Last updated on April 28th, 2025 at 04:20 pm
ಕೋಲಾರ: ಕಾಸ್‌ದ ಆಸೆಗ್ ಬೆಟ್ಟಿಂಗ್ ಕಟ್ಟ್‌ದ್ ಗಂಗರ ಪಾರ್ಟಿಡ್ 5 ಬಾಟ್ಲಿ ಗಂಗಸರೊನು ನೀರ್ ಕೂಟಂದೆ ಪರ್ದ್ ಜವನೆ ಒರಿ ತೀರ್ದಿನ ನಡಕೆ ಕೋಲಾರ ಜಿಲ್ಲೆದ ಮುಳಬಾಗಿಲು ತಾಲೂಕ್‌ದ ಪೂಜಾರಹಳ್ಳಿಡ್ ನಡತ್‌ದ್ಂಡ್.
ಕಾರ್ತಿಕ್ (21) ಗಂಗಸರ ಪರ್ದ್ ತೀರ್ದಿನ ಜವನೆ. ಐನ್ ಬಾಟ್ಲಿ ಗಂಗಸರೊಗು ಒಂಜಿ ಬೊಟ್ಟು ನೀರ್ ಪಾಡಂದೆ ಪರ್ಪೆ ಪನ್ಡ್‌ದ್ ಎದುರುದಾಯಡ 10 ಸಾರ ರೂ. ಕಾಸ್‌ಗ್ ಪಂತ ಕಟ್ಟ್‌ದೆ. ಉಂದುವೇ ಗ್ರಾಮೊದ ವೆಂಕಟರಡ್ಡಿ, ಸುಬ್ರಮಣಿ ಬೊಕ್ಕ ಬೇತೆ ಮೂಜಿ ಜನ ಬೆಟ್ಟಿಂಗ್ ಕಟ್ಟ್‌ದೆರ್.
ಈ ಪೊರ್ತುಡು ಈ 5 ಬಾಟ್ಲಿ ಗಂಗಸರ ರಾ ದೆರ್ತಂಡ ಪತ್ತ್ ಸಾರ ಕೊರ್ಪ ಪನ್ದ್ ಪನ್ತೆರ್, ಗಂಗಸರೊದ ಪಂತೊಡು ಯಾನ್ ಏಪೊಗ್ಲಾ ಸೋತ್‌ದಿಜಿ ಪನ್ಡ್‌ದ್ ಕಾರ್ತಿಕ್ 5 ಬಾಟ್ಲಿ ಗಂಗಸರೊನು ನೀರ್ ಕೂಟಂದೆ ಪರ್ತೆ. ಬೊಕ್ಕ, ಗಂಗಸರೊದ ಪ್ರಮಾಣ ಎಚ್ಚಾತಿನೆರ್ದಾವರ ಅಲಕ್ಕ ಉಸಾರ್ ತತ್ತಿನ ಕಾರ್ತಿಕ್, ಯಾನ್ ಬದ್‌ಕುಜಿ, ಆಸ್ಪತ್ರೆಗ್ ಸೇರಾಲೆ, ಜೂವ ಒರಿಪಾಲೆ ಪನ್ದ್ ನಟ್ಟೊಂದೆ. ಅಪಗನೇ, ಆಯನ ಪಾಸಾಡಿಲು ಮುಳಬಾಗಿಲು ಆಸ್ಪತ್ರೆಗ್ ದಾಕಲ್ತ್‌ದೆರ್. ಆಂಡ, ಕಾರ್ತಿಕ್ ಮರ್ದ್ ಪಲಿಪಂದೆ ಆಸ್ಪತ್ರೆಡ್ ತೀರ್ದೆ.
ಒಂಜಿ ವರ್ಸೊಗು ಪಿರವಾತೇ ಕಾರ್ತಿಕ್ ಮದಿಮೆ ಆದಿತ್ತೆ. ಬಂಜಿನ ಬೊಡೆದಿನ್ ತಮೆರಿಗ್ ಕಡಪುಡ್ದಿತ್ತೆ, ಬೊಡೆದಿ ಕರಿನ 8 ದಿನೊಕು ದುಂಬಾತೇ ಬಾಲೆನ್ ಪೆದ್ದ್‌ದಲ್. 21 ವರ್ಷ ಆಪಿನ ದುಂಬೇ ಕಾರ್ತಿಕ್ ಅಮ್ಮೆ ಆತೆ. ಪರ್ಪುನ, ಜುಗಾರಿ ಗೊಬ್ಬುನೆತ ಪಿರವು ಬೂರ್ದು ಇತ್ತೆ ಜೂವನೇ ಕಲೆವೊಂದೆ.