Last updated on May 16th, 2025 at 05:30 pm
ಮುಲ್ಕಿ: ಕಂಡೇವುದ ಆಯನೊಡು ಸಂಕ್ರಾಂತಿದಾನಿ ಮೀನ್ ಪತ್ತ್‌ದ್, ಉಲ್ಲಾಯಗ್ ಸಂದಾದ್, ಮಾತೆರ್ಲಾ ಪಟ್ಟೊನುನ ಕ್ರಮ ಉಂಡು. ಎರ್ಮಾಲ್ ಜಪ್ಪು ಕಂಡೇವು ಅಡೆಪ್ಪು ಪನ್ಪಿನ ಪಾತೆರ ತುಳುನಾಡ ಧಾರ್ಮಿಕ ಕ್ಷೇತ್ರೊಡು ಕೇನಂದಿನಕುಲು ಇಪ್ಪಯೆರ್. ಈ ಸೀಮೆಡ್ ಸುರೂತ ಕೊಡಿ ಏರ್ದ್ ಜಾತ್ರೆ ಆಪುನು ಎರ್ಮಾಲ್‌ಡ್, ಅಕೇರಿದ ಕಂಡೇವುದ ಆಯನ. ತುಳುನಾಡ್‌ದ ಆದಿ ಆಲಡೆಲೆಡ್ ಕಂಡೇವುಲಾ ಒಂಜಿ. ಇನಿಕಾನಗ ನರಮಾನ್ಯನ ಸ್ವಾರ್ಥೊರ್ದಾವರ ಕಂಡೇವುದ ಆಯನೊಡು ಅನಾದಿಕಾಲೊರ್ದು ನಡತೊಂದು ಬೈದಿನ ಈ ಮೀನ್ ಪತ್ತುನ ಕಟ್ಟ್‌ಡ್ ಇತ್ತೆ ಪತ್ತೆರೆ ಮೀನ್‌ಲೇ ಇಜ್ಜ..!
ಉಲ್ಲಾಯೆ ಪಡವುಡು ಬತ್ತ್‌ದ್ ಕಂಡೇವುಡು ನಿಲೆ ಆತಿನೆತ ನೆಂಪುಗು ನಡಪುನ ಕಟ್ಟ್‌ಗ್ ಇತ್ತೆ ಇಂಚಿನ ಸ್ಥಿತಿ ಬೈದ್ಂಡ್.
ಪರತಿರಿ‌ತ ಪುಗಾರ್ತೆದ ತೆಲಾರ್ ಕಂಡೇವು ನಂದಿನಿ ಸುದೆಕ್ ಮುಂಚೂರ್ ವೆಟ್‌ವೆಲ್‌ದ ಕೈತಲ್ದ ಉಲಚರಂಡಿಲೆನ ಗಲೇಜಿ ನೀರ್, ಕೊಡಿಪಾಡಿಡ್ ಕಟ್ಟಾದಿನ ತ್ಯಾಜ್ಯ ಸಂಸ್ಕರಣಾ ಘಟಕೊದ ನೀರ್, ಮುಕ್ಕದ ಪ್ರೈವೇಟ್ ಆಸ್ಪತ್ರೆ, ಕಾಲೇಜ್, ಲಾಡ್ಜ್, ಹೋಟೇಲ್‌ಲೆನ ಗಲೇಜಿ ನೀರ್‌ನ್ ಸುದೆಕ್ ಬುಡೊಂದುಪ್ಪುನೆರ್ದಾವರ ನಂದಿನಿ ಸುದೆತ ನೀರ್ ಅಲಕ್ಕ ಹಾಲಾತ್ಂಡ್.
ಈ ಸಂಕ್ರಾಂತಿದಾನಿ ಬೆಡಿ ಆದ್ ಮೀನ್ ಪತ್ತೆರೆ ಸುದೆಕ್ ಜತ್ತಿನಕುಲೆಗ್ ಮೀನ್‌ಲೇ ತಿಕ್ಕ್‌ದಿಜ. ಪಿರಾಕ್‌ರ್ದಿಂಚಿ ನಡತೊಂದು ಬತ್ತಿನ ಕಟ್ಟ್‌ಗ್ ಪೆಟ್ಟ್ ಬೂರ್ದ್ಂಡ್, ನಂಬಿಕೆಗ್ ಪೆಟ್ಟ್ ಬೂರ್ದ್ಂಡ್, ಆಚರಣೆಗ್ ಪೆಟ್ಟ್ ಬೂರ್ದ್ಂಡ್.
ಆಯನೊಗು ದುಂಬು ಪಾಕ ಸರ್ತಿ ಜಿಲ್ಲಾಡಳಿತ ಬೊಕ್ಕ ಮಹಾನಗರ ಪಾಲಿಕೆಗ್ ಬಿನ್ನಪು ಮಲ್ತಿನೆಕ್ ತಕ್ಕ ಸುದೆಟ್ ಬುಲೆದಿನ ಪಾಮಾಜಿ, ಬಲ್ಲೆಲೆನ್ ಒರ ದೆತ್ತ್‌ದೆರ್. ಆಂಡ ಗಲೇಜಿ ನೀರ್ ಸುದೆತ ಉಡಲ್ ಸೇರುನೆತ ಬಗೆಟ್ ನನಲಾ ದಾಲ ಕ್ರಮ ಗೆತೊಂದುಜೆರ್.