Last updated on June 20th, 2025 at 10:22 am
ಉಳ್ಳಾಲ: ಸೋಮೇಶ್ವರ ಪುರಸಭಾ ಸೀಮೆಡ್ ಬೂರುನ ಪಡಾಯಿಡ್ ಇಪ್ಪುನ ಮರೊಕುಲೆನ ಗೆಲ್ಲ್ ಕಡ್ಪೆರ ಸೋಮೇಶ್ವರ ಪುರಸಭೆ ಅರಣ್ಯ ಇಲಾಖೆಗ್ ಪಟ್ಟಿ ಕೊರ್ನ್ಡ, ಐಕ್ಲೆನ್ ಬುಡ್ದು ಸೋಮೇಶ್ವರ ಕಡಲ ಕರೆಟ್ ಇತ್ತಿನ ಎಡ್ಡೆಎಡ್ಡೆನ್ತಿನ ಗಾಳಿದ ಮರೊಕ್ಲೆನ್ ಕಡ್ತ್ದ್ ಕೊನೊತಿನ ಬಗೆಟ್ ಸ್ಥಳೀಯವಾದ್ ಆಕ್ರೋಶ ತೋಜಿದ್ ಬೈದ್ಂಡ್.
ಕಡಲ ಕರೆಟ್ ಪಡಾಯಿದ ಸ್ಥಿತಿಟ್ ಇತ್ತಿನ ರಡ್ಡ್ ಗಾಳಿದ ಮರ ಸೇರ್ದ್ ಉಚ್ಚಿಲ ಭಗವತಿ ಶಾಲೆ, ಪುರಸಭೆದ ಕೈತಲ್ ಇಪ್ಪುನ ಬಸ್ ಉಂತಡೆದ ಬರಿತ ಮರೊಕ್ಲೆನ ಪಟ್ಟಿ ಮಲ್ತ್ದ್ ಗೆಲ್ಲ್ ಕಡ್ಪೆರ ಅರಣ್ಯ ಇಲಾಖೆಗ್ ಸೂಚನೆ ಕೊರ್ದಿತ್ತ್ಂಡ್. ಆ ಪ್ರಕಾರ ಜೋಕುಲೇ ಎಚ್ಚಾದ್ ಉಂತುನ ಸೋಮೇಶ್ವರ ಬಸ್ ಉಂತಡೆದ ಬರಿತ ಮರ ಬೊಕ್ಕ ಉಚ್ಚಿಲ ಸಂಕೊಳಿಗೆ ಭಗವತಿ ದೇಲಂತಡೆದ ಕೈತಲ್ದ ಮರೊಕ್ಲೆನ ಗೆಲ್ಲ್ ಕಡ್ಪೊಡಿತ್ತ್ಂಡ್. ಆಂಡ ಅವೆನ್ ಬುಡ್ದ್ ಕಡಲ ಕರೆತ ಐನ್ ಗಾಳಿದ ಮರೊಕ್ಲೆನ್ ಅಡಿರ್ದೆ ಕಡ್ತ್ದ್ ಕೊನೊತಿನ, ಪಾಕ ಸಂಶಯೊಲೆಗ್ ನೆವನ ಆತ್ಂಡ್.
ಈ ಬಗೆಟ್ ಪುರಸಭಾ ಉಪಾಧ್ಯಕ್ಷೆ ರವಿಶಂಕರ್ ಸೋಮೇಶ್ವರ ಪಾತೆರ್ದ್, ಪುರಸಭೆತ ಸೀಮೆಡ್ ಉಪದ್ರ ಆಪಿನಂಚಿನ, ಪಡಾಯಿದ ಮರೊಕ್ಲೆನ ಪಟ್ಟಿನ್ ಅರಣ್ಯ ಇಲಾಖೆಗ್ ಕೊರ್ದಿತ್ತ. ಆಂಡ ಅವೆನ್ ಇದಮುಟ್ಟ ದೆತ್ತ್ದಿಜೆರ್. ಆಂಡ ಕಡಲ ಕರೆತ ಗಾಳಿದ ಮರೊಕ್ಲೆನ್ ಕಡ್ತ್ದ್ ಕೊನೊತೆರ್. ಈ ಬಗೆಟ್ ಪುರಸಭೆಗ್ಲಾ ಒಲವು ಕೊರ್ತಿಜೆರ್ ಅಂಚಾದ್ ಅರಣ್ಯ ಇಲಾಖೆಡ ಸ್ಪಷ್ಟನೆ ಕೇನುವ ಪನ್ದ್ ಪನ್ಡೆರ್.