Last updated on May 23rd, 2025 at 01:11 pm
ಮಾಸ್ಕೋ, ಮೇ 23: ಸಂಸದೆ ಬ್ರಿಜೇಶ್ ಚೌಟೆರ್ ಇತ್ತಿನ, ಸಂಸದೆದಿ ಕನ್ನಿಮೋಳಿ ಮುತಾಲಿಕೆದ ಭಾರತೊದ ಸಂಸದೆರೆನ ನಿಯೋಗ ಏರ್ಪೋರ್ಟ್ಡ್ ಜಪ್ಪುನ ಪೊರ್ತುಡು ಡ್ರೋನ್ ದಾಳಿ ನಡತ್ದ್ಂಡ್. ಆಪರೇಷನ್ ಸಿಂಧೂರ್(Operation Sindoor) ದ ಬಗೆಟ್ ಇಡೀ ಲೋಕೊಗು ಒಲವು ಕೊರ್ಯೆರ ಅಂಚೆನೇ ಪಾಕ್ದ ಕುದ್ಕಬುದ್ದಿನ್ ಲೋಕೊಗು ತೋಜಾಯೆರ ಸಂಸದೆರೆನ ನಿಯೋಗ ಪಿದಡ್ದಿತ್ತ್ಂಡ್. ಅವೆಟ್ ಈ ಒಂಜಿ ನಿಯೋಗ ರಷ್ಯಾಗ್ ಪೋತುಂಡು.
ಭಾರತೀಯ ಸಂಸದೆರೆನ ನಿಯೋಗ ಮಾಸ್ಕೋ ವಿಮಾನ ಉಂತಡೆಡ್ ಡ್ರೋನ್ ದಾಳಿಡ್ ಎಲ್ಯ ಅಂತರೊಡು ಬಚಾವಾತ್ಂಡ್. ಈ ವಿಮಾನೊಡು ಕುಡ್ಲ ಸಂಸದೆ ಕ್ಯಾಪ್ಟನ್ ಬ್ರಿಜೇಶ್ ಚೌಟೆರ್ ಇತ್ತೆರ್. ಡ್ರೋನ್ ದಾಳಿರ್ದಾವರ, ಈ ವಿಮಾನ ಮಾಸ್ಕೋ ವಿಮಾನ ಉಂತಡೆದ ಮಿತ್ತ್ಡೇ ಪಾಕ ಪೊರ್ತು ಸುತ್ತೊಂದೇ ಇತ್ತ್ಂಡ್.
ಪಾಕ ಗಂಟೆ ಟೊರ್ತು ತೈರ್ದ್ ಬೊಕ್ಕ ಭದ್ರತಾ ಪರಿಸ್ಥಿತಿಲೆನ ಬಗೆಟ್ ತೆರಿಬೊಕ್ಕ, ವಿಮಾನ ಮಾಸ್ಕೋ ವಿಮಾನ ಉಂತಡೆಡ್ ಜತ್ತ್ದ್ಂಡ್. ಆಪರೇಷನ್ ಸಿಂಧೂರ್ ಬಗೆಟ್ ಭಾರತೊದ ಸ್ಟ್ಯಾಂಡ್ನ್ ತೆರಿಪಾಯೆರ ಭಾರತೊರ್ದು ಆಜಿ ನಿಯೋಗೊಲು ಬೇತೆ ಬೇತೆ ದೇಶೊಲೆಗ್ ಪೋತ. ಭಾರತೊರ್ದು ರಷ್ಯಾಗ್ ಪೋತಿನ ನಿಯೋಗಡ್ ಡಿಎಂಕೆ ಸಂಸದೆದಿ ಕನ್ನಿಮೋಳಿ, ಸಮಾಜವಾದಿ ಪಕ್ಷೊದ ಸಂಸದೆ ರಾಜೀವ್ ರೈ, ಆರ್ಜೆಡಿ ಸಂಸದೆ ಪ್ರೇಮಚಂದ್ ಗುಪ್ತಾ, ಕುಡ್ಲದ ಸಂಸದೆ ಕ್ಯಾಪ್ಟನ್ ಬ್ರಿಜೇಶ್ ಚೌಟೆರ್, ಅಶೋಕ್ ಕುಮಾರ್ ಮಿತ್ತಲ್ ಬೊಕ್ಕ ರಾಯಭಾರಿ ಮಂಜೀವ್ ಸಿಂಗ್ ಪುರಿ ಉಲ್ಲೆರ್.
ಸಂಸದೆ ಚೌಟೆರ್ ಇತ್ತಿನ ನಿಯೋಗ ಮೇ 22 ತಾನಿ ರಷ್ಯಾಗ್ ಪೋದಿತ್ತ್ಂಡ್. ಚೌಟೆರ್ ಪೋವೊಂದಿತ್ತಿನ ವಿಮಾನ ಮಾಸ್ಕೋ ವಿಮಾನ ಉಂತಡೆಡ್ ಜಪ್ಪೆರಾನಗ ಈ ತಲೆಪು ಬೈದ್ಂಡ್ ಪನ್ದ್ ಇತ್ತೆ ಬೊಲ್ಪುಗ್ ಬೈದ್ಂಡ್. ರಷ್ಯಾದ ಮಾಸ್ಕೋ ವಿಮಾನ ಉಂತಡೆದ ಮಿತ್ತ್ ಉಕ್ರೇನ್ ಡ್ರೋನ್ ದಾಳಿ ಮಲ್ದ್ಂಡ್ ಪನ್ದ್ ಆರೋಪ ಮಲ್ದೆರ್.
ಉಂದಾಯಿ ಬೊಕ್ಕ ಮಾಸ್ಕೋ ವಿಮಾನ ಉಂತಡೆಡ್ ಅವ್ಯವಸ್ಥೆ ಉಂಡಾಂಡ್. ಅಕಚೆನೇ ಜಪ್ಪೆರೆ ಕಾತೊಂದಿತ್ತಿನ ವಿಮಾನೊಲೆನ್ ಒಂತೆ ಪೊರ್ತು ವಿಮಾನ ಉಂತಡೆಡ್ ಜಪ್ಪೆರೆ ಬುಡೊಂದಿಜ್ಜಂಡ್. ಮಾಸ್ಕೋ ವಿಮಾನ ಉಂತಡೆ ದೇಶೀಯ ಬೊಕೂ ಅಂತಾರಾಷ್ಟ್ರೀಯ ವಿಮಾನೊಲು ರಾಪುನೆನ್ ಪಾಕ ಗಂಟೆದಾತ್ ಪೊರ್ತು ಉಂತಾದಿತ್ತ್ಂಡ್. ಅಂಚಾದ್ ಸಂಸದೆ ಚೌಟೆರ್ ಇತ್ತಿನ ವಿಮಾನ ಜಪ್ಪೆರಾವಂದೆ ಬಾನೊಡೇ ತಿರ್ಗೊಂದಿತ್ತ್ಂಡ್. ಕಡೇಕ್ಲಾ, ಪಾಕ ಪೊರ್ತು ಚಯತೈರ್ದ್, ವಿಮಾನ ದಾಲ ಪಡಾಯಿದಾಂತೆ ಜತ್ತ್ದ್ಂಡ್.