Last updated on June 21st, 2025 at 06:38 pm
ಪುತ್ತೂರ್, ಜೂನ್ 21: ಪಾಪದಕ್ಲೆಗ್ ತಾಂಗ್ ಆದಿತ್ತಿನ ಜವನೆ ಒರಿ ಉಸಾರ್ದಾಂತೆ ತೀರ್ದಿನ ನಡಕೆ ನಡತ್ದ್ಂಡ್.
ತೀರ್ದಿನಾರೆನ್ ಬನ್ನೂರು ನಿವಾಸಿ ಅಣ್ಣಪ್ಪೆ (29)ಪನ್ದ್ ಗುರ್ತ ಪತ್ತ್ದೆರ್. ಆರ್ ಉಸಾರ್ದಾಂತಿನೆರ್ದಾವರ ಕುಡ್ಲದ ಪ್ರೈವೇಟ್ ಆಸ್ಪತ್ರೆಡ್ ಮರ್ದ್ ಮಲ್ತೊಂದಿತ್ತೆರ್. ಆಂಡ ಮರ್ದ್ ಪಲಿಪಂದೆ ತೀರ್ದೆರ್ ಪನ್ದ್ ತೆರಿದ್ ಬೈದ್ಂಡ್.
ಅಣ್ಣಪ್ಪೆರ್ ದುಂಬು ಪುತ್ತೂರ್ದ ಸೇವಾ ಸಂಸ್ಥೆ ಸಹಾಯಹಸ್ತ ಲೋಕಸೇವಾ ಟ್ರಸ್ಟ್ದ ಮುಕೇನ ವಿಶೇಷ ಏಸ ಪಾಡ್ದ್ ಪಾಕ ಬಡಪತ್ತ್ದ ಜೋಕುಲೆಗ್ ಅಂಚೆನೇ ಆರೋಗ್ಯದ ಸಮಸ್ಯೆ ಇತ್ತಿನಕ್ಲೆಗ್ ತನ್ನ ಕೈರ್ದ್ ಆಯಿನಾತ್ ಜಾತ್ರೆ ಅತ್ತ್ಂಡ ಬೇತೆ ಜನಸೇರುನ ಕಾರ್ಯಕ್ರಮೊಲೆಡ್ ಬೇತೆ ಬೇತೆ ರೀತಿದ ಏಸ ಪಾಡ್ದ್ ಅವೆಟ್ ಬತ್ತಿನ ಕಾಸ್ನ್ ಪಾಪದಕ್ಲೆಗ್ ಕೊರ್ದು ಸಕಾಯ ಮಲ್ತೊಂದಿತ್ತೆರ್. ಆತೇ ಅತ್ತಂದೆ ತನ್ನನೇ ಆಯಿನ ಕಲಾಸಿರಿ ಗೊಂಬೆ ಬಳಗ (ರಿ) ಪುತ್ತೂರು ಉಂದೆನ್ ಉಂಡು ಮಲ್ತ್ದ್ ವರ್ಸೊಡೊಂಜಿ ದಿನ ಗೊಂಬೆ ಏಸ ಪಾಡ್ದ್ ಅವೆಟ್ ಬತ್ತಿನ ಕಾಸ್ನ್ ಪಾಪದ ಇಲ್ಲದಕ್ಲೆಗ್ ಅತ್ತ್ಂಡ ಉಸಾರ್ದಾಂತಿನಕ್ಲೆಗ್ ಕೊರೊಂದಿತ್ತೆರ್.
ಮೇರ್ ಬನ್ನೂರ್ಡ್ ತನ್ನ ಪಲಿನ ಒಟ್ಟುಗು ಬಾಡಾಯಿದ ಇಲ್ಲಡ್ ಇತ್ತೆರ್.