Last updated on May 5th, 2025 at 02:09 pm
ಕುಡ್ಲ, ಮೇ 5: ಹಿಂದೂ ಕಾರ್ಯಕರ್ತೆ ಸುಹಾಸ್ ಶೆಟ್ಟಿನ್ ಕೆರ್ತಿನ ಪ್ರಕರಣೊಗು ಸಂಬಂದಿತ್ದ್ 8 ಜನ ಆರೋಪಿಲೆನ್ ಪೊಲೀಸೆರ್ ಪತ್ತ್ದೆರ್. ಅವೆಟ್ ಫಾಜಿಲ್ನ ಮೆಗ್ಯೆ ಸುಪಾರಿ ಕೊರ್ತಿನ ವಿಚಾರ ತೆರಿದ್ ಬೈದ್ಂಡ್. ಇತ್ತೆ ಪ್ರಕರಣೊಗು ಸಂಬಂದಿತ್ದ್ ಕೆರ್ಯೆರ ಸುಪಾರಿ ಕೊರ್ಯೆರ ಪಿದಯಿ ದೇಶೊರ್ದುಲಾ ಕಾಸ್ ಬತ್ತ್ದ್ಂಡಾ ಪನ್ಪಿನ ಡೌಟ್ ಸುರು ಆತ್ಂಡ್. ಆ ದಿಟ್ಟಿಡ್ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್ ಪನ್ದ್ ಮೂಲೊಲು ತೆರಿಪಾದ.
ಸುಹಾಸ್ ಶೆಟ್ಟಿನ್ ಕೆರ್ತಿನೆತ ಪಿರವು ಪಾಕ ತೋಜಂದಿ ಕೈಕುಲು ಉಲ್ಲ ಪನ್ಪಿನ ಶಂಕೆಲಾ ಇತ್ತ್ದ್, ಬೇತೆ ಬೇತೆ ಬ್ಯಾಂಕ್ ಅಕೌಂಟ್ಲೆನ ಪರಿಶೀಲನೆಗ್ ಪೊಲೀಸೆರ್ ಜತ್ತ್ದೆರ್. ಕೆರ್ಯೆರ ಸಕಾಯ ಮನ್ಪ್ರಪುಲೆ ಪನ್ದ್ ಪ್ರಮುಖ ಆರೋಪಿ ಸಫ್ವಾನ್ ಪಾಕ ಜನಟ ಕೇನ್ದಿತ್ತೆ. ಆ ಪೊರ್ತುಡು ಜೈಲ್, ಜಾಮೀನ್ಗ್ ಸಕಾಯ ಮನ್ಪೆರ ನಟ್ಟೊಂದೆಗೆ. ಕೆರಿಪೆಟ್ಟಿಗೇಲೇ ಪೊಲೀಸೆರೆಗ್ ಸರೆಂಡರ್ ಆಪಿನ ಬಗೆಟ್ಲಾ ಕೆಂಗುಡೆರ್ ಚರ್ಚೆ ಮಲ್ತಿತ್ತೆರ್. ಮೊಕಲೆಗಾ ಬೋಡಾಪಿನ ಮಾತಾ ವ್ಯವಸ್ಥೆನ್ ಅವ್ವೇ ತೋಜಂದಿ ಕೈಕುಲು ಮಲ್ತ್ದ ಪನ್ಪಿನ ಡೌಟ್ಗ್ ಬಲ ಕೊರೊಂದುಂಡು.
ಈ ನಡುಟು ಸುಹಾಸ್ ಶೆಟ್ಟಿನ್ ಕೆರ್ಯೆರ ದುಂಬು ಆರೋಪಿಲು ಬಾರೀ ಜೋರುಡು ಪಾರ್ಟಿ ಮಲ್ದಿನ ಫೋಟೋ ಇತ್ತೆ ತಿಕ್ಕ್ದ್ಂಡ್. ಚಿಕ್ಕಮಗಳೂರ್ದ ಕಳಸದ ರೆಸಾರ್ಟ್ ಒಂಜೆಟ್ ಏ.2 ತಾನಿ ಆರೋಪಿಲು ನೈಟ್ ಪಾರ್ಟಿ ಮಲ್ತ್ದೆರ್. ಕೆರ್ಪುನ ಸ್ಕೆಚ್ ಮಲ್ಪೆರಗ್ಂದೇ ಪಾರ್ಟಿ ಮಲ್ದೃರ್ ಪನ್ದ್ ತೋಜೊಂದುಂಡು. ಕ್ಯಾಂಪ್ ಫೈರ್ ಪಾಡ್ದ್ ಸುಹಾಸ್ ಶೆಟ್ಟಿನ್ ಕೆರ್ತಿನ ಆರೋಪಿಲು ಮುಝಮ್ಮಿಲ್, ನಿಯಾಜ್ ಬೊಕ್ಕ ಕಳಸದ ರಂಜಿತ್ ಪಾರ್ಟಿ ಮಲ್ತ್ದೆರ್. ಈ ಮೂವೆರೆ ಒಟ್ಟುಗು ಕುಡ ಐನ್ ಜನ ಪಾರ್ಟಿಡ್ ಇತ್ತೆರ್.