ ಆಂಬ್ಯುಲೆನ್ಸ್‌‌ಡ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಅಕಲೆನ ಪರೀಕ್ಷೆ ಮಲ್ತಿನ ಬೈದ್ಯೆರ್ ಅಪ್ಪೆ ಬಾಲೆ ಉಸಾರುಲ್ಲೆರ್ ಪನ್ದ್ ತೆರಿಪಾದೆರ್.