Last updated on May 29th, 2025 at 10:11 am
ಬೆದ್ರ, ಮೇ 29: ಮದಿಮೆ ಆತಿನ ಪೊಂಜೊವುನು ಗೂವೆಲ್‌ಗ್ ನೂಕುದ್ ಪಾಡ್ದ್, ಚಙ್ಗಾಯಿ ತಾನ್ಲಾ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಬೆದ್ರ ತಾಲೂಕ್‌ದ ಬಡಗಮಿಜಾರ್ ಮರಕಡ ಪನ್ಪಿನಲ್ಪ ನಡತ್‌ದ್ಂಡ್.
ಬಡಗಮಿಜಾರ್ ನಿವಾಸಿ ನಮಿಕ್ಷಾ ಶೆಟ್ಟಿ (29) ಅಂಚೆನೇ ಆಲೆನ ಚಙ್ಗಾಯಿ ಪನ್ದ್ ಪನೊಂದುಪ್ಪುನ ನಿಡ್ಡೋಡಿದ ಪ್ರಶಾಂತ್ ತೀರ್ದಿನಕುಲು ಪನ್ದ್ ತೆರಿದ್ ಬೈದ್ಂಡ್. ನಮೀಕ್ಷಾಗ್ ಮದಿಮೆ ಆದಿತ್ತ್‌ದ್, ರಡ್ಡ್ ಎಲ್ಯ ಆಣ್ ಜೋಕುಲು ಉಲ್ಲೆರ್. ಕಂಡನೆ ಸತೀಶ್ ಪೂನಾಡ್ ಬೇಲೆ ಮಲ್ತೊಂದುಲ್ಲೆರ್‌ಗೆ. ಪ್ರಶಾಂತ್ ಮೂಲತಃ ಬಾಗಲಕೋಟೆದಾಯೆ ಆದಿತ್ತ್‌ದ್, ಮದಿಮೆ ಆದ್ ಡಿವೋರ್ಸ್ ಆತ್ಂಡ್. ನಮೀಕ್ಷಾ ಶೆಟ್ಟಿಗ್ ಇನ್‌ಸ್ಟಾಗ್ರಾಂ ಡ್ ಪ್ರಶಾಂತ್‌ನ ಗುರ್ತ ಆದಿತ್ತ್ಂಡ್.
ನಮೀಕ್ಷಾ ಕಂಡನ್ಯನ ಒಟ್ಟುಗು ಸಂಸಾರ ಸಮ ಆವಂದೆ ಜೋಕುಲೆಡೊಪ್ಪ ಅಪ್ಪೆ ಇಲ್ಲಡೇ ಇತ್ತೆರ್. ಪ್ರಶಾಂತ್, ನಮೀಕ್ಷಾನ ಇಲ್ಲಗ್ ಅಪಗಪಗ ಬತ್ತ್‌ದ್ ಪೋವೊಂದಿತ್ತೆ. ಬುಧವಾರ ಇಲ್ಲಡ್ ಏರ್ಲಾ ಇಜ್ಜಂದಿನಪಗ ಕುಡ ಬತ್ತಿತ್ತ್‌ದ್, ಈ ಪೊರ್ತುಡು ಇರ್ವೆರೆ ನಡುಟು ಲಡಯಿ ಆತ್ಂಡ್‌ಗೆ.
ಲಡಯಿ ಜೋರಾದ್ ನಮೀಕ್ಷಾನ್ ಗೂವೆಲ್‌ಗ್ ನೂಕುದ್ ಪಾಡ್ದ್, ಅವೆನ್ ಬಾಲೆ ತೂಯಿನೆಕ್ ಪ್ರಶಾಂತ್ ತಾನ್ಲಾ ಗೂವೆಲ್‌ಗ್ ಲಾಗಿದೆ ಪನ್ದ್ ಪನೊಂದುಲ್ಲೆರ್. ಅಗ್ನಿಶಾಮಕ ಸಿಬ್ಬಂದಿ ಪುನೊನು ಗೂವೆಲ್‌ರ್ದ್ ಮಿತ್ತ್ ಕನತಿತ್ತ್‌ದ್ ಬೆದ್ರ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.