Last updated on June 15th, 2025 at 04:20 pm
ಕಾಸ್ರೋಡ್, ಜೂ. 14 : ವಯನಾಡ್ಡ್ 71 ವರ್ಸ ಪ್ರಾಯೊದ ಪರಬು ಬೊಲೆರೋ ಎಡ್ತ್ದ್ ತೀರ್ದಿನ ನಡಕೆಡ್ , ಕಾಸ್ರೋಡ್ದ ಐನ್ ಜನೊನು ಕೈದ್ ಮಲ್ದೆರ್.
ನೆಲ್ಲಿಮುಂಡಂ ಕಳಪ್ಪುರದ ಇಬ್ರಾಹಿಂ ಪನ್ಪಿನಾರೆನ ಬೊಡೆದಿ ಬೀಫಾತಿಮ್ಮ ರವರಿ ತೀರ್ದಿನಾರ್.
ಪೆರುಂಬಳದ ಅಖಿಲ್ (28), ಆರಾಮಂಗಾನದ ಪ್ರಶಾಂತ್ (21), ಪೆರುಂಬಳ ದ ನಿಧಿ ನಾರಾಯಣನ್ (20) ಬೊಕ್ಕ ಪೆರುಂಬಳ ಚಾವಕ್ಕಾಡ್ ನ ನಿತಿನ್ (22) ಅಂಚೆನೇ 17 ವರ್ಸೊದ ಆಣ್ ಒರಿಯನ್ ಕೈದ್ ಮಲ್ದೆರ್.
ಜೂನ್ 8 ದಾನಿ ಕಾಂಡೆ ಈ ನಡಕೆ ನಡತಿತ್ತ್ಂಡ್. ಕಾಂಡೆ 11 ಗಂಟೆದ ಅಂದಾಜಿಗ್ ಪಲ್ಲಿನ ಒಟ್ಟುಗು ಸ್ಕೂಟರ್ಡ್ ಪೋವೊಂದುಪ್ಪುನಗ ಮೇಪಾಡಿ ಕೈತಲ್ ಸೈಡ್ ಕೊರ್ಪುನ ಬಗೆಟ್ ಆರೋಪಿಲು ಬೊಕ್ಕ ಸ್ಕೂಟರ್ಡ್ ಇತ್ತಿನಕಲೆನ ನಡುಟು ವಾಗ್ವಾದ ಆತ್ಂಡ್. ಬೊಕ್ಕ ಅಲ್ಪರ್ದ್ಒಂತೆ ದುಂಬು ಪೋಯಿಲೆಕನೆ ಬೊಲೆರೊ ಸ್ಕೂಟರ್ಗ್ ಎಡ್ತ್ದಿತ್ತ್ದ, ಬೀಫಾತಿಮ್ಮ ರೋಡ್ಗ್ ರಟ್ಟ್ದ್ ತೀರ್ದೆರ್. ಪುಲ್ಲಿ ಆಫ್ನಾನ್ಗ್ ಗಾತಿದ ಗಡಿಕುಲಾದಿತ್ತ.
ಸುರುಟು ಪೊಲೀಸೆರ್ ಅಸಹಜ ಸಾವು ಪ್ರಕರಣ ದಾಕಲ್ತ್ದಿತ್ತಿರ್. ಬೊಕ್ಕ ಆಸ್ಪತ್ರೆಗ್ ದಾಕಲಾದಿತ್ತಿನ ಅಫ್ನಾನ್ಡ ಒಲವು ಗೆತೊನ್ನಗ ಕೃತ್ಯ ಬೊಲ್ಪುಗು ಬೈದ್ಂಡ್. ಜಡ್ತೆ ಮಲ್ತಿನ ಪೋಲೀಸೆರ್ ಬೊಲೆರೋ ಜೀಪ್ ಬುಡೊಂದಿತ್ತಿನ ಅಖಿಲ್ನ್ ವಶೊಕು ಗೆತೊಂದು ವಿಚಾರಣೆ ಮಲ್ಪುನಗ ಉಂದು ಆ್ಯಕ್ಸಿಡೆಂಟ್ ಅತ್ತ್ ಪನ್ದ್ ತೆರಿದ್ ಬೈದ್ಂಡ್.
ಸಿ.ಸಿ.ಟಿ.ವಿ ದೃಶ್ಯ ಬೊಕ್ಕ ಬೇತೆ ಡ್ರೈವರ್ನಕಲೆನ ಒಲವು ಒಟ್ಟು ಮಲ್ತಿನ ಪೊಲೀಸೆರ್ ಕೊಲೆ ಪನ್ದ್ ದೃಢ ಮಲ್ದೆರ್, ಉಂದೆರ್ದಾವರ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ದೆರ್.