Last updated on April 29th, 2025 at 07:17 am
ಒಡಿಪು, ಎ. 28: ಜಕ್ಕ ಜವನೆರ್ ಹಾರ್ಟ್ ಅಟ್ಯಾಕ್‌ ಆದ್ ತೀರೊಂದುಪ್ಪುನ ಪ್ರಕರಣೊಲು ದಿನೊರ್ದು ದಿನೊಕು ಎಚ್ಚ ಆವೊಂದೇ ಉಲ್ಲ. ಒಡಿಪುಡು ಪುಗರ್ತೆದ ಪಿಲಿ ಏಸ ಪಾಡುನ ಜವನೆ ಒರಿ ಹಾರ್ಟ್ ಅಟ್ಯಾಕ್‌ ಆದ್ ತೀರ್ದೆರ್.
ತೀರ್ದಿನಾರೆನ್ ಒಡಿಪುದ ಅಜ್ಜೆರೆಕಾಡ್ ನಿವಾಸಿ ಅನಿಲ್ ಕುಮಾರ್ (31) ಪನ್ದ್ ಗುರ್ತ ಪತ್ತ್‌ದೆರ್. ಕಾಡಬೊಟ್ಟು ಅಶೋಕ್ ರಾಜ್ ಮೆರೆನ ಕೂಟೊಡು ಪಿಲಿ ನಲಿಕೆಡ್ ಅನಿಲ್ ಕುಮಾರ್ ಪಿಲಿಏಸ ಪಾಡೊಂದಿತ್ತೆರ್. ತನ್ನ ಪಿಲಿ ನಲಿಕೆಗ್ ತನ್ನನೇ ಆಯಿನ ಅಭಿಮಾನಿಲೆನ್ಲಾ ಗೆಂದ್‌ದಿತ್ತೆರ್. ಉಂದೆತ ಒಟ್ಟುಗು ಮೇರ್ ಪೈಂಟಿಂಗ್ ಕಾಂಟ್ರಾಕ್ಟರ್ ಆದ್ ಬೇಲೆ ಮಲ್ತೊಂದಿತ್ತೆರ್. ಮೇರ್ ಇಲ್ಲದಕುಲೆನ್ ಬೊಕ್ಕ ಪಾಕ ಜನ ಪಾಸಾಡಿಲು, ಹಿತೈಷಿಲೆನ್ ಅಗತ್‌ದೆರ್.