ರಾಮಕುಂಜ: ಶಾರದಾನಗರದ ಶಾರದಾಂಬಾ ಭಜನಾ ಮಂದಿರೊಡು ಭಾರತೀಯ ಸೇನೆ, ಸೈನಿಕೆರೆಗಾದ್ ವಿಶೇಷ ಪ್ರಾರ್ಥನೆ

Last updated on May 10th, 2025 at 11:57 am

ರಾಮಕುಂಜ: ಭಾರತೀಯ ಸೇನೆದ ಆಪರೇಶನ್ ಸಿಂಧೂರ್‌ದ ಗೆಲ್ಮೆಗಾದ್ ಕಡಬ ತಾಲೂಕ್ ರಾಮಕುಂಜ ಗ್ರಾಮೊದ ಶಾರದಾ ನಗರದ ಶ್ರೀ ಶಾರದಾಂಬಾ ಭಜನಾ ಮಂದಿರೊಡು ಶುಕ್ರವಾರ ಮೇ 9 ದಾನಿ ವಾರೊದ ಭಜನೆದ ಒಟ್ಟುಗು ವಿಶೇಷ ಮದಿಪು ಮಲ್ತೆರ್.

ನಿವೃತ್ತ ಯೋಧೆ ಮಾಯಿಲಪ್ಪ ಶಾರದಾನಗರ ಪಾತೆರ್ದ್, ಮಾತೆರೆಗ್ಲಾ ಇತ್ತೆ ದೇಶಡು ನಡತೊಂದುಪ್ಪುನ ವಿಷಯ ತೆರಿದ್ಂಡ್. ಭಾರತ ಕಾಲಿ ಉಗ್ರ ನಿಲೆಕುಲೆ ಮಿತ್ತ್ ದಾಳಿ ಮಲ್ತಿತ್ತ್ಂಡ್, ಆಂಡ ಪಾಕಿಸ್ತಾನ ಅಮಾಯಕ ನಾಗರಿಕೆರೆನ ಮಿತ್ತ್ ದಾಳಿ ಮಲ್ದ್ಂಡ್. ಭಯೋತ್ಪಾದಕೆರೆನ್ ಸಾಂಕೊಂದು ಅಮಾಯೆಕೆರೆನ್ ಯುದ್ಧೊದ ಪುದರ್‌ಡ್ ಕೆರೊಂದುಂಡು. ಈ ಪೊರ್ತುಡು ನಮ ಭಾರತೀಯೆರ್ ಮಾತೆರ್ಲಾ ಒಟ್ಟಾದ್ ನಮ್ಮ ಸೇನೆದ ಪರವಾದ್ ಉಂತೊಡು, ಸೇನೆದ ಮಿತ್ತ್ ನಂಬಿಕೆ ದೀವೊಡು ಪನ್ದ್ ಪನ್ಡೆರ್.

ಪ್ರಾರ್ಥನೆ ಮಲ್ತಿನ ವೆಂಕಟೇಶ್ವರ ಭಟ್ ಊಂತಿಲ, ಒಂಜೊಂಜಿ ಯುಗೊಟು ಒಂಜೊಂಜಿ ಬಗೆತ ಆರಾಧನೆಗ್ ಮಹತ್ವೊ ಉಂಡು, ಕಲಿಯುಗೊಟು ಸಂಘಶಕ್ತೀ ಕಲಿಯುಗೇ ಪನ್ಪಿ ಪಾತೆರದ ಲೆಕ ಸಾಮೂಹಿಕ ಪ್ರಾರ್ಥನೆಗ್ ಬಾರೀ ಮಹತ್ವೊ ಉಂಡು. ನರಮಾನ್ಯಗ್ ಬಾರೀ ಇಷ್ಟದ ಸೊತ್ತು ಆಯನ ಶರೀರ, ಅಂಚಿನ ಶರೀರೊನೇ ತ್ಯಾಗ ಮಲ್ಪೆರ ಪಿರತೂವಂದೆ ದೇಶೊಗಾದ್ ಕಾದ್ಯೆರೆ ಪೋತಿನ ನಮ್ಮ ಮಾತಾ ಸೈನಿಕೆರೆಗ್ ದೇಬೆರ್ ಶಕ್ತಿ ಕೊರಡ್, ಅಕ್ಲೆಗ್ ಎಡ್ಡೆ ಆವಡ್ ಪನ್ಡ್‌ದ್ ಅಪ್ಪೆ ಶಾರದೆಡ ಪ್ರಾರ್ಥನೆ ಮಲ್ತೆರ್.

ಈ ಪೊರ್ತುಡು ಶಾರದೋತ್ಸವ  ಸಮಿತಿದ ಗುರ್ಕಾರ್ಲು ಗಣೇಶ್ ಶಾರದಾನಗರ, ಕಾರ್ಯಂತೆರ್ ಜಯಪ್ರಕಾಶ್ ಅಮೈ, ಭಜನಾ ಕಾರ್ಯಂತೆರ್ ರಾಮಚಂದ್ರ ಊಂತಿಲ, ಪಣವುದ ಪಾಲವೆರ್ ರಾಜೇಶ್ ಇರ್ಕಿ ಅಂಚೆನೇ ಕಾರ್ಯಕಾರಿ ಸಮಿತಿದ ಪದುಕೆರ್ ಕೇಶವ ಗಾಂಧಿಪೇಟೆ, ನಿಶ್ಚಿತ್ ಜಿ, ಶಿವನೇಶನ್, ವಿನೋದ್ ಕೆದಿಲ ಒತ್ತುಪಾಲಿತ್ತೆರ್.