Last updated on May 24th, 2025 at 10:57 am
ಪತ್ತನಾಜೆ ತುಳುನಾಡ್‌ದ ಗೌಜಿ, ಮಂಗಿಲೊಗ್ ಮಾತ ಗಡುತ್ತ ದಿನೊ. ಬೇಸಡ್ ಪತ್ತ್ ಪೋಪುನಾನಿದ ದಿನೊನು ಪತ್ತನಾಜೆಂದ್ ಪನ್ಪೆರ್. ಪಗ್ಗು ತಿಂಗೊಲ್ತ ಕಡೆತ್ತಾನಿತ ಸಂಕ್ರಾತಿಡ್ದ್ ಬೊಕ್ಕದ ಪತ್ತ್ ದಿನೊತ್ತ ವಾಯ್ದೆಗ್ ಪತ್ತನಾಜೆ ಪನ್ಪುನು. ಇಡೀ ಸಮಾಜೊದ ಧಾರ್ಮಿಕ-ಸಾಂಸ್ಕೃತಿಕ ಚಟವುಟಿಕೆಗ್ ಮಂಗಳ ಪಾಡುನ ದಿನೊನೇ ಪತ್ತನಾಜೆ.
ಈ ಆಧುನಿಕತೆತ ಪೊರ್ತುಡು ಪತ್ತನಾಜೆದ ಉಲಾರ್ಥ ತೆರಿಯೊಂಡ ಎಡ್ಡೆ. ಈ ಆಧುನಿಕ ಜೂವನೊದ ಶೈಲಿಡ್ ಪಗತೆಲಕ ಅಂಡಲಾ ಮೂಲ ಆಚರಣೆಲೆಗ್ ಈ ಪತ್ತನಾಜೆದ ಸಮ್ಮಂದ ಉಂಡೇ ಉಂಡು.
ದುಂಬುಡು ನೀರ್‌ದ ತಾಂಗ್ ಇತ್ತಿನಕುಲು ಬಿಸುತಾನಿ ನೇಜಿ ಪಾಡೊಂದಿತ್ತೆರ್. ಪತ್ತನಾಜೆ ಕರಿದ್ ಬರ್ಸ ಬನ್ನಗ ನಟ್ಟಿದ ಬೇಲೆ ಸುರು ಮಲ್ಪೆರೆ ಸುಲಭ ಆಪುಂಡು. ಇತ್ತೆ ಬೆನ್ನಿಯೇ ಕಮ್ಮಿ ಆವೊಂದು ಬತ್ತಿನ ಊರುಡು ಬೆನ್ನಿದ ಕ್ರಮೊಟ್ಟುಲಾ ಪಗತೆಲು ಆತ.
ತುಳುನಾಡ್‌ಡ್ ಆಜಿ ತಿಂಗೊಲು ಮರಿಯಾಲ. ಆಜಿ ತಿಂಗೊಲು ಅರೆಗಾಲ. ಉಂದು ದುಂಬುದ ಕಾಲೊದ ಲೆಕ್ಕೊ. ಆ ಕಾಲೊಡು ಮುಲ್ಪದ ಮರಿಯಾಲ ಪಂಡ ನಾಲೈನ್ ತಿಂಗೊಲು ಬುಡಂದೆ ಬರ್ಪಿನ ದರಿಕೂಟ ಬರ್ಸ, ಗಾಳಿ, ಮೆಂಚಿ, ತೆಡಿಲ್. ಅಂಚಾದ್ ಮರಿಯಾಲೊಡು ವಾ ರೀತಿದ ಗೌಜಿ, ಗಮ್ಮತ್ತ್, ಜಾತ್ರೆ, ಅಂಕ ಆಯನ ಮಲ್ಪುಲೆಕನೇ ಇಜ್ಜಿ. ಅಯಿಕಾದೇ ಪತ್ತನಾಜೆದಾನಿ ಈ ಮಾತಾ ಗೌಜಿಲೆನ್ ಕೈದ್ ಮಲ್ಪುನ ನಿರ್ಧಾರ ಮಲ್ತೆರ್. ಅಂಚ ಪತ್ತನಾಜೆಗ್ ಬಾರೀ ಮಹತ್ವ ಬತ್ತ್‌ಂಡ್.
ಪತ್ತನಾಜೆತಾನಿ ಬಯ್ಯಗ್ ಗುಳಿಗನ ಆತ್ತ್ಂಡ ಬೈರವನ ಕಲ್ಲ್ ಇತ್ತಿನವುಲು ಗುಳಿಗಗ್, ಬೈರವಗ್ ಕರಿಪ್ಪಿ ಕ್ರಮ ಉಂಡು ಗುಳಿಗ್ಗೆ ನರಮನಿಗ್ ಬರ್ಪಿಂಚಿ ಸೀಕ್‌ಲೆರ್ದ್ ಕಾಪುವೆ, ಬೈರವೇ ಕಂಜಿ- ಕೈಕಂಜಿ ಲೆಗ್ ಬರ್ಪಿ ಸೀಕ್‌ಲೆನ್ ತಡೆಪೆ ಪನಾಪಿ ನಂಬೊಲಿಗೆ. ಕಲ್ಲ್‌ನ್ ಶುದ್ದ ಮಲ್ತ್‌ದ್ ಆಗೆಲ್ ಪಾಡುವೆರ್, ಕಲಿ, ಗಂಗಸರ ದೀದ್ ನಟ್ಟೊನುವೆರ್. ಕಡೆಕ್ ಕೋರಿ ಕೊಯಿಪೆರ್. ಕೆಲವು ಕಡೆಟ್ ಮದ್ಯಾನ ಗುಡ್ಡೆಡ್ ಅಗೆಲ್ ಬಲಸ್‌ದ್ ವನಸ್ ಮಲ್ಪುನ ಕ್ರಮೊಲಾ ಉಂಡು.
