Last updated on May 7th, 2025 at 08:35 am
ಕುಡ್ಲ, ಮೇ 07: ಎಚ್ಚಿನಂಶ ಇನಿ ಕಾಂಡೆ ಲಕ್ಕ್‌ದ್ ಮಾತೆರ್ಲಾ ಕೆಬಿ ಕೊರ್ನ ಸುರುತ ಸುದ್ದಿ ಭಾರತ ತನ್ನ ಮಿತ್ತ್ ನಡತಿನ ಉಗ್ರೆರೆ ದಾಳಿದ ಪಗೆ ಸಾದ್ಯೆರೆ ಸುರುತ ಪಜ್ಜೆ ದೀನವು. ಮಾಕ್ ಡ್ರಿಲ್ ಮಾಕ್ ಡ್ರಿಲ್ ಪನ್ಡ್‌ದ್ ಒರಾನೆ ಪಾಕಿಸ್ತಾನಡ್ ದೆಂಗ್‌ದ್ ಕುಲ್ದಿನ ಉಗ್ರೆರೆ ಕ್ಯಾಂಪ್‌ಲೆನ ಮಿತ್ತ್ ದಾಳಿ ಮಲ್ತ್‌ದ್ 100ರ್ದ್‌ಲಾ ಎಚ್ಚ ಉಗ್ರೆರೆನ್ ಬಲಿ ಗೆತೊಂದುಂಡು.
ದೇಶೊಡೊರ್ಮೆ ಭಾರತೊದ ಈ ಪಜ್ಜೆದ ಬಗೆಟ್ ಜನೊಕುಲು ಕುಸಿ ಆದಿತ್ತ್‌ದ್ ಭಾರತೊಗು ಪೊಗ್ಗುದು, ಮುಲ್ಪದಕ್ಲೆನ್ ಕೆರ್ನಕಲೆನ್ ಬಲಿ ದೆತೊಂದಿನ ಕ್ರಮೊನು ಎದುಕೊಂದೆರ್. ಕಾಂಗ್ರೆಸ್ ರಾಷ್ಟ್ರ ನಾಯಕೆರ್ ರಾಹುಲ್ ಗಾಂಧಿಯೆರ್, ಮಲ್ಲಿಕಾರ್ಜುನ ಖರ್ಗೆ ಟ್ವೀಟ್ ಮಲ್ತ್‌ದ್ ಭಾರತೀಯ ಸೇನೆದ ಬಗೆಟ್ ಪೆರ್ಮೆದ ಪಾತೆರ ಪಾತೆರ್ದೆರ್. ಅಂಚೆನೇ ಉಗ್ರೆರೆನ್ ನಾಶ ಮಲ್ಪೆರ ಭಾರತ ಸರ್ಕಾರ ಗೆತೊನುನ ಮಾತಾ ಪಜ್ಜೆಲೆಗ್ಲಾ ಎಂಕ್ಲೆನ ತಾಂಗ್ ಉಂಡು ಪನ್ದ್ ಪನ್ತೆರ್.
ಆಂಡ, ಆಂಡ, ಕರ್ನಾಟಕ ಕಾಂಗ್ರೆಸ್ ಬೇತೆನೇ ಸಾದಿಡ್ ಇತ್ತಿಲೆಕ ತೋಜುಂಡು. ಕಾಂಡೆ ಕಾಂಡೆನೇ ಗಾಂಧಿಯೆರೆನ ಫೋಟೋ ಪಾಡ್ದ್ “ಮನುಕುಲದ ಅತ್ಯಂತ ಶಕ್ತಿಯುತ ಶಸ್ತ್ರ ಎಂದರೆ ಶಾಂತಿ” ಪನ್ದ್ ಬರೆದ್ ಪಾಡ್ದ್ಂಡ್. ಭಾರತ ಉಗ್ರೆರೆ ಮಿತ್ತ್ ದಾಳಿ ಮಲ್ದಿನ ಬೆರಿಟೇ ಇಂಚಿನ ಪೋಸ್ಟ್ ಪಾಡೊಡಾಂಡ ರಾಜ್ಯ ಕಾಂಗ್ರೆಸ್‌ಗ್ ಇತ್ತೆದ ಪರಿಸ್ಥಿತಿದ ಅಂದಾಜಿ ಇಜ್ಜಾ ಅತ್ತ್ ನನಲಾ ಓಲೈಕೆ ರಾಜಕಾರಣೊಡೇ ಉಲ್ಲೆರಾ ತೆರಿಯುಜಿ.
ಈ ಟ್ವೀಟ್‌ದ ಬಗೆಟ್ ರಾಜ್ಯ, ರಾಷ್ಟ್ರಮಟ್ಟೊಡು ಪಾಕ ವಿರೋಧೊಲು ಬತ್ತಿನೇ ಇತ್ತೆ ಶಾಂತಿಮಂತ್ರ ಡಿಲೀಟ್ ಮಲ್ತ್‌ದ್ “ಲೋಕೊದ ಗಟ್ಟಿದ ವಾಯುಸೇನೆಲೆಡ್ ಒಂಜಿ ಪನ್ದ್ ಪುದರಾತಿನ ಭಾರತೀಯ ವಾಯುಸೇನೆ ಉಗ್ರೆರೆಗ್ ಎಡ್ಡೆ ಉತ್ತರ ಕೊರ್ತುಂಡು, ಸರ್ಕಾರ ಬೊಕ್ಕ ಸೇನೆದೊಟ್ಟುಗು ಉಲ್ಲ” ಪನ್ದ್ ಟ್ವೀಟ್ ಮಲ್ತ್‌ದ್ಂಡ್.
ಈ ಪೊರ್ತುಡು ರಾಜ್ಯ ಕಾಂಗ್ರೆಸ್ ಏರೆನ್ ಮೆಚ್ಚಾಯೇರ ಶಾಂತಿದ ಪಾಠ ಮಲ್ತೊಂದುಂಡು ತೆರಿಯುಜಿ.