Last updated on May 13th, 2025 at 03:35 pm
ಮೇ, 13: ಸುರುತ ಕಂಡನ್ಯನೊಟ್ಟುಗು ಡಿವೋರ್ಸ್ ಕೇಸ್ ನ್ಯಾಯಂತಡೆಡ್ ವಿಚಾರಣೆಡ್ ಇಪ್ಪುನಗನೇ, ಕಂಡ್ದ್ ರಡ್ಡನೇ ಮದಿಮೆ ಆದ್, ಅವ್ವೇ ಸುರುತ ಕಂಡನ್ಯಡ ಲಕ್ಷಗಟ್ಲೆ ರೂಪಾಯಿ ಜೀವನಾಂಶ ಕೇನ್ಡಿನ ಬೊಡೆದಿಗ್ ಕುಡ್ಲದ ಕುಟುಂಬ ನ್ಯಾಯಂತಡೆ ಆಲೆನ ಜೀವನಾಂಶೊದ ಹಕ್ಕ್ನ್ ರದ್ದ್ ಮಲ್ತಿನತ್ತಂದೆ, 30,000 ರೂಪಾಯಿ ದಂಡಲಾ ಪಾಡ್ದ್ ಆದೇಶ ಕೊರ್ತುಂಡು.
ದಾದ ಉಂದು ಪ್ರಕರಣ?
ಪಣಕಜಿ ಮಂಡಾಡಿ ನಿವಾಸಿ ಉದಯ ನಾಯಕ್ ಬೊಕ್ಕ ಕುಡ್ಲದ ಮೇರಿಹಿಲ್ದ ಅನಿತಾ ನಾಯಕ್ 2018ಡ್ ಮದಿಮೆ ಆದಿತ್ತೆರೊ. ಆಂಡ, ಇರ್ವೆರೆ ಸಂಸಾರ ಎಡ್ಡೆಡ್ ನಡತೊಂದಿಜ್ಜಂಡ್. ಅಂಚಾದ್ ಕಂಡನೆ ಉದಯ ನಾಯಕ್, ಡಿವೋರ್ಸ್ಗ್ ನ್ಯಾಯಂತಡೆಕ್ ಅರ್ಜಿ ಪಾಡ್ದಿತ್ತೆರ್.
ಈ ಡಿವೋರ್ಸ್ ಅರ್ಜಿ ವಿಚಾರಣೆಡ್ ಇಪ್ಪುನಗನೇ ಬೊಡೆದಿ ಅನಿತಾ ಏರೆಗ್ಲಾ ಪನಂದೆ ಕುಡೊಂಜಿ ಮದಿಮೆ ಆತಲ್! ರಡ್ಡನೇ ಮದಿಮೆದ ವಿಷಯ ದೆಂಗದ್ ಸುರುತ ಕಂಡನೆ ಉದಯ ನಾಯಕ್ ಮೆರೆರ್ದ್ ಪ್ರತಿ ತಿಂಗೊಲು 60,000 ರೂ. ಜೀವನಾಂಶ ಅಂಚೆನೇ 3 ಕೋಟಿ ರೂಪಾಯಿ ಪಿರಿಕಟ್ಟ್ ಕೊರೊಡು ಪನ್ದ್ ಕೇನ್ದ್ ನ್ಯಾಯಂತಡೆಡ್ ದಾವೆ ಪಾಡ್ದಿತ್ತಲ್.
ಅನಿತಾಗ್ ರಡ್ಡನೇ ಮದಿಮೆ ಆತಿನ ತೆರಿದ್ ಉದಯ ನಾಯಕ್, ಈ ಒಲವುನು ನ್ಯಾಯಂತಡೆದ ಗೇನೊಗು ಕನತ್ದೆರ್. ನ್ಯಾಯಂತಡೆದ ಜಡ್ತೆಡ್ ಅನಿತಾ ಸುರುತ ಮದಿಮೆ ಕಾನೂನುಬದ್ಧವಾದ್ ಚಾಲ್ತಿಡ್ ಇಪ್ಪುನಗನೇ ಕಲು ಅಫಿಡವಿಟ್ ಸಂದಾದ್ ರಡ್ಡನೇ ಮದಿಮೆ ಆತಿನ ಸಾಬೀತಾತ್ಂಡ್.
ಕೋರ್ಟ್ ಕೊರ್ತಿನ ತೀರ್ಪು
ಸತ್ಯೊನು ಮದೆಟ್ ದೀದ್ ನ್ಯಾಯಂತಡೆನೇ ಸಾದಿತಪ್ಪಾಯೆರ ತೂಯಿನ ಅನಿತಾನ ಬೇಲೆನ್ ಗಾತಿಡ್ ಗೆತೊಂದಿನ ನ್ಯಾಯಂತಡೆ, ಆಲೆನ ಮಾತಾ ಕಾಯೆಸ್ಲೆನ್ ನಿರ್ದಾಕ್ಷಿಣ್ಯವಾದ್ ತಿರಸ್ಕಾರ ಮಲ್ತ್ಂಡ್. ಜೀವನಾಂಶ ಗೆತೊನುನ ಹಕ್ಕ್ನ್ಲಾ ಅಲಕ್ಕ ರದ್ದ್ ಮಲ್ತ್ದ್, ನ್ಯಾಯಂತಡೆಗ್ ಕಲು ಒಲವು ಕೊರ್ನೆಕ್ 30,000 ರೂ. ದಂಡ ಪಾಡ್ದ್ ಆದೇಶ ಕೊರ್ತುಂಡು.