Last updated on May 30th, 2025 at 09:29 am
ಉಳ್ಳಾಲ: ಕರಿನ ರಾತ್ರೆ (ಮೇ 29 ಗುರುವಾರ) ದೊರಿನ ಜಡಿಬೊಲ್ಲ ಬರ್ಸೊಗು ಉಳ್ಳಾಲಡೊರ್ಮೆ ನೂದೆರ್ದ್‌ಲಾ ಎಚ್ಚ ಇಲ್ಲ್‌ಲೆಗ್ ನೀರ್ ಪೊಗ್ಗುದುಂಡ್, ರಡ್ಡ್ ಬೇತೆ ಬೇತೆ ಇಲ್ಲ್‌ಲೆನ ಮಿತ್ತ್ ಬರೆ ಜರಿದ್ ಮಣ್ಣ್‌ದಡಿಟ್ ತಿಕೊಂದಿನ ಒಟ್ಟು ಆಜಿ ಜನೊಟು ಒರ್ತಿ ಪೊಣ್ಣು ಬಾಲೆ ಬೊಕ್ಕ ಒರ್ತಿ ಪೊಂಜೊವು ತೀರ್ದೆರ್. ಒರಿನಕಲೆನ ರಕ್ಷಣೆ ಕಾರ್ಯಾಚರಣೆ ನಡತೊಂದುಂಡು.
ದೇರಳಕಟ್ಟೆ ಕಾನಕೆರೆಟ್ ಇಲ್ಲದ ಮಿತ್ತ್ ಬರೆ ಜರಿದ್ ಫಾತಿಮಾ ನಯೀಮ ಪನ್ಪಿನ 11 ವರ್ಸ ಪ್ರಾಯೊದ ಪೊಣ್ಣು, ಅಂಚೆನೇ ಮೋಂಟೆಪದವುದಲ್ಪ ಗುಡ್ಡೆ ಜರಿನೆಟ್ ಪ್ರೇಮಾ ಪೂಜಾರಿ (52) ಪನ್ಪಿನಕುಲು ತೀರ್ದೆರ್. ಅಗ್ನಿ ಶಾಮಕ ದಳ ಬೊಕ್ಕ ಮುಟ್ಟದಕಲೆನ ಪಾಕ ಪೊರ್ತುದ ಕಾರ್ಯಾಚರಣೆಡ್ ಬಾಲೆ ನಯೀಮನ್ ಮಣ್ಣ್‌ದಡಿರ್ದ್ ಪಿದಯಿ ಕನತ್‌ದ್, ಗಾತಿದ ಸ್ಥಿತಿಟ್ ಇತ್ತಿನ ಬಾಲೆನ್ ದೇರಳಕಟ್ಟೆ ಆಸ್ಪತ್ರೆಗ್ ಲೆತೊಂದು ಪೋತೆರ್, ಅಲ್ಪ ಬಾಲೆ ತೀರ್ದಲ್.
ಮೊಂಟೆಪದವು ದಲ್ಪ ಬರೆ ಜರಿದ್ ಐನ್ ಜನ ತಿಕಲೊಂದಿನೆಟ್ ಪ್ರೇಮಾ ಪೂಜಾರಿ ಪನ್ಪಿನಾರ್ ಆಸ್ಪತ್ರೆಡ್ ಮರ್ದ್ ಪಲಿಪಂದೆ ತೀರ್ದೆರ್. ಮೂವೆರ್ ಮಣ್ಣ್‌ದಡಿಟ್ ಇತ್ತ್‌ದ್, ರಕ್ಷಣಾ ಕಾರ್ಯಾಚರಣೆ ನಡತೊಂದುಂಡು. ಉಳ್ಳಾಲ, ಕಲ್ಲಾಪು, ಬಗಂಬಿಲ, ಪಿಲಾ‌ರ್, ಅಂಬಿಕಾರಸ್ತೆ ಕೋಟೆಕಾರ್, ತಲಪಾಡಿ, ಪಾವೂರು, ಹರೇಕಳ, ಉಳಿಯ ಜಾಗೆಲೆಡ್ ಬೊಲ್ಲ ಬೈದ್ಂಡ್.