ಈ ಪತ್ತನಾಜೆ ಆಚರಣೆ ತುಲುನಾಡ್‌ಡ್ ಒಂಜಿ ಸೂತ್ರ. ಬೆನ್ನಿ ಬೆನೊಂದಿಪ್ಪುನ ಈ ತುಳುನಾಡ್‌ಡ್ ಬೆನ್ನಿದ ಬೇಲೆಗ್ ಪಿದಾಯಿದ ಗೌಜಿ ಗಲಾಟೆಲು ತೊಂದರೆ ಆವೆರೆಗ್ ಬಲ್ಲಿಂದೆ ಈ ಪತ್ತನಾಜೆದ ಕಟ್ಟ್‌ ಮಲ್ದ್ಂಡ್. ಉಂದೆಡ್ಡ್ ಬೊಕ್ಕ ಪ್ರತಿಯೊರಿಲ ಬೆನ್ನಿದ ಬೇಲೆನ್ ಸುರು ಮಲ್ಪೊಡುಂದೇ ಅಟ್ಟನೆಂದ್ ಪನೊಲಿ. ಅಯಿರ್ದ್ ಬುಕ್ಕ ಎಂಚಿನ ಇತ್ತ್ಂಡಲ ನಿರ್ನಾಲ ಕರಿದ್ ಪರ್ಬ ಕರೀಬೊಕ್ಕನೆ. ಬೇಸಡ್ ಬೆನ್ನಿ ಸುರು ಆದ್ ಆಟಿಡ್ ಮುಗಿಪ್ಪೊಡು. ಬೊಕ್ಕ ಸೋಣ ನಿರ್ನಾಲ್‌ಡ್ ಕೆಯಿ ಕೊಯ್ದ್ ಸುಗ್ಗಿದ ಸಾಗೋಲಿ ಆದ್ ಪರ್ಬ ಬರ್ಪುಂಡು. ಐಡ್ದ್ ಬೊಕ್ಕ ಆಟ, ಕೋಲ, ಮದಿಮೆ ಪೂರಲ ಸುರು ಮನ್ಪೊಲಿ. ಇಂದೆನ್ ಬೇಸ ಪತ್ತನಾಜೆಂದ್ ಪನ್ಪೆರ್. ಬೇಸ ಪತ್ತೆಡ್ ಸೇರ್ದ್ ಪತ್ತೊಂಜೆಗ್ ನೇಮೊ ನಡಪ್ಪುಂಡು. ಇಂದೆಕ್ಕ್ ಪತ್ತನಾಜೆದ ನೇಮೊಂದು ಪನ್ಪೆರ್. ಪತ್ತನಾಜೆ ಒಂಜಿ ಗಡುದಿನೊ. ಪತ್ತನಾಜೆಗ್ ನೇಮೊ ಜಾತ್ರೆ ಅಕೇರಿ. ಪತ್ತನಾಜೆಡ್ದ್ ಬುಕ್ಕೊ ಯಕ್ಷಗಾನೊಲಾ ನಡಪ್ಪುಜಿ ಬುಕ್ಕೊ ದಾನೆಂಡಲಾ ತಾಳಮದ್ದಲೆ, ಕಟೀಲ್ದ ಮೇಲೊದ ಸೇವೆದ ಆಟೊ ಇಂಚಮಾಂತ. ಇಂದು ತುಳುವೆರೆಡ ದುಂಬುಡ್ದಿಂಚಿ ನಡತ್ತ್ ಬತ್ತಿನವು.
ಊರುಡ್ದು ದೂರೊ ಪೋಯಿನಕುಲು ಪತ್ತನಾಜೆಗ್ ಬರ್ಪುನ ಕ್ರಮೊ. ನಾನ ಏಪ ಬರ್ಪುನೆಂದ್ ಕೇಂಡ ಪತ್ತನಾಜೆಗ್ ಬರ್ಪುನೆಂದ್ ಪನ್ಪೆರ್.
ಪತ್ತನಾಜೆಗ್ ಪತ್ತ್ ಪನಿ ಬರ್ಸೊ ಬರೊಡೇ.
ಪತ್ತನಾಜೆ ಬತ್ತ್ಂಡ ಜತ್ತಿ ಆಟೊ ಉಂತ್ತ್ಂಡ್.
Credit: wikipedia